Masala Masoor Dal Recipe: રોજની દાળ ખાઈને કંટાળી ગયા છો અને લંચ કે ડિનરમાં કંઈક ચટપટું ખાવાની ઈચ્છા છે? તો એકવાર ઘરે ઢાબા સ્ટાઇલ મસાલા મસૂર દાળ જરૂર બનાવો. મસાલા અને દેશી ઘીના વઘારથી તૈયાર થતી આ દાળ સ્વાદમાં એકદમ લાજવાબ લાગે છે. તેને ગરમાગરમ રોટલી, પરાઠા કે જીરા રાઇસ સાથે પીરસી શકાય છે. સૌથી સારી વાત એ છે કે આ દાળ બનાવવા માટે ખાસ કોઈ મોંઘી સામગ્રીની જરૂર પડતી નથી. ચાલો જાણીએ મસાલા મસૂર દાળ બનાવવાની સરળ રીત.
મસાલા મસૂર દાળ બનાવવા માટેની સામગ્રી
- મસૂર દાળ – 1 કપ
- ઝીણી સમારેલી ડુંગળી – 1 નંગ
- ઝીણા સમારેલા ટામેટાં – 2 નંગ
- લીલાં મરચાં – 2 નંગ
- આદુ-લસણની પેસ્ટ – 1 ચમચી
- જીરું – અડધી ચમચી
- હળદર – અડધી ચમચી
- લાલ મરચું પાઉડર – 1 ચમચી
- ધાણાજીરું પાઉડર – 1 ચમચી
- ગરમ મસાલો – અડધી ચમચી
- હિંગ – 1 ચપટી
- ઘી અથવા તેલ – 2 ચમચી
- મીઠું – સ્વાદ પ્રમાણે
- લીલી કોથમીર – જરૂર મુજબ
- પાણી – જરૂર મુજબ
- લીંબુનો રસ – 1 ચમચી (વૈકલ્પિક)
મસાલા મસૂર દાળ બનાવવાની રીત
સૌથી પહેલાં મસૂર દાળને પાણીથી સારી રીતે ધોઈ લો. ત્યારબાદ કુકરમાં દાળ, હળદર, મીઠું અને જરૂર મુજબ પાણી ઉમેરીને 2થી 3 સીટી વાગે ત્યાં સુધી બાફી લો. કુકરનું પ્રેશર નીકળી જાય પછી દાળને ચમચાથી થોડી મેશ કરી લો.
હવે એક કડાઈમાં ઘી અથવા તેલ ગરમ કરીને તેમાં જીરું અને હિંગ ઉમેરો. ત્યારબાદ સમારેલી ડુંગળી નાખીને સોનેરી થાય ત્યાં સુધી સાંતળો. હવે આદુ-લસણની પેસ્ટ અને લીલાં મરચાં ઉમેરીને બરાબર સાંતળો.
ત્યારબાદ તેમાં સમારેલાં ટામેટાં, લાલ મરચું પાઉડર, ધાણાજીરું પાઉડર અને ગરમ મસાલો ઉમેરીને ટામેટાં નરમ થાય ત્યાં સુધી પકાવો. મસાલો બરાબર તૈયાર થઈ જાય એટલે તેમાં બાફેલી મસૂર દાળ ઉમેરીને સારી રીતે મિક્સ કરો.
હવે દાળમાં જરૂર મુજબ ગરમ પાણી ઉમેરીને ધીમા તાપે 5થી 7 મિનિટ ઉકળવા દો, જેથી મસાલાનો સ્વાદ દાળમાં સારી રીતે ભળી જાય. છેલ્લે ઉપરથી લીલી કોથમીર અને ઈચ્છા મુજબ લીંબુનો રસ ઉમેરો. તૈયાર છે સ્વાદિષ્ટ ઢાબા સ્ટાઇલ મસાલા મસૂર દાળ. તેને ગરમાગરમ રોટલી, પરાઠા કે જીરા રાઇસ સાથે પીરસો.