Shivam Dube Train Journey: ટીમ ઈન્ડિયાએ અમદાવાદમાં ન્યૂઝીલેન્ડને હરાવીને સતત બીજી વખત અને રેકોર્ડબ્રેક ત્રીજી વખત T20 વર્લ્ડ કપનું ટાઇટલ જીતીને ઈતિહાસ રચી દીધો છે. આ ભવ્ય જીત બાદ જ્યાં આખો દેશ જશ્નમાં ડૂબ્યો હતો અને સ્ટાર ખેલાડીઓનું એરપોર્ટ પર ભવ્ય સ્વાગત થઈ રહ્યું હતું, ત્યારે ફાઈનલના હીરો પૈકીના એક એવા શિવમ દુબેએ મુંબઈ સ્થિત પોતાના ઘરે પહોંચવા માટે એક એવું પગલું ભર્યું જે જાણીને સૌ કોઈ આશ્ચર્યચકિત થઈ ગયા છે.
ફ્લાઈટની ટિકિટ ન મળતા ટ્રેનનો સહારો લીધો
વર્લ્ડ કપ ફાઈનલમાં માત્ર 8 બોલમાં 25 રનની તોફાની ઇનિંગ રમીને ભારતની જીત નિશ્ચિત કરનાર શિવમ દુબે ફાઈનલ બાદ ફટાફટ ઘરે પહોંચવા માંગતો હતો. 'ઇન્ડિયન એક્સપ્રેસ'ના અહેવાલ મુજબ, અમદાવાદથી મુંબઈની તમામ ફ્લાઇટ્સ હાઉસફુલ હોવાને કારણે કોઈ ટિકિટ ઉપલબ્ધ નહોતી. પોતાના પરિવાર અને બે બાળકોને મળવાની આતુરતા એટલી હતી કે દુબેએ રાહ જોવાને બદલે ટ્રેનમાં જવાનું નક્કી કર્યું. જોકે, ટ્રેનમાં પણ ફર્સ્ટ-એસીમાં જગ્યા ન હોવાથી તેણે Third-AC કોચમાં ત્રણ ટિકિટ બુક કરાવી હતી.
ઓળખ છુપાવવા માસ્ક અને ટોપીનો સહારો
રેલવે સ્ટેશન પર ચાહકોની ભીડથી બચવા અને ઓળખ છુપાવવા માટે શિવમ દુબેએ માસ્ક અને ટોપી પહેરી હતી. ભીડ વચ્ચે પકડાઈ ન જવાય તે માટે તેણે પોતાની પત્ની અંજુમ અને મિત્રને પ્લેટફોર્મ પર આગળ મોકલ્યા હતા અને પોતે ટ્રેન ઉપડવાની માત્ર 5 મિનિટ પહેલા જ કોચમાં પ્રવેશ કર્યો હતો. ટ્રેનમાં ચઢતાની સાથે જ તે સીધો ઉપરની બર્થ (Upper Berth) પર જઈને સૂઈ ગયો હતો જેથી કોઈની નજર તેના પર ન પડે.
જ્યારે ટિકિટ ચેકર (TTE) આશ્ચર્યચકિત થઈ ગયા
મુસાફરી દરમિયાન જ્યારે TTE ટિકિટ ચેક કરવા આવ્યા, ત્યારે લિસ્ટમાં 'શિવમ દુબે' નામ જોઈને તેઓ અટકી ગયા હતા. તેમણે જ્યારે પૂછ્યું કે 'શું આ પેસેન્જર ક્રિકેટર શિવમ દુબે છે?', ત્યારે તેની પત્નીએ સુરક્ષાના કારણોસર ઓળખ છુપાવતા સ્પષ્ટ ઇનકાર કર્યો હતો. આખી રાત આ વર્લ્ડ ચેમ્પિયન ખેલાડી કોઈ પણ પ્રકારના વીઆઈપી પ્રોટોકોલ વગર સામાન્ય મુસાફરોની જેમ ઊંઘતો રહ્યો હતો.
પોલીસની મદદથી સુરક્ષિત ઘરે વાપસી
મુંબઈના બોરીવલી સ્ટેશન પર ઉતરતી વખતે ભીડ એકઠી ન થાય તે માટે દુબેએ અગાઉથી જ સ્થાનિક પોલીસનો સંપર્ક કર્યો હતો. પોલીસ અધિકારીઓ પણ એ જાણીને ચોંકી ગયા હતા કે આટલો મોટો સ્ટાર ખેલાડી ટ્રેનમાં મુસાફરી કરી રહ્યો છે. આખરે, પોલીસ સુરક્ષા હેઠળ તેને સ્ટેશનથી સુરક્ષિત રીતે તેના ઘરે પહોંચાડવામાં આવ્યો હતો.
દુબેએ બાદમાં જણાવ્યું હતું કે, ટાઇટલ જીત્યા બાદ તે તેના બાળકોને મળવા માટે એટલો ઉત્સુક હતો કે તે વધુ સમય ફ્લાઈટની રાહ જોઈ શકે તેમ નહોતો, તેથી તેણે આ સાહસિક નિર્ણય લીધો હતો.