LSG vs RR, IPL 2026: આઈપીએલ 2026 ની રોમાંચક મેચમાં બુધવારે રાજસ્થાન રોયલ્સે (RR) લખનૌ સુપર જાયન્ટ્સ (LSG) ને 40 રનથી પરાજય આપ્યો છે. લખનૌના એકાના સ્ટેડિયમ ખાતે રમાયેલી આ મેચમાં રાજસ્થાનની જીતનો હીરો અનુભવી ઓલરાઉન્ડર રવિન્દ્ર જાડેજા રહ્યો હતો. જાડેજાએ બેટ અને બોલ બંને વડે શાનદાર પ્રદર્શન કરીને ટીમને મહત્વની જીત અપાવી હતી.
બેટિંગ અને બોલિંગમાં જાડેજાનો જાદુ
રાજસ્થાન રોયલ્સે પ્રથમ બેટિંગ કરતા 20 ઓવરમાં 159/6 નો સ્કોર નોંધાવ્યો હતો. એક સમયે રાજસ્થાનની ટીમે માત્ર 77 રનમાં 5 વિકેટ ગુમાવી દીધી હતી, ત્યારે છઠ્ઠા નંબર પર બેટિંગ કરવા આવેલા જાડેજાએ મોરચો સંભાળ્યો હતો. તેણે 29 બોલમાં 43 રનની અણનમ ઈનિંગ રમી હતી, જેમાં 2 ચોગ્ગા અને 1 છગ્ગાનો સમાવેશ થાય છે.
ત્યારબાદ બોલિંગમાં પણ જાડેજાએ કરકસરયુક્ત સ્પેલ ફેંક્યો હતો. તેણે પોતાની 4 ઓવરમાં માત્ર 29 રન આપીને લખનૌના વિસ્ફોટક બેટ્સમેન નિકોલસ પૂરન (22) ની મહત્વની વિકેટ ઝડપી હતી. લખનૌની ટીમ 18 ઓવરમાં માત્ર 119 રન બનાવીને ઓલઆઉટ થઈ ગઈ હતી.
'મેં બરાબર એ જ કર્યું જે તેમણે કહ્યું હતું'
37 વર્ષીય રવિન્દ્ર જાડેજાને તેના ઓલરાઉન્ડ પ્રદર્શન બદલ 'પ્લેયર ઓફ ધ મેચ' જાહેર કરવામાં આવ્યો હતો. એવોર્ડ સ્વીકારતી વખતે જાડેજા ભાવુક જણાયો હતો અને તેણે આ એવોર્ડ ગુજરાતના શિક્ષણ મંત્રી અને પોતાની પત્ની રીવાબા જાડેજાને સમર્પિત કર્યો હતો.
જાડેજાએ મેચ બાદ જણાવ્યું હતું કે, 'પ્લેયર ઓફ ધ મેચ બનવું અને ટીમને જીતાડવી એ અદભૂત લાગણી છે. હું આ એવોર્ડ રીવાબાને સમર્પિત કરવા માંગુ છું. તેમણે ગઈકાલે જ મને કહ્યું હતું કે હું આજે સારું પ્રદર્શન કરીશ, અને મેં બરાબર તે જ કર્યું જે તેમણે કહ્યું હતું.'
પિચના મિજાજ અને વ્યૂહરચના અંગે ખુલાસો
એકાના સ્ટેડિયમની પિચ અંગે વાત કરતા જાડેજાએ કહ્યું કે, 'વિકેટ પર બેટિંગ કરવી સરળ નહોતી કારણ કે બોલ સીમ અને સ્વિંગ થઈ રહ્યો હતો. મારો હેતુ માત્ર લાંબા સમય સુધી ક્રિઝ પર ટકી રહેવાનો હતો. ટી20 માં અંતિમ ઓવરોમાં મેચ ગમે ત્યારે પલટાઈ શકે છે.' નિકોલસ પૂરનની વિકેટ અંગે તેણે ઉમેર્યું કે, 'બોલ પિચ પર થોડો પકડીને આવતો હતો, તેથી મેં ધીમો બોલ નાખવાનો નિર્ણય કર્યો જે સફળ રહ્યો.'
ભાગીદારીએ જીતનો પાયો નાખ્યો
લખનૌના બોલરો મોહમ્મદ શમી અને મોહસીન ખાનની ધારદાર બોલિંગ સામે રાજસ્થાનની ટોચની બેટિંગ લાઇનઅપ સતત ત્રીજી મેચમાં નિષ્ફળ રહી હતી. જોકે, જાડેજાએ ડોનોવન ફેરેરા (20) સાથે છઠ્ઠી વિકેટ માટે 33 રન અને શુભમ દુબે (અણનમ 19) સાથે સાતમી વિકેટ માટે 49 રનની અતૂટ ભાગીદારી કરીને ટીમને સન્માનજનક સ્કોર સુધી પહોંચાડી હતી.
યશસ્વી જયસ્વાલ (22), રિયાન પરાગ (20) અને શિમરોન હેટમાયર (22) એ સારી શરૂઆત કરી હતી પરંતુ તેઓ તેને મોટા સ્કોરમાં બદલી શક્યા નહોતા. જ્યારે યુવા ખેલાડી વૈભવ સૂર્યવંશી માત્ર 8 રન બનાવી આઉટ થયો હતો.