Harmanpreet Kaur 200th T20I: આઈસીસી મહિલા ટી20 વર્લ્ડ કપ 2026 (ICC Women's T20 World Cup 2026)માં ભારતીય મહિલા બ્રિગેડે શાનદાર પ્રદર્શન જારી રાખ્યું છે. આ દરમિયાન ટીમ ઈન્ડિયાની કેપ્ટન હરમનપ્રીત કૌરે (Harmanpreet Kaur) વિશ્વ ક્રિકેટમાં એક એવો અજોડ અને ઐતિહાસિક કીર્તિમાન સ્થાપિત કર્યો છે, જે આજદિન સુધી ક્રિકેટ જગતનો કોઈ પણ પુરુષ કે મહિલા ખેલાડી હાંસલ કરી શક્યો નથી.
મહિલા ટી20 વર્લ્ડ કપમાં દક્ષિણ આફ્રિકા સામેની ત્રીજી ગ્રુપ મેચમાં ટોસ માટે મેદાન પર પગ મૂકતાની સાથે જ હરમનપ્રીત કૌર 200 આંતરરાષ્ટ્રીય ટી20 (T20I) મેચ રમનારી વિશ્વની પહેલી ખેલાડી બની ગઈ છે.
ઓલ્ડ ટ્રેફોર્ડના ઐતિહાસિક મેદાન પર બન્યો યાદગાર પ્રસંગ
માન્ચેસ્ટરના પ્રતિષ્ઠિત અને ઐતિહાસિક ઓલ્ડ ટ્રેફોર્ડ મેદાન પર રમાઈ રહેલો આ મુકાબલો ભારતીય ટીમ માટે જેટલો મહત્વનો છે, એટલો જ હરમનપ્રીતની કરિયર માટે પણ અમર બની ગયો છે. આ સિદ્ધિ કોઈ નાની સૂની નથી. લગભગ 17 વર્ષ લાંબી આંતરરાષ્ટ્રીય ક્રિકેટ સફર, રમત પ્રત્યેનું અદભુત સમર્પણ, સાતત્યપૂર્ણ પ્રદર્શન અને ફિટનેસના દમ પર જ હરમનપ્રીત આજે આ મહા-રેકોર્ડ સુધી પહોંચવામાં સફળ રહી છે.
જ્યાંથી શરૂઆત થઈ, ત્યાં જ ઈતિહાસનું વર્તુળ પૂરું થયું!
હરમનપ્રીત કૌરની ટી20 ક્રિકેટ સફર ખૂબ જ રસપ્રદ અને પ્રેરણાદાયી રહી છે.
શરૂઆત (વર્ષ 2009): હરમનપ્રીતે વર્ષ 2009માં ઇંગ્લેન્ડની ધરતી પર રમાયેલા સર્વપ્રથમ મહિલા ટી20 વર્લ્ડ કપથી પોતાની આંતરરાષ્ટ્રીય ટી20 સફરની શરૂઆત કરી હતી.
મહારેકોર્ડ (વર્ષ 2026): કુદરતનો સંયોગ જુઓ કે 17 વર્ષ બાદ એટલે કે વર્ષ 2026માં આ જ ટૂર્નામેન્ટની 10મી આવૃત્તિમાં તેણે ઇંગ્લેન્ડની સરજમીન પર જ પોતાની 200મી મેચ રમીને ઇતિહાસ રચી દીધો છે.
વનડે વર્લ્ડ કપ બાદ હવે ટી20 ટ્રોફી પર નજર
હરમનપ્રીત કૌરની કેપ્ટનશીપ હેઠળ ભારતીય મહિલા ટીમ હાલમાં શાનદાર ફોર્મમાં ચાલી રહી છે. માત્ર 8 મહિના પહેલા જ હરમનપ્રીતે પોતાની શાનદાર અને આક્રમક કપ્તાની હેઠળ ભારતને વનડે વર્લ્ડ કપ (ODI World Cup)માં ચેમ્પિયન બનાવ્યું હતું. આ ઐતિહાસિક ખિતાબ જીત્યા બાદ, હવે કેપ્ટન કૌરનું એકમાત્ર લક્ષ્ય ભારતની ઝોળીમાં ટી20 વર્લ્ડ કપની ચમકતી ટ્રોફી નાખવાનું છે.
ટીમ ઈન્ડિયાની વિજયી હેટ્રિક પર નજર
આઈસીસી મહિલા ટી20 વર્લ્ડ કપ 2026માં ભારતીય ટીમની શરૂઆત ધમાકેદાર રહી છે. ભારતે પોતાની શરૂઆતની બંને મેચો જીતી લીધી છે. હવે સાઉથ આફ્રિકા સામે જીત મેળવીને ટીમ ઈન્ડિયા આ ટૂર્નામેન્ટમાં પોતાની જીતની હેટ્રિક લગાવવા માટે મક્કમ ઈરાદા સાથે મેદાનમાં ઉતરી છે.