Ishan Kishan Video, SRH vs CSK IPL 2026: ઇન્ડિયન પ્રીમિયર લીગ (IPL) 2026ની રોમાંચક મેચમાં સનરાઇઝર્સ હૈદરાબાદે (SRH) ચેન્નાઈ સુપર કિંગ્સને (CSK) 5 વિકેટે હરાવીને પ્લેઓફમાં પોતાનું સ્થાન પાકું કરી લીધું છે. ચેન્નાઈના હોમ ગ્રાઉન્ડ ચેપોક સ્ટેડિયમ પર રમાયેલી આ 'કરો કે મરો' મેચમાં હૈદરાબાદની જીતનો હીરો વિકેટકીપર બેટ્સમેન ઇશાન કિશન રહ્યો હતો. જોકે, મેચ પૂરી થયા બાદ ઇશાન કિશનના એક વિવાદાસ્પદ સેલિબ્રેશનનો વીડિયો સોશિયલ મીડિયા પર વાયરલ થતાં ક્રિકેટ ચાહકોમાં ભારે ગુસ્સો જોવા મળી રહ્યો છે.
ઇશાન કિશનની વિસ્ફોટક ઇનિંગ અને વાયરલ વીડિયોનો વિવાદ
આ મેચમાં પ્રથમ બેટિંગ કરતા ચેન્નાઈ સુપર કિંગ્સે નિર્ધારિત 20 ઓવરમાં 7 વિકેટ ગુમાવીને 180 રન બનાવ્યા હતા. 181 રનના લક્ષ્યનો પીછો કરવા ઉતરેલી સનરાઇઝર્સ હૈદરાબાદ માટે ઇશાન કિશને શાનદાર બેટિંગનું પ્રદર્શન કર્યું હતું. તેમણે માત્ર 47 બોલમાં 7 ચોગ્ગા અને 2 છગ્ગાની મદદથી 70 રનની વિસ્ફોટક ઇનિંગ રમી હતી, જેના કારણે હૈદરાબાદે 1 ઓવર બાકી રાખીને મેચ જીતી લીધી હતી.
Ishan Kishan 🤷 pic.twitter.com/7gXIZO53zS
— CricketGully (@thecricketgully) May 18, 2026
મેચ પૂરી થયા બાદ ઇશાન કિશને ચેપોક સ્ટેડિયમના સ્થાનિક દર્શકો તરફ ફરીને જોરથી સીટી વગાડી હતી, જે CSK ચાહકોના પ્રખ્યાત સ્લોગન 'વ્હિસલ પોડુ' ની નકલ માનવામાં આવી રહી છે. ત્યારબાદ તેણે પોતાના હાથથી 'ઘર' (Home) જેવો આકાર બનાવીને ચાહકોને સ્ટેડિયમ છોડીને ઘરે જતા રહેવાનો ઇશારો કર્યો હતો. આ વીડિયો વાયરલ થતાં જ ક્રિકેટ જગતમાં હોબાળો મચી ગયો છે. ઘણા ચાહકો તેને CSKના સમર્થકોની મજાક અને ટ્રોલિંગ ગણાવીને ઈશાન પર ગુસ્સો ઠાલવી રહ્યા છે, જ્યારે કેટલાક યુઝર્સ આ સેલિબ્રેશનને રમતનો એક ભાગ ગણાવીને ઈશાનના સમર્થનમાં પણ આવ્યા છે.
ચેન્નાઈ સુપર કિંગ્સ માટે મુશ્કેલ સ્થિતિ
આ હાર સાથે જ 5 વખતની ચેમ્પિયન ચેન્નાઈ સુપર કિંગ્સ માટે પ્લેઓફના સમીકરણો અત્યંત જટિલ બની ગયા છે. CSKની ટીમ હાલમાં 13 મેચોમાં 12 પોઈન્ટ સાથે ટેબલમાં છઠ્ઠા સ્થાને છે. જો ટીમ પોતાની છેલ્લી લીગ મેચ જીતી પણ જાય, તો પણ તે મહત્તમ 14 પોઈન્ટ સુધી જ પહોંચી શકશે. દિલ્હી કેપિટલ્સની સ્થિતિ પણ આવી જ છે, જે વધુમાં વધુ 14 પોઈન્ટ મેળવી શકે છે.
બીજી તરફ, રાજસ્થાન રોયલ્સ અને પંજાબ કિંગ્સ પાસે પ્લેઓફમાં ક્વોલિફાય થવાની તકો વધુ મજબૂત દેખાઈ રહી છે:
રાજસ્થાન પાસે હાલમાં 12 પોઈન્ટ છે અને તેની 2 મેચ બાકી છે. જો તેઓ બંને મેચ જીતશે તો 16 પોઈન્ટ સાથે આસાનીથી ક્વોલિફાય થશે, પરંતુ 1 મેચ હારવાની સ્થિતિમાં તેઓ પણ 14 પોઈન્ટ પર અટકી જશે.
પંજાબની ટીમ 13 મેચમાં 13 પોઈન્ટ ધરાવે છે. પંજાબે પ્લેઓફમાં પહોંચવા માટે આગામી મેચ કોઈપણ ભોગે જીતવી પડશે અને સાથે જ એવી પ્રાર્થના કરવી પડશે કે રાજસ્થાન રોયલ્સ પોતાની બાકીની મેચોમાંથી ઓછામાં ઓછી 1 મેચ હારી જાય.