Weather Today: ઉત્તર ભારતમાં હવે કડકડતી ઠંડી પડવાની શરૂઆત થઈ ગઈ છે. પહાડી રાજ્યોમાં થયેલી બરફવર્ષા બાદ ઉત્તર ભારતમાં શિયાળાએ પગ જમાવવાનું શરૂ કરી દીધું છે. આ ઉપરાંત બંગાળની ખાડીમાં એક ચક્રવાતી વાવાઝોડાની સ્થિતિ બની રહી છે. હવામાન વિભાગે 25 નવેમ્બરથી 1 ડિસેમ્બરની વચ્ચે કેટલાક દક્ષિણી રાજ્યોમાં ભારે વરસાદની આગાહી કરી છે.
આગામી 24 કલાકમાં સેન્યા૨ વાવાઝોડું ટકરાવાના સંકેત
સ્કાયમેટ દ્વારા આગામી 48 કલાક દરમિયાન સેન્યા૨ ચક્રવાતી વાવાઝોડું ટકરાવાના સંકેતો આપવામાં આવ્યા છે. આગામી 24 કલાકની અંદર અંદમાન સાગરમાં હવામાન અચાનક પલટો લઈ શકે છે. આ સમયગાળા દરમિયાન 40 થી 50 કિલોમીટર પ્રતિ કલાકની ઝડપે પવનો ફૂંકાશે અને ભારે વરસાદ પડશે.
દરિયાકાંઠાના રાજ્યોમાં ભારે વરસાદની આગાહી
આઈએમડી (IMD) એ 25 નવેમ્બરથી 1 ડિસેમ્બરની વચ્ચે કેટલાક દક્ષિણી રાજ્યોમાં ભારે વરસાદની આગાહી કરી છે. સેન્યા૨ વાવાઝોડાના કારણે ભારતના દક્ષિણી અને દરિયાકાંઠાના રાજ્યોમાં ભારે વરસાદ, તેજ પવનો અને પૂરની સંભાવના છે. મુખ્યત્વે પ્રભાવિત થનારા રાજ્યોમાં તમિલનાડુ, કેરળ, આંધ્ર પ્રદેશ, અંદમાન અને નિકોબાર દ્વીપ સમૂહ, ઓડિશા અને પશ્ચિમ બંગાળના દરિયાકાંઠાના વિસ્તારોનો સમાવેશ થાય છે.
ઉત્તરીય રાજ્યોમાં શીત લહેર અને બરફવર્ષાની સંભાવના
હવામાન વિભાગ મુજબ, ઉત્તરાખંડ, હિમાચલ પ્રદેશ અને જમ્મુ-કાશ્મીરમાં શીત લહેર ચાલવાની સાથે સાથે બરફવર્ષાની સંભાવના છે. જેની અસર હરિયાણા, પંજાબ, દિલ્હી, ઉત્તર પ્રદેશ, રાજસ્થાનથી લઈને બિહાર અને મધ્ય પ્રદેશ સુધી રહેશે.
દિલ્હીમાં તાપમાન અને ધુમ્મસની સ્થિતિ
દિલ્હીમાં આજે હવામાન ઠંડું રહેશે અને સવારના સમયે હળવોથી મધ્યમ ધુમ્મસ છવાયેલું રહેવાની સંભાવના છે. દિવસ દરમિયાન હવામાન મુખ્યત્વે સ્વચ્છ અને તડકાવાળું રહેશે. મહત્તમ તાપમાન લગભગ 23°C થી 24°C વચ્ચે રહેવાની અપેક્ષા છે અને લઘુત્તમ તાપમાન લગભગ 8°C થી 10°C સુધી નીચે જઈ શકે છે. છેલ્લા 24 કલાકમાં દિલ્હીમાં લઘુત્તમ તાપમાનમાં નજીવો ઘટાડો નોંધાયો હતો.
ઉત્તર પ્રદેશમાં ઠંડી અને શીત લહેરની સ્થિતિ
ઉત્તર પ્રદેશમાં આજે હવામાન સ્વચ્છ અને ઠંડું રહેવાનો અંદાજ છે, જેમાં સવારના સમયે મધ્યમ ધુમ્મસ અને દિવસ દરમિયાન તડકો રહેશે. તાપમાનમાં ઘટાડો ચાલુ રહેશે અને કેટલાક વિસ્તારોમાં શીત લહેર જેવી પરિસ્થિતિનો અનુભવ થઈ શકે છે. મહત્તમ તાપમાન લગભગ 24-26°C અને લઘુત્તમ તાપમાન 8-11°C ની વચ્ચે રહેવાની સંભાવના છે. વળી સવારના સમયે ગાઢથી મધ્યમ ધુમ્મસ છવાઈ શકે છે. ઠંડા અને સૂકા ઉત્તર-પશ્ચિમી પવનો ફૂંકાશે, જેનાથી ઠંડીમાં વધારો થશે.