Obstructing the Field Dismissals List: IPL 2026 માં રવિવારે લખનૌ સુપર જાયન્ટ્સ (LSG) અને કોલકાતા નાઈટ રાઈડર્સ (KKR) વચ્ચે રમાયેલી મેચમાં એક દુર્લભ ઘટના જોવા મળી હતી. KKR ના યુવા બેટ્સમેન અંગક્રિશ રઘુવંશીને 'ઓબસ્ટ્રક્ટિંગ ધ ફિલ્ડ' (ફિલ્ડિંગમાં અવરોધ) કરવા બદલ આઉટ જાહેર કરવામાં આવ્યો હતો. આ સાથે જ અંગક્રિશ IPL ઈતિહાસમાં આ રીતે આઉટ થનારો માત્ર 4 ચોથો બેટ્સમેન બન્યો છે.
કેવી રીતે આઉટ થયો અંગક્રિશ રઘુવંશી?
લખનૌના એકાના ક્રિકેટ સ્ટેડિયમમાં રમાયેલી આ મેચમાં KKR ની ઇનિંગ્સની 5મી ઓવરના અંતિમ બોલ પર આ ઘટના બની હતી. બોલર પ્રિન્સ યાદવના બોલ પર રઘુવંશીએ મિડ-ઓન તરફ શોટ રમીને રન લેવા માટે દોડ્યો હતો. જોકે, સામેના છેડે ઉભેલા કેમેરોન ગ્રીને તેને પાછો મોકલ્યો હતો.
અંગક્રિશ જ્યારે ક્રીઝમાં પાછો ફરવા માટે ડાઇવ લગાવી રહ્યો હતો, ત્યારે ફિલ્ડરનો થ્રો સીધો તેના પગ પર વાગ્યો હતો. લખનૌના કેપ્ટન ઋષભ પંત અને ટીમના ખેલાડીઓએ તુરંત અપીલ કરી હતી. થર્ડ અમ્પાયરે વિઝ્યુઅલ્સ તપાસ્યા બાદ અંગક્રિશને જાણીજોઈને ફિલ્ડિંગમાં અવરોધ લાવવા બદલ આઉટ જાહેર કર્યો હતો.
IPL ઈતિહાસમાં આ રીતે આઉટ થનારા 4 બેટ્સમેનોની યાદી
યુસુફ પઠાણ (2013): IPL ઈતિહાસમાં 'ઓબસ્ટ્રક્ટિંગ ધ ફિલ્ડ' આઉટ થનારો પ્રથમ ખેલાડી યુસુફ પઠાણ હતો. વર્ષ 2013 માં KKR તરફથી રમતા પુણે વોરિયર્સ ઇન્ડિયા સામે તેણે આ રીતે વિકેટ ગુમાવી હતી. તે મેચમાં તેણે 44 બોલમાં 72 રન બનાવ્યા હતા.
અમિત મિશ્રા (2019): વર્ષ 2019 માં દિલ્હી ડેરડેવિલ્સ (હવે દિલ્હી કેપિટલ્સ) તરફથી રમતા અમિત મિશ્રા સનરાઈઝર્સ હૈદરાબાદ સામે આ રીતે આઉટ થયો હતો. વિશાખાપટ્ટનમમાં રમાયેલી આ મેચમાં મિશ્રાએ 2 બોલમાં 1 રન બનાવ્યો હતો.
રવિન્દ્ર જાડેજા (2024): ચેન્નાઈ સુપર કિંગ્સના સ્ટાર ઓલરાઉન્ડર રવિન્દ્ર જાડેજા વર્ષ 2024 માં રોયલ ચેલેન્જર્સ બેંગ્લુરુ સામે આ રીતે આઉટ થયો હતો. તે ઇનિંગમાં તેણે 6 બોલમાં 5 રન બનાવ્યા હતા.
અંગક્રિશ રઘુવંશી (2026): રવિવારે લખનૌ સુપર જાયન્ટ્સ સામેની મેચમાં આ યાદીમાં જોડાનાર અંગક્રિશ ચોથો ખેલાડી બન્યો છે.
ક્રિકેટના નિયમો મુજબ, જો કોઈ બેટ્સમેન જાણીજોઈને પોતાના શરીર અથવા બેટ વડે ફિલ્ડરના થ્રોને રોકવાનો પ્રયાસ કરે અથવા ફિલ્ડિંગમાં અડચણ ઉભી કરે, તો તેને આ નિયમ હેઠળ આઉટ આપી શકાય છે.