Kavya Maran Wedding: ભારતીય બિઝનેસ જગત અને એન્ટરટેઇનમેન્ટ ઇન્ડસ્ટ્રીના સૌથી ચર્ચિત વિવાહ આગામી દિવસોમાં યોજાવા જઈ રહ્યા છે. IPL ફ્રેન્ચાઇઝી સનરાઇઝર્સ હૈદરાબાદ (SRH)ની ચર્ચિત CEO કાવ્યા મારન અને દક્ષિણ ભારતીય સિનેમાના સુપરહિત મ્યુઝિક કંપોઝર અનિરુદ્ધ રવિચંદર ટૂંક સમયમાં લગ્નગ્રંથિથી જોડાશે. આ હાઇ-પ્રોફાઇલ અને રોયલ ડેસ્ટિનેશન વેડિંગ માટે યુરોપના સુંદર દેશ ગ્રીસની પસંદગી કરવામાં આવી છે.
કાવ્યા મારન સન ગ્રૂપના ઉત્તરાધિકારી હોવાની સાથે SRH ફ્રેન્ચાઇઝીનું નેતૃત્વ કરે છે, જ્યારે અનિરુદ્ધ ભારતીય ફિલ્મ ઇન્ડસ્ટ્રીના સૌથી મોંઘા અને ડિમાન્ડમાં રહેતા સંગીતકારોમાંથી એક છે. બિઝનેસ અને ગ્લેમરની આ જોડીના લગ્નને લઈને બંનેના ચાહકોમાં ભારે ઉત્સાહ જોવા મળી રહ્યો છે.
PM મોદીથી લઈને સ્ટાટ્સના અગ્રણીઓને નિમંત્રણ
આ હાઇ-પ્રોફાઇલ લગ્ન પ્રસંગમાં દેશ-વિદેશની ટોચની હસ્તીઓનો જમાવડો જોવા મળશે. સન ગ્રૂપના સ્થાપક અને કાવ્યાના પિતા કલાનિધિ મારને આ વિશેષ ઉત્સવ માટે વડાપ્રધાન નરેન્દ્ર મોદી સહિત દેશના મુખ્યમંત્રીઓ, ઉદ્યોગપતિઓ, ક્રિકેટ જગતના સિતારાઓ અને સિનેમાના દિગ્ગજોને વ્યક્તિગત રીતે આમંત્રણ પાઠવ્યું છે.
ચર્ચા મુજબ, મહેમાનોને પાઠવવામાં આવેલી શાહી નિમંત્રણ પત્રિકા (કંકોત્રી) અત્યંત આકર્ષક અને વિશિષ્ટ ડિઝાઇન ધરાવે છે, જેની સરેરાશ કિંમત આશરે ₹20,000 સુધીની માનવામાં આવી રહી છે.
ડેસ્ટિનેશન વેડિંગ માટે ગ્રીસની પસંદગી શા માટે?
ખાનગી રિસોર્ટ અને ટાપુઓ માટે જાણીતા ગ્રીસના નેચરલ લોકેશન્સ આ રોયલ વિવાહના સાક્ષી બનશે. સફેદ ઇમારતો, દરિયાકિનારાની પ્રાકૃતિક સુંદરતા અને સંપૂર્ણ પ્રાઇવસી આપતા વિલાના કારણે આ હાઇ-પ્રોફાઇલ જોડીએ લગ્ન માટે ગ્રીસ પર પસંદગીનો કળશ ઢોળ્યો છે.
કાવ્યા મારન: 25,000 કરોડના સામ્રાજ્યના વારસદાર
સન નેટવર્કના સ્થાપક કલાનિધિ મારનની પુત્રી કાવ્યા મારને ચેન્નઈની સ્ટેલા મોરિસ કોલેજમાંથી ગ્રેજ્યુએશન (BCom) અને ન્યૂયોર્ક યુનિવર્સિટીની વિખ્યાત સ્ટર્ન સ્કૂલ ઑફ બિઝનેસમાંથી MBAની પદવી મેળવી છે.
નેટવર્થ અને પોર્ટફોલિયો: કાવ્યાની વ્યક્તિગત નેટવર્થ આશરે ₹409 કરોડ છે, પરંતુ તેઓ ₹25,000 કરોડની માર્કેટ કેપ ધરાવતા સમગ્ર 'સન ગ્રૂપ' અને ₹18,000 કરોડની બ્રાન્ડ વેલ્યુ ધરાવતી IPL ટીમ સનરાઇઝર્સ હૈદરાબાદનું સંચાલન સંભાળે છે.
અનિરુદ્ધ રવિચંદર: ભારતીય સિનેમાનો સૌથી મોંઘો સંગીતકાર
'વાય ધીસ કોલાવેરી ડી' ગીતથી વૈશ્વિક સ્તરે લોકપ્રિય થયેલા અનિરુદ્ધ રવિચંદરે દક્ષિણ ભારતથી લઈને બોલિવૂડની 'જવાન' જેવી બ્લોકબસ્ટર ફિલ્મોમાં મ્યુઝિક આપ્યું છે. વર્તમાનમાં અનિરુદ્ધ દરેક ફિલ્મ કે પ્રોજેક્ટ માટે ₹8 થી 10 કરોડ ચાર્જ કરે છે, જે તેમને દેશના સૌથી મોંઘા કંપોઝર બનાવે છે.
અનિરુદ્ધ મ્યુઝિક ઉપરાંત સ્ટાર્ટઅપ સેક્ટરમાં પણ સક્રિય છે. તેઓ ફિલ્ટર કોફી બ્રાન્ડ VS Mani & Co. ના કો-ફાઉન્ડર તેમજ ટકીલા બ્રાન્ડ Loca Loka ના કો-ક્રિએટર છે. તેમની અંદાજિત નેટવર્થ ₹50 કરોડ જેટલી છે.