IND vs NZ ODI Series 2026: ભારતીય ક્રિકેટ ટીમ માટે ન્યૂઝીલેન્ડ સામેની વનડે શ્રેણી પડકારજનક સાબિત થઈ રહી છે. સીરિઝ શરૂ થાય તે પહેલા જ વિકેટકીપર બેટ્સમેન ઋષભ પંત ઈજાના કારણે બહાર થઈ ગયો હતો. હવે ટીમને વધુ એક મોટો આંચકો લાગ્યો છે કારણ કે ઓલરાઉન્ડર વોશિંગ્ટન સુંદર 'સાઇડ સ્ટ્રેન' (Side Strain) ના કારણે બાકીની વનડે શ્રેણીમાંથી બહાર થઈ ગયા હોવાના અહેવાલ છે.
પ્રથમ વનડે દરમિયાન થઈ ઈજા
વોશિંગ્ટન સુંદર ન્યૂઝીલેન્ડ સામેની પ્રથમ વનડે મેચ દરમિયાન ઈજાગ્રસ્ત થયો હતો. આ મેચની પ્રથમ ઈનિંગમાં તેમણે પાંચ ઓવર ફેંકી હતી, જે બાદ તે મેદાનની બહાર જતો રહ્યો હતો. જોકે, તેઓ આઠમા નંબરે બેટિંગ કરવા મેદાનમાં ઉતર્યા હતા અને 7 બોલમાં 7 રન બનાવ્યા હતા, પરંતુ દોડતી વખતે તેમને સ્પષ્ટપણે તકલીફ થઈ રહી હતી.
કેપ્ટન શુભમન ગીલે આપી માહિતી
મેચ બાદ ભારતીય કેપ્ટન શુભમન ગીલે પુષ્ટિ કરી હતી કે સુંદરને સાઇડ સ્ટ્રેન છે અને તેમને સ્કેન માટે મોકલવામાં આવશે. 26 વર્ષીય સુંદર આગામી ટી20 વર્લ્ડ કપ માટે પણ ભારતીય ટીમનો ભાગ છે અને ન્યૂઝીલેન્ડ સામેની ટી20 શ્રેણી માટે પણ તેમની પસંદગી કરવામાં આવી છે. આવી સ્થિતિમાં જો તેમની ઈજા ગંભીર જણાશે, તો ટીમ ઈન્ડિયાની મુશ્કેલીઓ વધી શકે છે કારણ કે તેઓ બોલિંગની સાથે બેટિંગમાં પણ મહત્વની ભૂમિકા ભજવે છે.
બીજી વનડેમાં કોને મળી શકે છે તક?
વોશિંગ્ટન સુંદરના સ્થાને ઓલરાઉન્ડર તરીકે નીતીશ કુમાર રેડ્ડીને પ્લેઈંગ ઈલેવનમાં સામેલ કરવામાં આવી શકે છે. રેડ્ડી અત્યાર સુધી ભારત માટે બે વનડે મેચ રમી ચૂક્યા છે, જેમાં તેમણે 27 રન બનાવ્યા છે, જોકે તેમને હજુ સુધી કોઈ વિકેટ મળી નથી.
BCCI ના સત્તાવાર નિવેદનની રાહ
મીડિયા રિપોર્ટ્સ (ઈન્ડિયા ટુડે) મુજબ સુંદર શ્રેણીમાંથી બહાર થઈ ગયા છે, પરંતુ BCCI દ્વારા હજુ સુધી આ અંગે કોઈ સત્તાવાર નિવેદન બહાર પાડવામાં આવ્યું નથી. સુંદરની ગેરહાજરી ટીમ માટે એક મોટું નુકસાન સાબિત થઈ શકે છે, ખાસ કરીને જ્યારે ટીમ પહેલેથી જ મુખ્ય ખેલાડીઓની ઈજા સામે ઝઝૂમી રહી છે.