Batata Laccha Bhajiya Recipe: ચા સાથે કંઈક ગરમાગરમ અને ચટપટું ખાવાનું મન થાય ત્યારે ભજીયા એકદમ પરફેક્ટ નાસ્તો છે. ખાસ કરીને બટાટા લચ્છા ભજીયા બહારથી કુરકુરા અને અંદરથી નરમ હોય છે. તેમાં બટાકાની લાંબી પાતળી કતરણ સાથે ડુંગળી, લીલા મરચાં અને મસાલાનો સ્વાદ ભળે છે, જે તેને વધુ સ્વાદિષ્ટ બનાવે છે. સૌથી સારી વાત એ છે કે આ ભજીયા બનાવવા માટે વધારે મહેનત કરવાની જરૂર નથી. ઘરમાં સરળતાથી મળી રહેતી સામગ્રીથી માત્ર 15 મિનિટમાં સ્ટ્રીટ સ્ટાઈલ બટાટા લચ્છા ભજીયા તૈયાર કરી શકાય છે. તો ચાલો જાણીએ તેની પરફેક્ટ રેસીપી.
બટાટા લચ્છા ભજીયા બનાવવા માટેની સામગ્રી
- બટાકા – 2 મધ્યમ કદના (લગભગ 400 ગ્રામ)
- ડુંગળી – 2 સમારેલી
- લીલાં મરચાં – 2થી 3 ઝીણાં સમારેલાં
- આદુ – 1 ઇંચ છીણેલું
- લસણ – 5થી 6 કળી ઝીણી સમારેલી
- લીલાં ધાણા – અડધો કપ
- લાલ મરચું પાવડર – 1 નાની ચમચી
- ધાણાજીરું પાવડર – 1 નાની ચમચી
- અજમો – 1 નાની ચમચી
- આમચૂર પાવડર – 1 નાની ચમચી
- ગરમ મસાલો – ¼ નાની ચમચી
- લીંબુનો રસ – 1 નાની ચમચી
- સંચળ – એક ચપટી
- મીઠું – સ્વાદ અનુસાર
- બેસન – 4 મોટી ચમચી
- ચોખાનો લોટ – 2 મોટી ચમચી
- ગરમ તેલ – 1 મોટી ચમચી
- તળવા માટે તેલ – જરૂર મુજબ
બટાટા લચ્છા ભજીયા બનાવવાની રીત
સૌથી પહેલાં બટાકાની છાલ ઉતારી લો. હવે વેફર કટર અથવા છીણીની મદદથી બટાકાની પાતળી સ્લાઇસ કાપી લો. આ સ્લાઇસને એક ઉપર એક ગોઠવીને લાંબી અને પાતળી લચ્છા જેવી કતરણ બનાવી લો. ધ્યાન રાખો કે બટાકાની કતરણ બહુ જાડી ન હોવી જોઈએ, કારણ કે પાતળી કતરણથી ભજીયા વધુ ક્રિસ્પી બને છે.
હવે એક મોટા વાસણમાં બટાકાની કતરણ નાખીને 2થી 3 વાર પાણીથી બરાબર ધોઈ લો. આમ કરવાથી બટાકામાં રહેલો વધારાનો સ્ટાર્ચ નીકળી જશે અને ભજીયા તળ્યા પછી વધુ કુરકુરા બનશે. ત્યારબાદ કતરણમાંથી બધું પાણી નિતારી લો અને હાથથી હળવેથી દબાવીને વધારાનું પાણી કાઢી નાખો.
હવે એક મોટા મિક્સિંગ બાઉલમાં બટાકાની કતરણ લો. તેમાં સમારેલી ડુંગળી, લીલાં મરચાં, છીણેલું આદુ, લસણ અને લીલાં ધાણા ઉમેરો. ત્યારબાદ લાલ મરચું પાવડર, ધાણાજીરું પાવડર, અજમો, આમચૂર પાવડર, ગરમ મસાલો, લીંબુનો રસ, સંચળ અને સ્વાદ અનુસાર મીઠું ઉમેરો. હવે હાથની મદદથી બધી સામગ્રીને બરાબર મિક્સ કરો, જેથી દરેક બટાકાની કતરણ પર મસાલાનું સરસ કોટિંગ થઈ જાય.
આ મિશ્રણને 2થી 3 મિનિટ માટે રહેવા દો. આ દરમિયાન ડુંગળી અને બટાકામાંથી થોડો ભેજ છૂટશે. હવે તેમાં બેસન, ચોખાનો લોટ અને એક મોટી ચમચી ગરમ તેલ ઉમેરો. બધી સામગ્રીને ફરીથી બરાબર મિક્સ કરો. ધ્યાન રાખો કે બેસન અને ચોખાનો લોટ વધારે ન નાખવો, માત્ર બટાકાની કતરણને બાંધવા જેટલો જ લોટ પૂરતો છે. જો હાથમાં થોડું મિશ્રણ લઈને દબાવવાથી તે એકસાથે બંધાઈ જાય તો સમજવું કે મિશ્રણ તૈયાર છે.
હવે કડાઈમાં તેલ ગરમ કરવા મૂકો. હાથને થોડા પાણીથી ભીના કરીને બટાકાના મિશ્રણનો થોડો ભાગ લો અને હળવા હાથે ગોળ આકાર આપો. તેલ બરાબર ગરમ થાય ત્યારે ભજીયા તેમાં નાખો. શરૂઆતમાં ગેસ મધ્યમથી થોડો તેજ રાખો અને ભજીયા નાખ્યા પછી ગેસ મધ્યમ કરી દો. વચ્ચે વચ્ચે હળવેથી ફેરવતા રહો, જેથી ભજીયા ચારે બાજુથી સરખા તળાય.
ભજીયા ગોલ્ડન બ્રાઉન અને એકદમ ક્રિસ્પી થાય ત્યાં સુધી તળી લો. ત્યારબાદ તેને ટિશ્યુ પેપર પર કાઢી લો. તૈયાર છે ગરમાગરમ સ્ટ્રીટ સ્ટાઈલ બટાટા લચ્છા ભજીયા. તેને લીલી ચટણી, લસણની ચટણી અથવા ટમેટા કેચઅપ સાથે ગરમાગરમ સર્વ કરો.