Dana Muthiya Nu Shaak Recipe: ગુજરાતી ભોજનમાં કાઠિયાવાડી શાકનો સ્વાદ કંઈક અલગ જ હોય છે. જો તમને તીખું, મસાલેદાર અને ચટાકેદાર શાક ખાવાનું પસંદ હોય, તો દાણા મૂઠિયાનું શાક એક સરસ વિકલ્પ છે. લીલા દાણા, મસાલેદાર ગ્રેવી અને નરમ મૂઠિયાના મિશ્રણથી બનતું આ શાક રોટલી, રોટલા કે ગરમાગરમ ભાખરી સાથે ખૂબ જ સ્વાદિષ્ટ લાગે છે. તો ચાલો જાણીએ ઘરે કાઠિયાવાડી સ્ટાઈલમાં દાણા મૂઠિયાનું શાક બનાવવાની પરફેક્ટ રીત.
સામગ્રી
મૂઠિયા બનાવવા માટે
- 1 કપ મેથીની સમારેલી ભાજી
- 1 કપ ઘઉંનો લોટ
- 2 ચમચી બેસન
- 1 ચમચી આદુ-મરચાંની પેસ્ટ
- ½ ચમચી હળદર
- 1 ચમચી લાલ મરચું
- 1 ચમચી ધાણાજીરું
- ચપટી હિંગ
- મીઠું સ્વાદ મુજબ
- 1 ચમચી તેલ
શાક બનાવવા માટે
- 1 કપ લીલા તુવેરના દાણા
- 2 ચમચી તેલ
- 1 ચમચી રાઈ
- ½ ચમચી જીરું
- ચપટી હિંગ
- ¼ ચમચી અજમો
- 1 ડુંગળી સમારેલી (વૈકલ્પિક)
- 1 ટમેટું સમારેલું
- 1 ચમચી આદુ-લસણની પેસ્ટ
- 1 ચમચી લાલ મરચું
- ½ ચમચી હળદર
- 1 ચમચી ધાણાજીરું
- ½ ચમચી ગરમ મસાલો
- 2 ચમચી દહીં (વૈકલ્પિક)
- મીઠું સ્વાદ મુજબ
- જરૂર મુજબ પાણી
- લીલા ધાણા સમારેલા
દાણા મૂઠિયાનું શાક બનાવવાની રીત
સૌથી પહેલાં એક મોટા વાસણમાં સમારેલી મેથીની ભાજી લો. તેમાં ઘઉંનો લોટ, બેસન, આદુ-મરચાંની પેસ્ટ, હળદર, લાલ મરચું, ધાણાજીરું, હિંગ, મીઠું અને તેલ ઉમેરો. બધી સામગ્રીને સારી રીતે મિક્સ કરીને થોડું થોડું પાણી નાખી મધ્યમ કઠણ લોટ બાંધો.
હવે આ લોટમાંથી નાની નાની મૂઠિયા બનાવો. એક વાસણમાં પાણી ગરમ કરીને તેમાં સ્ટીમર મૂકો અને મૂઠિયાને 12થી 15 મિનિટ સુધી બાફો. મૂઠિયા બરાબર બફાઈ જાય એટલે બહાર કાઢીને ઠંડા થવા દો. તમે ઇચ્છો તો તેને થોડા તેલમાં હળવા શેકી પણ શકો છો.
હવે એક કડાઈમાં તેલ ગરમ કરો. તેમાં રાઈ, જીરું, અજમો અને હિંગ ઉમેરો. રાઈ તતડે એટલે આદુ-લસણની પેસ્ટ અને ડુંગળી નાખીને હળવી સોનેરી થાય ત્યાં સુધી સાંતળો. ત્યારબાદ સમારેલું ટમેટું ઉમેરીને નરમ થાય ત્યાં સુધી પકાવો.
હવે તેમાં હળદર, લાલ મરચું, ધાણાજીરું અને મીઠું નાખીને મસાલાને બરાબર સાંતળો. જો તમને કાઠિયાવાડી સ્ટાઈલનો ખાટો અને મસાલેદાર સ્વાદ ગમતો હોય, તો થોડું ફેંટેલું દહીં ઉમેરી શકો છો. દહીં નાખ્યા પછી ગેસ ધીમો રાખીને સતત હલાવતા રહો.
ત્યારબાદ લીલા તુવેરના દાણા ઉમેરીને 2થી 3 મિનિટ મસાલા સાથે સાંતળો. હવે જરૂર મુજબ ગરમ પાણી નાખીને કડાઈને ઢાંકી દો અને દાણા નરમ થાય ત્યાં સુધી પકાવો.
દાણા બરાબર ચડી જાય એટલે તેમાં તૈયાર કરેલા મૂઠિયા ઉમેરો. હળવા હાથે મિક્સ કરીને 5થી 7 મિનિટ ધીમા તાપે શાકને ચડવા દો, જેથી મૂઠિયા મસાલાનો સ્વાદ સારી રીતે શોષી લે. ગ્રેવી ઘટ્ટ જોઈતી હોય તો થોડું વધારે ઉકાળો અને પાતળી જોઈતી હોય તો જરૂર મુજબ ગરમ પાણી ઉમેરો.
છેલ્લે ગરમ મસાલો અને સમારેલા લીલા ધાણા નાખીને ગેસ બંધ કરી દો. તૈયાર છે સ્વાદિષ્ટ કાઠિયાવાડી સ્ટાઈલ દાણા મૂઠિયાનું શાક. તેને ગરમાગરમ રોટલી, બાજરીના રોટલા અથવા ભાખરી સાથે પીરસો.
દાણા મૂઠિયાનું શાક વધુ સ્વાદિષ્ટ બનાવવા માટેની ટિપ્સ
- મૂઠિયા બહુ નરમ ન બને તે માટે લોટમાં પાણી એકસાથે ન નાખો.
- કાઠિયાવાડી સ્વાદ માટે લાલ મરચું અને લસણનું પ્રમાણ તમારી પસંદગી મુજબ રાખો.
- મૂઠિયા શાકમાં ઉમેર્યા પછી વધારે હલાવશો નહીં, નહીં તો તે તૂટી શકે છે.
- તાજા લીલા તુવેર ન મળે તો ફ્રોઝન દાણાનો પણ ઉપયોગ કરી શકો છો.