IND vs SA ODI, Rohit Sharma: ભારત અને દક્ષિણ આફ્રિકા વચ્ચે એક વનડે શ્રેણી રમાઈ રહી છે. પહેલી મેચ રાંચીમાં રમાઈ હતી, જેમાં ટીમ ઈન્ડિયાએ શાનદાર જીત નોંધાવી હતી. હવે રાયપુરમાં રમાઈ રહેલી બીજી વનડેમાં ભારત અને દક્ષિણ આફ્રિકા એકબીજા સામે રમી રહ્યા છે. આ મેચમાં દક્ષિણ આફ્રિકાના કેપ્ટન ટેમ્બા બાવુમાએ ટોસ જીતીને પહેલા બોલિંગ કરવાનો નિર્ણય લીધો. આ સતત 20મી મેચ છે જેમાં ભારતીય ટીમ ટોસ હારી ગઈ છે.
પહેલા બેટિંગ માટે આમંત્રણ મળ્યા બાદ, રોહિત શર્મા અને યશસ્વી જયસ્વાલે મળીને ભારતીય ઇનિંગ્સની ધમાકેદાર શરૂઆત કરી. ઓપનિંગ જોડીએ માત્ર 4 ઓવરમાં 28 રન ફટકાર્યા. આ પછી, રોહિત શર્માએ 5મી ઓવરમાં સતત ત્રણ ચોગ્ગા ફટકારીને ઇતિહાસ રચ્યો છે.
14 રનમાં ઇતિહાસ રચાયો
હકીકતમાં રોહિત શર્માને પહેલી ચાર ઓવરમાં ફક્ત ત્રણ બોલ રમવાનો મોકો મળ્યો, જેમાં તેણે બે રન બનાવ્યા. જોકે, બીજી જ ઓવરમાં, રોહિતે ચોગ્ગાની હેટ્રિક ફટકારીને નોંધપાત્ર પ્રભાવ પાડ્યો. આ ચોગ્ગા સાથે, રોહિતે ઘરઆંગણે આંતરરાષ્ટ્રીય ક્રિકેટમાં 9000 રન પૂરા કર્યા હતા.
આ મેચ પહેલા રોહિતને 9000 રનનો આંકડો પૂર્ણ કરવા માટે ફક્ત નવ રનની જરૂર હતી. હવે રોહિત ઘરઆંગણે9000 રન બનાવનાર ચોથો ભારતીય બન્યો છે. આ પહેલા સચિન તેંડુલકર, વિરાટ કોહલી અને રાહુલ દ્રવિડે આ સિદ્ધિ મેળવી હતી.
રોહિતે પાંચમી ઓવરમાં નાંદ્રે બર્ગરને સતત ત્રીજી વખત ચાર ફટકારીને ભારતીય ભૂમિ પર સૌથી વધુ આંતરરાષ્ટ્રીય રન બનાવવાના મામલે રાહુલ દ્રવિડનો રેકોર્ડ તોડી નાખ્યો. હવે તે આંતરરાષ્ટ્રીય ક્રિકેટમાં ઘરઆંગણે ભારત માટે ત્રીજા ક્રમે સૌથી વધુ રન બનાવનાર ખેલાડીનો રેકોર્ડ ધરાવે છે.
ઘરઆંગણે સૌથી વધુ રન બનાવનારા ભારતીય બેટ્સમેન (ત્રણેય ફોર્મેટમાં)
સચિન તેંડુલકર - 14192
વિરાટ કોહલી - 12373
રોહિત શર્મા - 9005
રાહુલ દ્રવિડ - 9004
સળંગ ત્રણ ચોગ્ગા ફટકાર્યા બાદ રોહિત શર્મા સારા ફોર્મમાં દેખાતો હતો, પરંતુ તે નાન્દ્રે બર્ગરની ઓવરના પાંચમા બોલ પર આઉટ થઈ ગયો અને પેવેલિયન પાછો ફર્યો. આમ, રોહિતની ઇનિંગ્સનો અંત 14 રનના નજીવા સ્કોર સાથે થયો.