Priya Saroj Viral Video, KKR vs LSG IPL 2026: આઈપીએલ 2026 ની પ્રથમ રોમાંચક સુપર ઓવરમાં કોલકાતા નાઈટ રાઈડર્સ (KKR) એ લખનૌ સુપર જાયન્ટ્સ (LSG) સામે યાદગાર વિજય મેળવ્યો છે. આ જીતનો અસલી હીરો 'ફિનિશર' રિંકુ સિંહ રહ્યો હતો, જેની વિસ્ફોટક બેટિંગે હારેલી બાજી પલટી નાખી હતી. જોકે, મેદાન પર રિંકુના પરાક્રમની સાથે મેદાનની બહાર તેની મંગેતર અને મછલીશહરના સાંસદ પ્રિયા સરોજની પ્રતિક્રિયા પણ અત્યારે સોશિયલ મીડિયા પર ચર્ચાનું કેન્દ્ર બની છે.
પ્રિયા સરોજની પ્રતિક્રિયા વાયરલ
કોલકાતાની જીત બાદ રિંકુ સિંહની મંગેતર પ્રિયા સરોજનો એક વીડિયો વાયરલ થયો છે, જેમાં તે અત્યંત ઉત્સાહિત અને ખુશ જોવા મળી રહી છે. KKR ફ્રેન્ચાઇઝી દ્વારા જારી કરવામાં આવેલા ઇન્ટરવ્યુમાં પ્રિયાનો આ રોમાંચ અને ટીમ માટેનો જુસ્સો ચાહકોને ખૂબ પસંદ પડી રહ્યો છે. આખી મેચ દરમિયાન તે સ્ટેન્ડ્સમાં KKR માટે ચિયર કરતી જોવા મળી હતી.
ટાઇ બાદ સુપર ઓવર
લખનૌના અટલ બિહારી વાજપેયી એકાના સ્ટેડિયમમાં રમાયેલી આ મેચ અત્યંત રોમાંચક રહી હતી. પ્રથમ બેટિંગ કરતા KKR એ રિંકુ સિંહની અણનમ 83* રનની ઇનિંગની મદદથી 155 રન બનાવ્યા હતા. જવાબમાં લખનૌની ટીમે પણ 9 વિકેટ ગુમાવીને બરાબર 155 રન બનાવતા મેચ ટાઇ થઈ હતી. પરિણામે, વિજેતાનો નિર્ણય કરવા માટે સુપર ઓવરનો સહારો લેવો પડ્યો હતો, જેમાં અંતે કોલકાતાનો વિજય થયો હતો.
રિંકુ સિંહની 'વન મેન શો' ઇનિંગ્સ
જ્યારે રિંકુ સિંહ ક્રીઝ પર આવ્યો ત્યારે KKR ની સ્થિતિ અત્યંત નાજુક હતી. 10.5 ઓવર બાદ ટીમનો સ્કોર 5 વિકેટે 73 રન હતો. ત્યારબાદ 11મી ઓવરમાં અનુકુલ રોય અને 15મી ઓવરમાં રમનદીપ સિંહ પણ આઉટ થતા ટીમ 93 રનના સ્કોર પર 7 વિકેટ ગુમાવી ચુકી હતી.
મુશ્કેલ પરિસ્થિતિમાં રિંકુએ 42 બોલમાં 50 રન પૂરા કરીને સિઝનની બીજી અડધી સદી ફટકારી હતી. 19 ઓવરના અંતે KKR નો સ્કોર 133/7 હતો. અંતિમ ઓવરમાં રિંકુએ દિગ્વિજય રાઠોડના બોલ પર 4 ગગનચુંબી છગ્ગા ફટકારીને સ્કોર 150 ને પાર પહોંચાડ્યો હતો.
ફિલ્ડિંગમાં પણ રિંકુનો દબદબો
બેટિંગ ઉપરાંત રિંકુએ ફિલ્ડિંગમાં પણ અદભૂત પ્રદર્શન કર્યું હતું. તેણે એક જ મેચમાં કુલ 5 કેચ ઝડપ્યા હતા, જેમાં એઇડન માર્કરામ અને નિકોલસ પૂરન જેવા ખતરનાક બેટ્સમેનોના મહત્વના કેચ સામેલ હતા. રિંકુના આ ઓલરાઉન્ડ પ્રદર્શનને કારણે KKR પ્લેઓફની રેસમાં મજબૂત રીતે આગળ વધી રહ્યું છે.