Uttarakhand Helicopter Crash: ઉત્તરાખંડના જોશીમઠ ક્ષેત્રમાં એક અત્યંત દર્દનાક અકસ્માત સામે આવ્યો છે. બદ્રીનાથથી શ્રદ્ધાળુઓ અને મુસાફરોને લઈને દેહરાદૂન તરફ જઈ રહેલું એક હેલિકોપ્ટર રહસ્યમય રીતે દુર્ઘટનાગ્રસ્ત થયું છે. પ્રાથમિક માહિતી અનુસાર, આ દુર્ઘટના જોશીમઠ નજીક આવેલા 'ચાઈ' (Chai) ગામ પાસેના અતિ દુર્ગમ પહાડી અને ખડકાળ વિસ્તારમાં સર્જાઈ છે. અકસ્માતગ્રસ્ત હેલિકોપ્ટર 'ટ્રાન્સ ભારત એવિએશન પ્રાઈવેટ લિમિટેડ' કંપનીનું છે, જેમાં પાયલટ સહિત કુલ 6 લોકો સવાર હતા.
સહસ્ત્રધારા હેલિપેડ પહોંચે તે પહેલા જ કાળનો પંજો
મળતી વિગતો મુજબ, આ હેલિકોપ્ટર બદ્રીનાથથી ઉડાન ભરીને દેહરાદૂનના સહસ્ત્રધારા હેલિપેડ પર લેન્ડ થવાનું હતું. પરંતુ જોશીમઠ અને બદ્રીનાથ વચ્ચે પહાડી ઢાળ સાથે અથડાવાના કારણે આ અકસ્માત થયો હોવાની આશંકા વ્યક્ત કરવામાં આવી રહી છે. ઘટનાની જાણ થતાં જ સ્ટેટ ડિઝાસ્ટર રિસ્પોન્સ ફોર્સ (SDRF), સ્થાનિક જિલ્લા વહીવટીતંત્ર અને ભારતીય સેનાના જવાનોએ તાત્કાલિક સંયુક્ત બચાવ અને રાહત કામગીરી શરૂ કરી દીધી છે. ઘટના બાદ સાવચેતીના પગલાંરૂપે 'ટ્રાન્સ ભારત એવિએશન'ની તમામ હેલિકોપ્ટર સેવાઓ હાલ પૂરતી સ્થગિત કરી દેવામાં આવી છે.
મુખ્યમંત્રી ધામી પરિસ્થિતિ પર રાખી રહ્યા છે નજર
ઉત્તરાખંડના મુખ્યમંત્રી પુષ્કર સિંહ ધામીએ સોશિયલ મીડિયા પર આ ઘટના અંગે ઊંડા દુઃખની લાગણી વ્યક્ત કરી હતી. તેમણે જણાવ્યું હતું કે, "જોશીમઠના ચાઈ ગામ નજીક હેલિકોપ્ટર દુર્ઘટનાગ્રસ્ત થયાના સમાચાર અત્યંત દુઃખદ છે. SDRF અને તંત્ર દ્વારા ઘટનાસ્થળે ઝડપી રેસ્ક્યુ ઓપરેશન ચલાવવામાં આવી રહ્યું છે. ગંભીર રીતે ઘાયલ થયેલા લોકોને તાત્કાલિક એરલિફ્ટ કરીને ઉચ્ચ સ્તરીય તબીબી સારવાર આપવા આદેશો જારી કરી દેવામાં આવ્યા છે."
હેલિકોપ્ટરમાં સવાર પાયલટ અને મુસાફરોના નામ
દુર્ઘટનાગ્રસ્ત હેલિકોપ્ટરમાં સવાર લોકોની યાદી નીચે મુજબ છે:
- કેપ્ટન હિમાંશુ (પાયલટ)
- પ્રતાપા (મુસાફર)
- અરુણ (મુસાફર)
- શંકર ગૌડા (મુસાફર)
- સુધીર કે. (મુસાફર)
- એસ.એસ. નટરાજા (મુસાફર)
ખરાબ હવામાન છતાં સતત ફ્લાઈટો ચાલુ રહી
શુક્રવારે વિસ્તારમાં હવામાન સાનુકૂળ ન હોવા છતાં બદ્રીનાથથી ફ્લાઈટ્સ સતત ચાલુ રાખવામાં આવી હતી. બપોરે ૧:૦૫ વાગ્યે એક હેલિકોપ્ટર દેહરાદૂન માટે નીકળ્યું હતું જે સુરક્ષિત પહોંચ્યું હતું. ત્યારબાદ બપોરે 1:12 વાગ્યે બીજા હેલિકોપ્ટરે ઉડાન ભરી હતી—જે રસ્તામાં જ ગુમ થઈ ક્રેશ થયું હતું. આશ્ચર્યજનક બાબત એ છે કે હેલિકોપ્ટર અદ્રશ્ય થયાના સમાચાર છતાં બપોરે ૨:૧૦, ૨:૧૫ અને ૨:૨૨ વાગ્યે પણ અન્ય હેલિકોપ્ટરોએ ઉડાન ભરી હતી. આખા દિવસ દરમિયાન આવી આશરે 12 ચાર્ટર્ડ ફ્લાઇટ્સ દોડાવવામાં આવી હોવાનું સામે આવ્યું છે, જેનાથી સુરક્ષા નિયમો સામે પણ સવાલો ઊભા થઈ રહ્યા છે.