IND vs NZ Playing 11, T20 World Cup 2026 Final: ક્રિકેટ જગતનો સૌથી મોટો રોમાંચ હવે તેના અંતિમ પડાવ પર પહોંચી ગયો છે. 7 ફેબ્રુઆરીથી શરૂ થયેલા T20 વર્લ્ડ કપ 2026 માં 29 દિવસના સંઘર્ષ અને 54 મેચોના રસાકસી બાદ હવે ફાઈનલની જંગ જામશે. 8 માર્ચ, રવિવારના રોજ અમદાવાદના નરેન્દ્ર મોદી સ્ટેડિયમ ખાતે ભારત અને ન્યુઝીલેન્ડ વચ્ચે ખિતાબી મુકાબલો ખેલાશે. ભારતીય સમય અનુસાર સાંજે 7:00 વાગ્યે આ હાઈ-વોલ્ટેજ મેચનો પ્રારંભ થશે.
ટીમ ઈન્ડિયા રચી શકે છે ત્રિપલ ઇતિહાસ
ભારતીય ટીમ પાસે આ ફાઈનલ જીતીને એકસાથે ત્રણ મોટા રેકોર્ડ બનાવવાની તક છે:
- T20 વર્લ્ડ કપના ઇતિહાસમાં અત્યાર સુધી કોઈ પણ યજમાન દેશ ટ્રોફી જીતી શક્યો નથી.
- ભારત જો જીતશે તો ત્રણ વખત આ ખિતાબ જીતનાર વિશ્વની પ્રથમ ટીમ બનશે.
- સતત બે વખત (2024 અને 2026) ચેમ્પિયન બનીને ભારત નવો કીર્તિમાન સ્થાપિત કરી શકે છે.
અભિષેક શર્માનું ફોર્મ ચિંતાનો વિષય: રિંકુ સિંહને મળી શકે છે તક
ટીમ મેનેજમેન્ટ માટે સૌથી મોટી મુંઝવણ ઓપનિંગ બેટ્સમેન અભિષેક શર્માનું ફોર્મ છે. ટૂર્નામેન્ટની 7 મેચોમાં તે માત્ર 12.71 ની સરેરાશથી 89 રન જ બનાવી શક્યો છે. જો મેનેજમેન્ટ ફેરફાર કરવાનો નિર્ણય લેશે, તો અભિષેકની જગ્યાએ વિસ્ફોટક બેટ્સમેન રિંકુ સિંહને પ્લેઈંગ-11 માં સામેલ કરવામાં આવી શકે છે. આ સ્થિતિમાં સંજુ સેમસન અને ઇશાન કિશન ઇનિંગની શરૂઆત કરતા જોવા મળી શકે છે.
બોલિંગમાં ફેરફાર: વરુણ ચક્રવર્તીની જગ્યાએ કુલદીપ યાદવ?
વર્લ્ડ કપ પહેલા 'એક્સ-ફેક્ટર' ગણાતો વરુણ ચક્રવર્તી અત્યાર સુધી મોંઘો સાબિત થયો છે. કિવી બેટ્સમેનો સામે કુલદીપ યાદવનો રેકોર્ડ વધુ સારો રહ્યો હોવાથી, કેપ્ટન સૂર્યકુમાર યાદવ અને કોચ ગૌતમ ગંભીર અનુભવી કુલદીપ યાદવ પર પસંદગી ઉતારી શકે છે. વરુણે ન્યુઝીલેન્ડ સામે 4 મેચમાં 4 વિકેટ લીધી છે, જ્યારે કુલદીપે 8 મેચમાં 9 સફળતા મેળવી છે.
ભારતની સંભવિત પ્લેઈંગ-11
સંજુ સેમસન (વિકેટકીપર), ઇશાન કિશન, સૂર્યકુમાર યાદવ (કેપ્ટન), તિલક વર્મા, રિંકુ સિંહ, શિવમ દુબે, હાર્દિક પંડ્યા, અક્ષર પટેલ, કુલદીપ યાદવ, અર્શદીપ સિંહ, જસપ્રીત બુમરાહ.
ભારતીય સ્ક્વોડ (સંપૂર્ણ ટીમ)
સૂર્યકુમાર યાદવ (કેપ્ટન), અભિષેક શર્મા, સંજુ સેમસન, ઇશાન કિશન, તિલક વર્મા, હાર્દિક પંડ્યા, શિવમ દુબે, અક્ષર પટેલ, અર્શદીપ સિંહ, વરુણ ચક્રવર્તી, જસપ્રીત બુમરાહ, કુલદીપ યાદવ, મોહમ્મદ સિરાજ, રિંકુ સિંહ, વોશિંગ્ટન સુંદર.