IND vs WI 1st T20 Playing XI: ભારત અને વેસ્ટ ઈન્ડીઝ વચ્ચે આગામી 6 ઓક્ટોબર, મંગળવારથી પાંચ મેચની T20I સીરિઝની પ્રથમ મેચ લખનઉના ભારત રત્ન શ્રી અટલ બિહારી વાજપેયી એકાના ક્રિકેટ સ્ટેડિયમ ખાતે રમાશે. આ મેચમાં ફાસ્ટ બોલર અર્શદીપ સિંહ ભારતીય ટીમની પ્લેઈંગ-11 માં પુનરાગમન કરી શકે છે. જાણો ભારતીય સંભવિત પ્લેઈંગ 11...
અર્શદીપ સિંહની વાપસી અને બુમરાહને આરામ
આ પણ વાંચો
અર્શદીપ સિંહે 22 સપ્ટેમ્બરે સાનો ખાતે ભારત અને જાપાન વચ્ચે રમાયેલી T20I મેચ રમી હતી, પરંતુ વરસાદના કારણે 5-5 ઓવરની કરાયેલી આ મેચમાં તેમને બોલિંગ કરવાની તક મળી ન હતી. T20I ફોર્મેટમાં ભારત તરફથી સૌથી વધુ વિકેટ ઝડપનાર બોલર હોવા છતાં, એશિયન ગેમ્સ 2026 માં શ્રીલંકા અને પાકિસ્તાન સામેની મેચમાં તેમને પ્લેઈંગ-11 માંથી બહાર રાખવામાં આવ્યા હતા.
એશિયન ગેમ્સ 2026 મેન્સ ક્રિકેટ સેમિફાઈનલ અને ફાઈનલમાં જસપ્રીત બુમરાહે ભારતના પેસ એટેકનું નેતૃત્વ કર્યું હતું, પરંતુ વેસ્ટ ઈન્ડીઝ સામેની સિરીઝ માટે તેમને આરામ આપવામાં આવ્યો છે. જસપ્રીત બુમરાહની ગેરહાજરીમાં અર્શદીપ પ્લેઈંગ-11 માં વાપસી કરશે, અને સાથે જ મયંક યાદવ અથવા પ્રિન્સ યાદવમાંથી કોઈ એકને સ્થાન મળશે. દિલ્હીના ઝડપી બોલર મયંક અને પ્રિન્સ છેલ્લે જુલાઈ 2026 માં હરારે સ્પોર્ટ્સ ક્લબ ખાતે ઝિમ્બાબ્વે સામે ભારત માટે T20I રમ્યા હતા.
કુલદીપ યાદવનું કમબેક અને રવિ બિશ્નોઈ આઉટ
કુલદીપ યાદવ એશિયન ગેમ્સ 2026 મેન્સ ટીમનો હિસ્સો નહોતા, પરંતુ તેમણે વેસ્ટ ઈન્ડીઝ સામે ત્રણ વન-ડે મેચ રમીને સાત વિકેટ ઝડપી હતી. ગયા સપ્તાહના આ શાનદાર પ્રદર્શનના આધારે કાનપુરના આ સ્પિનરને રવિ બિશ્નોઈના સ્થાને પ્રથમ T20I માં પ્લેઈંગ ઈલેવનમાં સ્થાન મળવાની પૂરી શક્યતા છે.
બીજી તરફ, રવિ બિશ્નોઈએ 3 ઓક્ટોબર, શનિવારના રોજ પાકિસ્તાન સામે એશિયન ગેમ્સ 2026 ની ફાઈનલમાં રમતા પોતાની 3 ઓવરમાં એક પણ વિકેટ લીધા વગર 44 રન આપ્યા હતા. વોશિંગ્ટન સુંદર અને જસપ્રીત બુમરાહ એશિયન ગેમ્સની પ્લેઈંગ ઈલેવનમાં હતા, પરંતુ વેસ્ટ ઈન્ડીઝસિરીઝ માટે તેમને આરામ અપાતા ટીમ ઈન્ડિયાને બે ફેરફારો કરવા પડશે.
સંજુ સેમસનનું પત્તું કપાશે? વૈભવ સૂર્યવંશીનું ડેબ્યૂ
બેટિંગ વિભાગમાં વિકેટકીપર-બેટ્સમેન સંજુ સેમસન પોતાનું સ્થાન ગુમાવી શકે છે. સેમસને જાપાનમાં ભારત માટે ત્રણ T20I મેચ રમી હતી, જેમાં તેઓ માત્ર 9, 7 અને 2 રન જ બનાવી શક્યા હતા. તેની સામે બિહારના 15 વર્ષીય ડાબોડી બેટ્સમેન વૈભવ સૂર્યવંશીએ એશિયન ગેમ્સની સેમિફાઈનલમાં 21 બોલમાં 38 રન અને ફાઈનલમાં 15 રન બનાવ્યા હતા. આ યુવા ખેલાડી મંગળવારે પ્રથમ T20I દરમિયાન ભારતમાં પોતાનું આંતરરાષ્ટ્રીય ડેબ્યુ કરી શકે છે.
સંજુ સેમસનના સ્થાને ભારત એક વધારાના બોલર અથવા ઓલરાઉન્ડરને રમાડી શકે છે, જેનાથી નીતિશ કુમાર રેડ્ડી માટે રસ્તો ખુલે છે. આંધ્રપ્રદેશના આ બેટિંગ ઓલરાઉન્ડરને એશિયન ગેમ્સની ટીમમાંથી પાછા ખેંચીને વેસ્ટ ઈન્ડીઝ સામે બે વન-ડે રમાડવામાં આવ્યા હતા. બંને વન-ડેમાં બેટ અને બોલથી ખાસ પ્રદર્શન ન કરવા છતાં, ભવિષ્યની તૈયારીના ભાગરૂપે ટીમ મેનેજમેન્ટ તેમને વધુ તકો આપી શકે છે.
શ્રેયસ અય્યરની આગેવાનીમાં અન્ય ખેલાડીઓ યથાવત
ટીમ ઈન્ડિયામાં કેપ્ટન શ્રેયસ અય્યરની આગેવાની સાથે અભિષેક શર્મા, ઈશાન કિશન, તિલક વર્મા, અક્ષર પટેલ અને શિવમ દુબે પ્લેઈંગ ઈલેવનમાં પોતાનું સ્થાન જાળવી રાખશે તે નિશ્ચિત છે.
WI સામે પ્રથમ T20I માટે ભારતની સંભવિત પ્લેઈંગ-XI
વૈભવ સૂર્યવંશી, અભિષેક શર્મા, ઈશાન કિશન (વિકેટકીપર), શ્રેયસ અય્યર (કેપ્ટન), તિલક વર્મા, શિવમ દુબે, અક્ષર પટેલ, નીતિશ કુમાર રેડ્ડી, કુલદીપ યાદવ, અર્શદીપ સિંહ, મયંક યાદવ.