Kali Chaudas Muhurat 2026 Gujarat: દિવાળીના પાંચ દિવસના તહેવારમાં કાળી ચૌદશનું વિશેષ ધાર્મિક મહત્ત્વ છે. આ દિવસે હનુમાનજી અને મહાકાળી માતાની પૂજા કરવાની પરંપરા છે. વર્ષ 2026માં કાળી ચૌદશ કઈ તારીખે છે, ચતુર્દશી તિથિ ક્યારે શરૂ થશે અને ગુજરાતમાં હનુમાનજીની પૂજા માટે કયો સમય શુભ રહેશે? અહીં જાણો અમદાવાદ, સુરત, વડોદરા અને રાજકોટ સહિતનાં શહેરો માટે પૂજાનું મુહૂર્ત અને ચોઘડિયાં.
કાળી ચૌદશ 2026 ક્યારે છે? જાણો તારીખ અને તિથિ
વર્ષ 2026માં કાળી ચૌદશ શનિવાર, 7 નવેમ્બરના રોજ ઉજવવામાં આવશે. હિંદુ પંચાંગ પ્રમાણે આ પર્વ કારતક મહિનાના કૃષ્ણ પક્ષની ચતુર્દશી તિથિએ આવે છે. આ વખતે ચતુર્દશી તિથિ 7 નવેમ્બરે સવારે 10:48 વાગ્યે શરૂ થશે અને 8 નવેમ્બરે સવારે 11:28 વાગ્યે પૂર્ણ થશે. વિક્રમ સંવત 2083 મુજબ આ કાળી ચૌદશ ઉજવવામાં આવશે.
ગુજરાતમાં હનુમાનજીની પૂજાનું શુભ મુહૂર્ત અને સમય
કાળી ચૌદશના દિવસે હનુમાનજીની પૂજા કરવાનું વિશેષ મહત્ત્વ છે. આ દિવસે મધ્યરાત્રિ દરમિયાન કરવામાં આવતી પૂજાને ધાર્મિક દૃષ્ટિએ મહત્ત્વપૂર્ણ માનવામાં આવે છે. ગુજરાતનાં અલગ-અલગ શહેરોમાં હનુમાનજીની પૂજાનું મુહૂર્ત નીચે મુજબ રહેશે.
અમદાવાદ: રાત્રે 11:58થી 8 નવેમ્બરે રાત્રે 12:49 વાગ્યા સુધી.
સુરત: રાત્રે 11:57થી 8 નવેમ્બરે રાત્રે 12:48 વાગ્યા સુધી.
વડોદરા: રાત્રે 11:55થી 8 નવેમ્બરે રાત્રે 12:47 વાગ્યા સુધી.
રાજકોટ: 8 નવેમ્બરે રાત્રે 12:05થી 12:56 વાગ્યા સુધી.
આ ઉપરાંત, કાળી ચૌદશના દિવસે સાંજે લાભ ચોઘડિયું 5:49થી 7:27 વાગ્યા સુધી રહેશે. જ્યારે રાત્રે શુભ ચોઘડિયું 9:05થી 10:43 વાગ્યા સુધી રહેશે.
કાળી ચૌદશના દિવસે હનુમાનજીની પૂજા કરવાનું શું છે મહત્ત્વ?
ધાર્મિક માન્યતાઓ અનુસાર, કાળી ચૌદશના દિવસે હનુમાનજીની પૂજા કરવાથી ભય અને નકારાત્મકતાથી રક્ષણ મળે છે. આ દિવસે ભક્તો હનુમાન ચાલીસાના પાઠ કરે છે અને હનુમાનજીને સિંદૂર, તેલ તથા ફૂલ અર્પણ કરીને આરાધના કરે છે. ઘણા લોકો આ દિવસે હનુમાન મંદિરે જઈને દર્શન પણ કરે છે.
હનુમાનજીની સાથે કાળી ચૌદશના દિવસે મહાકાળી માતાની પૂજા કરવાનું પણ વિશેષ મહત્ત્વ છે. ભક્તો માતા કાળીની આરાધના કરીને પરિવારની સુખ-શાંતિ અને સમૃદ્ધિ માટે પ્રાર્થના કરે છે. ઘરમાં દીવા પ્રગટાવીને પરંપરા મુજબ પૂજા કરવામાં આવે છે. આ રીતે કાળી ચૌદશનો પર્વ ધાર્મિક આસ્થા અને પરંપરા સાથે ઉજવવામાં આવે છે.