Harshit Rana Surgery Recovery: ભારતીય ફાસ્ટ બોલર હર્ષિત રાણાના ઘૂંટણની સર્જરી થઈ છે જેના કારણે T20 વર્લ્ડ કપમાં રમવાનું તેનું સપનું ચકનાચૂર થઈ ગયું છે. ડિફેન્ડિંગ ચેમ્પિયન ટીમ ઈન્ડિયાની પહેલી મેચના એક દિવસ પહેલા હર્ષિતને વોર્મ-અપ મેચ દરમિયાન ઈજા થઈ હતી. ઘૂંટણની ઈજાને કારણે મુંબઈમાં અમેરિકા સામે ભારતની પહેલી મેચના એક દિવસ પહેલા રાણાને ટીમમાંથી બહાર કરવામાં આવ્યો હતો. હવે, યુવા ફાસ્ટ બોલરે તેની ફિટનેસ વિશે અપડેટ શેર કર્યું છે.
હર્ષિત રાણાની સર્જરી સફળ રહી
રાણાએ ઇન્સ્ટાગ્રામ પર હોસ્પિટલના પલંગ પર પડેલો પોતાનો એક ફોટો પોસ્ટ કર્યો, જેમાં તેમણે થમ્બ્સ-અપ આપ્યું. તેણે કેપ્શન આપ્યું- સર્જરી સારી રહી, હવે ધ્યાન સ્વસ્થ થવા અને મને ગમતી વસ્તુઓ પર પાછા ફરવા પર છે.
ગયા અઠવાડિયે ડીવાય પાટિલ સ્ટેડિયમમાં દક્ષિણ આફ્રિકા સામેની પ્રેક્ટિસ મેચ દરમિયાન રાણાને ઘૂંટણમાં ઈજા થઈ હતી. તેણે ફક્ત એક ઓવર ફેંકી હતી જેમાં 16 રન આપ્યા હતા અને પછી તે મેદાનની બહાર લંગડાતો લંગડાતો જ ગયો હતો. ઘૂંટણની ઈજાને કારણે તે T20 વર્લ્ડ કપ 2026ની ટીમમાંથી બહાર થઈ ગયો હતો. તપાસમાં લેટરલ મેનિસ્કસ ઈજા હોવાનું બહાર આવ્યું હતું. મેડિકલ ટીમે તેને તાત્કાલિક સર્જરી કરાવવાની સલાહ આપી હતી અને તેણે પ્રક્રિયા કરાવી હતી.
દરમિયાન હર્ષિતની ઈજાને કારણે ભારતે છેલ્લી ઘડીએ સિનિયર ફાસ્ટ બોલર મોહમ્મદ સિરાજને બોલાવ્યો જે T20 વર્લ્ડ કપ માટે પસંદગી ન થયા બાદ જર્મની જવાની તૈયારી કરી રહ્યો હતો.
સિરાજે યુનાઇટેડ સ્ટેટ્સ સામેની શરૂઆતની મેચમાં શાનદાર પ્રદર્શન કર્યું, ત્રણ વિકેટ લીધી અને ટીમ ઇન્ડિયાની જીતમાં મહત્વપૂર્ણ યોગદાન આપ્યું. પ્રથમ બેટિંગ કરતા ભારતે નિર્ધારિત 20 ઓવરમાં 161 રન બનાવ્યા. જવાબમાં યુનાઇટેડ સ્ટેટ્સ ફક્ત 132 રન જ બનાવી શક્યું, જેના કારણે ભારતે 29 રનથી મેચ જીતી લીધી. જેનાથી તેમના અભિયાનની વિજયી શરૂઆત થઈ.