Paneer Potli Samosa Recipe: દિવાળીના તહેવાર પર ઘરે મહેમાનોનું આગમન થતું હોય ત્યારે કંઈક નવું અને સ્વાદિષ્ટ નાસ્તો બનાવવાનું મન થાય છે. દર વખતે સામાન્ય સમોસા અને કચોરી બનાવવાને બદલે આ વખતે પનીર પોટલી સમોસા ટ્રાય કરો. બહારથી એકદમ ક્રિસ્પી અને અંદરથી મસાલેદાર પનીરના સ્ટફિંગથી ભરેલા આ સમોસા દેખાવમાં પણ ખૂબ જ આકર્ષક લાગે છે. ચાલો જાણીએ પનીર પોટલી સમોસા બનાવવાની સરળ રીત.
પનીર પોટલી સમોસા બનાવવા માટેની સામગ્રી
લોટ બાંધવા માટે
- 2 કપ મેંદો
- 3 ચમચી ઘી અથવા તેલ
- સ્વાદ પ્રમાણે મીઠું
- જરૂર મુજબ પાણી
સ્ટફિંગ બનાવવા માટે
- 1 કપ છીણેલું પનીર
- 1 બારીક સમારેલી ડુંગળી
- 1 બારીક સમારેલું કેપ્સિકમ
- 2 ચમચી બાફેલા મકાઈના દાણા
- 1 ચમચી આદુ-મરચાંની પેસ્ટ
- અડધી ચમચી ગરમ મસાલો
- અડધી ચમચી લાલ મરચું પાવડર
- અડધી ચમચી ચાટ મસાલો
- બારીક સમારેલી કોથમીર
- સ્વાદ પ્રમાણે મીઠું
- 1 ચમચી તેલ
પનીર પોટલી સમોસા બનાવવાની રીત
સૌથી પહેલાં એક મોટા વાસણમાં મેંદો, મીઠું અને ઘી અથવા તેલ નાખીને બરાબર મિક્સ કરો. હવે થોડું-થોડું પાણી ઉમેરીને કઠણ લોટ બાંધી લો. લોટને ઢાંકીને 15થી 20 મિનિટ માટે બાજુ પર રાખો.
હવે એક પેનમાં તેલ ગરમ કરી તેમાં આદુ-મરચાંની પેસ્ટ અને સમારેલી ડુંગળી ઉમેરો. ડુંગળી થોડી નરમ થાય એટલે તેમાં કેપ્સિકમ અને મકાઈના દાણા નાખીને સાંતળો. ત્યારબાદ છીણેલું પનીર, લાલ મરચું, ગરમ મસાલો, ચાટ મસાલો અને મીઠું ઉમેરીને બરાબર મિક્સ કરો. છેલ્લે કોથમીર નાખીને સ્ટફિંગ ઠંડું થવા દો.
હવે બાંધેલા લોટમાંથી નાના લૂઆ બનાવીને પાતળી પૂરી વણી લો. તેને વચ્ચે કાપીને અડધા ગોળ આકારમાં તૈયાર કરો. આકાર આપ્યા બાદ વચ્ચે પનીરનું સ્ટફિંગ ભરો અને કિનારીઓને એકસાથે ભેગી કરીને પોટલી જેવો આકાર આપો. ઉપરના ભાગને સારી રીતે દબાવીને બંધ કરો.
એક કડાઈમાં તેલ ગરમ કરો અને ધીમા તાપે પોટલી સમોસાને ગોલ્ડન બ્રાઉન અને ક્રિસ્પી થાય ત્યાં સુધી તળી લો. તૈયાર છે તમારા સ્વાદિષ્ટ પનીર પોટલી સમોસા. તેને લીલી ચટણી અથવા ટામેટાંની સોસ સાથે ગરમાગરમ સર્વ કરો.
ટિપ્સ
પનીર પોટલી સમોસા બનાવતી વખતે લોટ થોડો કઠણ બાંધવો, જેથી સમોસા વધુ ક્રિસ્પી બને. સ્ટફિંગ હંમેશાં ઠંડું થયા પછી જ પોટલીમાં ભરવું. પોટલીની ઉપરની કિનારીઓ સારી રીતે બંધ કરવી, જેથી તળતી વખતે સ્ટફિંગ બહાર ન આવે. સમોસાને ધીમા તાપે તળવા, જેથી તે અંદરથી પણ સારી રીતે શેકાઈ જાય અને બહારથી ગોલ્ડન બ્રાઉન બને.