Green Garlic Handvo Recipe: શિયાળાની શરૂઆત પહેલાં જ બજારમાં લીલા લસણ દેખાવા લાગે છે અને તેની સુગંધ ખાવાના શોખીનોને આકર્ષી લે છે. મોટાભાગના લોકો લીલા લસણની ચટણી અથવા શાક બનાવે છે, પરંતુ આ વખતે તમે લીલા લસણનો હાંડવો ટ્રાય કરી શકો છો. કરકરો ટેક્સચર, લીલા લસણની મજેદાર સુગંધ અને દાળ-ચોખાની પૌષ્ટિકતા સાથે તૈયાર થતો આ હાંડવો નાસ્તા માટે એક પરફેક્ટ વિકલ્પ છે.
લીલા લસણનો હાંડવો બનાવવાની સામગ્રી
હાંડવાના ખીરું માટે
- 1 કપ ચોખા
- ½ કપ ચણાની દાળ
- ¼ કપ તુવેર દાળ
- 2 ચમચી દહીં
- 1 કપ બારીક સમારેલું લીલું લસણ
- 1 લીલું મરચું બારીક સમારેલું
- ½ ચમચી આદુની પેસ્ટ
- મીઠું સ્વાદ મુજબ
- ચપટી હળદર
- 1 ચમચી ખાંડ
- 1 ચમચી લીંબુનો રસ
- 1 ચમચી તેલ
- ½ ચમચી ફ્રૂટ સોલ્ટ
વઘાર માટે
- 1 ચમચી તેલ
- ½ ચમચી રાઈ
- ½ ચમચી તલ
- થોડાં કરીપત્તા
લીલા લસણનો હાંડવો બનાવવાની રીત
ચોખા અને બધી દાળને સારી રીતે ધોઈને 5 થી 6 કલાક માટે પલાળી રાખો. ત્યારબાદ તેનું જાડું ખીરું તૈયાર કરો. હવે તેમાં દહીં ઉમેરીને 6 થી 8 કલાક સુધી ઢાંકીને રાખો જેથી ખીરું થોડું ફર્મેન્ટ થઈ જાય.
ફર્મેન્ટ થયેલા ખીરામાં લીલું લસણ, લીલું મરચું, આદુની પેસ્ટ, મીઠું, હળદર, ખાંડ, લીંબુનો રસ અને તેલ ઉમેરીને બરાબર મિક્સ કરો. છેલ્લે ફ્રૂટ સોલ્ટ ઉમેરીને હળવા હાથે મિશ્રણ હલાવો.
હાંડવાની કડાઈ અથવા પેન ગરમ કરો. તેમાં તેલ નાખી રાઈ, તલ અને કરીપત્તાનો વઘાર કરો. હવે તૈયાર કરેલું ખીરું તેમાં રેડી દો અને ધીમી આંચ પર ઢાંકણ મૂકી 20 થી 25 મિનિટ સુધી શેકો.
એક બાજુ સારી રીતે શેકાઈ જાય પછી જરૂર હોય તો બીજી બાજુ પણ થોડું શેકી લો. હાંડવો સુવર્ણ રંગનો અને કરકરો થઈ જાય એટલે ગેસ બંધ કરી દો. ગરમાગરમ લીલા લસણનો હાંડવો ચટણી અથવા દહીં સાથે સર્વ કરો.
ટિપ્સ
- લીલા લસણની માત્રા તમારા સ્વાદ મુજબ વધારી અથવા ઘટાડી શકો છો.
- વધુ કરકરો હાંડવો બનાવવા માટે ઉપરથી થોડાં તલ છાંટી શકાય.
- હાંડવો ધીમી આંચ પર શેકવાથી અંદર સુધી સરખો ચડે છે અને સ્વાદ પણ વધુ સારો આવે છે.