IND vs SA T20 World Cup 2026: ટી20 વર્લ્ડ કપ 2026 ના સુપર 8 રાઉન્ડના 43માં મુકાબલામાં ભારતને દક્ષિણ આફ્રિકા સામે 76 રને કારમી હારનો સામનો કરવો પડ્યો છે. અમદાવાદના નરેન્દ્ર મોદી સ્ટેડિયમમાં રમાયેલી આ મેચમાં રનની દ્રષ્ટિએ ભારતની આ વર્લ્ડ કપના ઇતિહાસની અત્યાર સુધીની સૌથી મોટી હાર છે. જોકે, મેચના પરિણામની સાથે સાથે મેદાન પર ભારતીય ઓલરાઉન્ડર વોશિંગ્ટન સુંદર અને દક્ષિણ આફ્રિકાના બેટ્સમેન ડેવિડ મિલર વચ્ચે થયેલી ઉગ્ર બોલાચાલી પણ ભારે ચર્ચામાં રહી છે.
વોશિંગ્ટન સુંદર અને મિલર વચ્ચે હાઈ-વોલ્ટેજ ડ્રામા
આ વિવાદ દક્ષિણ આફ્રિકાની બેટિંગ દરમિયાન 14મી ઓવરના અંતમાં સર્જાયો હતો. બોલિંગ કરી રહેલા વોશિંગ્ટન સુંદરને લાગ્યું કે નોન-સ્ટ્રાઈકર એન્ડ પર ઉભેલા ડેવિડ મિલર બોલ રિલીઝ થાય તે પહેલા જ ક્રીઝની બહાર નીકળી રહ્યા છે. સુંદરે આ બાબતે અમ્પાયરને ફરિયાદ કરી અને મિલરની પોઝિશન તરફ ઈશારો કર્યો. ઓવર પૂરી થયા બાદ મિલર ભારતીય ખેલાડી તરફ વધ્યા અને બંને વચ્ચે જોરદાર દલીલો થઈ હતી. મામલો ગંભીર બનતા અમ્પાયર ક્રિસ ગેફની, ઈશાન કિશન અને ટ્રિસ્ટન સ્ટબ્સે વચ્ચે પડીને બંનેને અલગ કરવા પડ્યા હતા.
Heated Words Exchanged Between Miller And Washington Sundar 🌶️
— CricketSanctum (@SanctumCricket) February 22, 2026
Both are usually the calmest on the field, but this time even they couldn’t keep their cool 🔥
pic.twitter.com/QxsFiBhXkp
ડેવિડ મિલરની તોફાની ઇનિંગ
મેચની શરૂઆતની વાત કરીએ તો દક્ષિણ આફ્રિકાએ પ્રથમ બેટિંગ કરતા 20 ઓવરમાં 7 વિકેટે 187 રનનો મજબૂત સ્કોર બનાવ્યો હતો. દક્ષિણ આફ્રિકાની શરૂઆત ખરાબ રહી હતી અને 20 રનમાં જ 3 વિકેટ પડી ગઈ હતી, પરંતુ ડેવિડ મિલરે 35 બોલમાં 7 ચોગ્ગા અને 3 છગ્ગાની મદદથી 63 રન ફટકારીને પાસા પલટી દીધા હતા. તેમને ડેવાલ્ડ બ્રેવિસ (45 રન) નો સારો સાથ મળ્યો હતો. ભારત તરફથી જસપ્રીત બુમરાહે માત્ર 15 રન આપીને 3 વિકેટ ઝડપી હતી, જ્યારે વોશિંગ્ટન સુંદર એક પણ વિકેટ લઈ શક્યા નહોતા.
ભારતીય બેટિંગ લાઇન-અપનો ધબડકો
188 રનના લક્ષ્યાંકનો પીછો કરવા ઉતરેલી ભારતીય ટીમનું બેટિંગ ઓર્ડર પત્તાના મહેલની જેમ વિખેરાઈ ગયું હતું અને આખી ટીમ 18.5 ઓવરમાં માત્ર 111 રનમાં ઓલઆઉટ થઈ ગઈ હતી. ઈશાન કિશન ખાતું ખોલાવ્યા વગર જ આઉટ થયો હતો, જ્યારે અભિષેક શર્મા (15), તિલક વર્મા (1) અને સૂર્યકુમાર યાદવ (18) પણ ખાસ કમાલ કરી શક્યા નહોતા. શિવમ દુબેએ સૌથી વધુ 42 રન બનાવ્યા હતા, પરંતુ તેમને બીજા છેડે કોઈનો સાથ મળ્યો નહીં. દક્ષિણ આફ્રિકા તરફથી માર્કો જેન્સેને ઘાતક બોલિંગ કરીને 4 વિકેટ અને કેશવ મહારાજે 3 વિકેટ ઝડપી હતી.
આ શરમજનક હાર અને નેટ રન રેટમાં થયેલા ઘટાડાને કારણે ભારતની સેમીફાઈનલની આશાને મોટો ઝટકો લાગ્યો છે. પ્લેયર ઓફ ધ મેચ બનેલા ડેવિડ મિલરે પોતાની ઇનિંગથી દક્ષિણ આફ્રિકાની જીતમાં મહત્વની ભૂમિકા ભજવી હતી. ભારત હવે ગુરુવારે ચેન્નાઈમાં ઝિમ્બાબ્વે સામે ટકરાશે.