Shafali Sharma, IND W vs SL W: વિશાખાપટ્ટનમના ACA-VDCA સ્ટેડિયમમાં રમાયેલી બીજી T20I મેચમાં ભારતીય મહિલા ક્રિકેટ ટીમે શ્રીલંકા સામે 7 વિકેટે ભવ્ય વિજય મેળવ્યો છે. આ જીતની સૌથી મોટી સ્ટાર યુવા ઓપનર શેફાલી વર્મા રહી હતી, જેણે માત્ર ભારતને મેચ જ ન જીતાડી પરંતુ દિગ્ગજ ખેલાડીઓને પાછળ છોડીને એક ખાસ રેકોર્ડ પણ પોતાના નામે કર્યો છે. શેફાલીએ આ મેચમાં 69 રનની અણનમ ઇનિંગ રમીને આ સિદ્ધિ હાંસલ કરી હતી.
સ્મૃતિ મંધાના અને દીપ્તિ શર્માને છોડી પાછળ
આ મેચમાં તેના શાનદાર પ્રદર્શન બદલ શેફાલી વર્માને 'પ્લેયર ઓફ ધ મેચ' (POTM) જાહેર કરવામાં આવી હતી. આ એવોર્ડ મેળવવાની સાથે જ તેના નામે એક મોટી સિદ્ધિ નોંધાઈ છે, કારણ કે આ તેના કરિયરનો 8મો POTM એવોર્ડ હતો. આ સાથે તેણે સ્મૃતિ મંધાના અને દીપ્તિ શર્મા (બંનેના નામે 7-7 એવોર્ડ) ના રેકોર્ડને તોડી નાખ્યો છે. હવે ભારત માટે T20માં સૌથી વધુ વખત 'પ્લેયર ઓફ ધ મેચ' બનવાના મામલે તે માત્ર મિતાલી રાજ (12) અને હરમનપ્રીત કૌર (11) થી પાછળ છે.
આ પણ વાંચો
શેફાલી વર્માની તોફાની ઇનિંગ
129 રનના લક્ષ્યાંકનો પીછો કરવા ઉતરેલી ભારતીય ટીમની શરૂઆત ધમાકેદાર રહી હતી. હરિયાણાની રહેવાસી શેફાલી વર્માએ શ્રીલંકન બોલરોની જોરદાર ધોલાઈ કરી હતી અને મેદાનના દરેક ખૂણે શૉટ્સ ફટકાર્યા હતા. તેણે માત્ર 11.5 ઓવરમાં જ મેચ પૂરી કરી દીધી હતી. શેફાલીએ પોતાની અણનમ 69 રનની ઇનિંગમાં 11 ચોગ્ગા અને 1 છગ્ગો ફટકાર્યો હતો. આ દરમિયાન તેણે સ્મૃતિ મંધાના (14) સાથે 29 રન, જેમીમા રોડ્રિગ્સ (26) સાથે 58 રન અને કેપ્ટન હરમનપ્રીત કૌર (10) સાથે 41 રનની મહત્વની ભાગીદારી કરી હતી.
ભારતીય બોલરોનું શાનદાર પ્રદર્શન
બેટિંગ પહેલા ભારતીય બોલરોએ શ્રીલંકાને મોટો સ્કોર કરતા રોકવામાં સફળતા મેળવી હતી. સ્પિનર વૈષ્ણવી શર્મા અને શ્રી ચરણીએ 2-2 વિકેટ ઝડપી હતી, જ્યારે ક્રાંતિ ગૌડ અને સ્નેહ રાણાએ 1-1 વિકેટ લઈને વિરોધી ટીમ પર દબાણ જાળવી રાખ્યું હતું. આ જીત સાથે ભારતે પાંચ મેચોની શ્રેણીમાં 2-0 થી લીડ મેળવી લીધી છે. હવે શ્રેણીની આગામી ત્રણ મેચો તિરુવનંતપુરમમાં રમાશે. જો કેપ્ટન હરમનપ્રીત કૌરની સેના આગામી ત્રણ મેચમાંથી એક પણ મેચ જીતી જશે, તો શ્રેણી ભારત પોતાના નામે કરી લેશે.