Dubai Kunafa Chocolate recipe: દિવાળીના તહેવારમાં મીઠાઈ અને ચોકલેટ ખાવાની મજા જ અલગ હોય છે. જો આ વખતે તમે ઘરે કંઈક નવું અને ખાસ બનાવવાનું વિચારી રહ્યા છો, તો દુબઈની ફેમસ કુનાફા ચોકલેટ ટ્રાય કરી શકો છો. બહારથી ચોકલેટનું ક્રિસ્પી લેયર અને અંદર પિસ્તા ક્રીમ સાથે કુનાફાનું કરકરું સ્ટફિંગ આ ચોકલેટને ખાસ બનાવે છે. આ રેસિપી ઘરે સરળતાથી બનાવી શકાય છે અને દિવાળી પર પરિવાર કે મહેમાનોને સર્વ કરવા માટે પણ સરસ વિકલ્પ છે.
Dubai Kunafa Chocolate Recipe | દુબઈ કુનાફા ચોકલેટ બનાવવાની રીત
સામગ્રી
- 200 ગ્રામ મિલ્ક અથવા ડાર્ક ચોકલેટ
- 1 કપ કુનાફા (કદાયફી)
- 3થી 4 ચમચી પિસ્તા ક્રીમ
- 1 ચમચી માખણ
- 1 ચમચી તલ અથવા તાહિની (વૈકલ્પિક)
બનાવવાની રીત
સૌથી પહેલાં કુનાફાને નાના ટુકડામાં કાપી લો. એક પેનમાં માખણ ગરમ કરી તેમાં કુનાફા ઉમેરો. ધીમા તાપે તેને સતત હલાવતા રહો, જ્યાં સુધી તે ગોલ્ડન બ્રાઉન અને ક્રિસ્પી ન થઈ જાય. ત્યારબાદ તેને ઠંડું થવા માટે એક બાજુ રાખી દો.
હવે એક બાઉલમાં ક્રિસ્પી કુનાફા અને પિસ્તા ક્રીમ મિક્સ કરો. જો તમને તાહિનીનો સ્વાદ પસંદ હોય, તો તેમાં થોડી તાહિની પણ ઉમેરી શકો છો. બધી સામગ્રી સારી રીતે મિક્સ કરો, જેથી કુનાફા પર પિસ્તા ક્રીમનું કોટિંગ થઈ જાય.
ચોકલેટને નાના ટુકડામાં કાપીને ડબલ બોઇલર અથવા માઇક્રોવેવમાં ધીમે ધીમે ઓગાળો. ચોકલેટને વધારે ગરમ ન કરો અને તેને વચ્ચે હલાવતા રહો, જેથી તે સ્મૂથ બને. હવે ચોકલેટ મોલ્ડમાં ઓગાળેલી ચોકલેટનું એક લેયર લગાવો. મોલ્ડની બાજુઓ પર પણ ચોકલેટ સારી રીતે ફેલાવો. તેને થોડા સમય માટે ફ્રિજમાં રાખો, જેથી ચોકલેટ સેટ થઈ જાય.
ચોકલેટ સેટ થયા પછી તેમાં તૈયાર કરેલું કુનાફા અને પિસ્તા ક્રીમનું મિશ્રણ ભરો. ઉપરથી ફરી ઓગાળેલી ચોકલેટ નાખીને ફિલિંગને સંપૂર્ણ રીતે ઢાંકી દો. મોલ્ડને હળવેથી ટેબલ પર ટપકાવો, જેથી ચોકલેટ સરખી રીતે ફેલાય અને અંદર હવાના બબલ ન રહે.
હવે મોલ્ડને ફ્રિજમાં 1થી 2 કલાક રાખો. ચોકલેટ સંપૂર્ણ સેટ થઈ જાય પછી તેને મોલ્ડમાંથી બહાર કાઢો. તૈયાર છે ઘરે બનાવેલી દુબઈની ફેમસ કુનાફા ચોકલેટ, જેને તમે દિવાળી પર મીઠાઈ તરીકે સર્વ કરી શકો છો.
ખાસ ટિપ્સ
- કુનાફાને સારી રીતે ગોલ્ડન અને ક્રિસ્પી શેકો, જેથી ચોકલેટમાં તેનો કરકરો સ્વાદ આવે.
- ચોકલેટ મોલ્ડમાં નાખતા પહેલાં મોલ્ડ સંપૂર્ણ સૂકો હોવો જોઈએ.
- ચોકલેટને સીધી વધારે ગરમી પર ઓગાળશો નહીં, નહીં તો તેનો ટેક્સચર બગડી શકે.
- ચોકલેટને ફ્રિજમાં સેટ થયા પછી જ મોલ્ડમાંથી બહાર કાઢો.