Indian cricketer played for Pakistan: ભારત અને પાકિસ્તાન વચ્ચે જ્યારે પણ ક્રિકેટ મેચ રમાય છે, ત્યારે મેદાન પર એક અલગ જ રોમાંચ અને જબરદસ્ત જંગ જોવા મળે છે. આ બંને ટીમો જ્યારે મેદાન પર ઉતરે છે ત્યારે તેમની સાથે માત્ર ક્રિકેટ જ નહીં, પરંતુ ચાહકોની અનેક ભાવનાઓ પણ જોડાયેલી હોય છે.
પાકિસ્તાન માટે રમનાર ભારતીય ક્રિકેટર
ભારત-પાકિસ્તાનના સંબંધોમાં રહેલા તણાવને કારણે આ મેચો વધુ ખાસ બની જાય છે. જોકે, ક્રિકેટના ઈતિહાસમાં 3 એવા ખેલાડીઓ પણ થયા છે, જેઓ પહેલા ટીમ ઈન્ડિયા માટે અને પછી પાકિસ્તાનની જર્સી પહેરીને કટ્ટર હરીફ દેશ માટે ક્રિકેટ રમ્યા છે. આવો જાણીએ એ ત્રણ ક્રિકેટરો વિશે જેમણે આ અનોખો રેકોર્ડ બનાવ્યો છે:
1. અબ્દુલ હફીઝ કરદાર (Abdul Hafeez Kardar)
અબ્દુલ હફીઝ કરદાર એવા ત્રણ ખેલાડીઓમાંથી એક છે જેમણે પહેલા ભારત માટે અને પછી પાકિસ્તાન માટે પણ મેદાનમાં ઉતરીને ક્રિકેટ રમી હતી. અબ્દુલ કરદારનું ભારત અને પાકિસ્તાન બંને ટીમમાં મોટું યોગદાન છે. તેમણે ટીમ ઈન્ડિયા માટે 3 ટેસ્ટ મેચ રમી અને ત્યારબાદ તેઓ પાકિસ્તાન માટે રમતા જોવા મળ્યા હતા.
'ફાધર ઓફ પાકિસ્તાન ક્રિકેટ'
પાકિસ્તાન ક્રિકેટમાં અભૂતપૂર્વ યોગદાનને કારણે અબ્દુલ કરદારને 'ફાધર ઓફ પાકિસ્તાન ક્રિકેટ' તરીકે ઓળખવામાં આવે છે. અબ્દુલ કરદારે વર્ષ 1952માં પાકિસ્તાન ટીમની કપ્તાની પણ સંભાળી હતી. તેમણે પાકિસ્તાન માટે કુલ 23 ટેસ્ટ મેચ રમી હતી. સમગ્ર કરિયરમાં આ ખેલાડીએ 26 મેચ રમીને 927 રન બનાવ્યા, જેમાં 5 અર્ધસદીનો સમાવેશ થાય છે.
2. અમીર ઈલાહી (Amir Elahi)
આ અનોખા લિસ્ટમાં બીજું નામ અમીર ઈલાહીનું છે, જેઓ પહેલા ભારતીય ટીમ માટે રમ્યા અને પછી પાકિસ્તાન ચાલ્યા ગયા હતા. અમીર ઈલાહીએ વર્ષ 1947માં ટીમ ઈન્ડિયા માટે ટેસ્ટ ક્રિકેટમાં ડેબ્યૂ કર્યું હતું.
ત્યારબાદ પાકિસ્તાન ગયા પછી અમીર ઈલાહીએ ત્યાંની ટીમનું પ્રતિનિધિત્વ કર્યું હતું. તેમણે પોતાના કરિયરમાં કુલ 6 ટેસ્ટ મેચ રમી હતી, જેમાંથી 1 મેચ ભારત માટે અને 5 મેચ પાકિસ્તાન માટે રમી હતી.
3. ગુલ મોહમ્મદ (Gul Mohammad)
ગુલ મોહમ્મદનું નામ પણ આ ઐતિહાસિક યાદીમાં ગર્વથી સામેલ છે. તેમણે વર્ષ 1946 થી 1955 વચ્ચે ભારતીય ક્રિકેટ ટીમ માટે 8 ટેસ્ટ મેચ રમી હતી.
ત્યારબાદ વર્ષ 1956માં ગુલ મોહમ્મદે પાકિસ્તાન માટે પોતાનું ડેબ્યૂ કર્યું અને ઓસ્ટ્રેલિયા સામે મુકાબલો રમ્યો હતો. ગુલ મોહમ્મદે પોતાના કરિયરમાં કુલ 9 મેચ રમી હતી, જે દરમિયાન તેમણે 205 રન બનાવ્યા હતા.
આ ત્રણ ઐતિહાસિક ખેલાડીઓએ બંને પાડોશી દેશોની જર્સી પહેરીને મેદાનમાં ઉતરવાનું બહુમાન મેળવ્યું છે.