Telangana Boat Capsize: તેલંગાણાના ખમ્મમ જિલ્લામાંથી એક અત્યંત ચિંતાજનક અને દુઃખદ સમાચાર સામે આવ્યા છે. જિલ્લાના સથુપલ્લી મંડળમાં આવેલા બેથુપલ્લી તળાવમાં પૂરના પાણીમાં ફસાયેલા માછીમારોના જૂથને બચાવવાના પ્રયાસ દરમિયાન સ્ટેટ ડિઝાસ્ટર રિસ્પોન્સ ફોર્સ (SDRF) ની બે બોટ પલટી ગઈ હતી. આ ભયાનક અકસ્માત બાદ SDRF ના આશરે 10 જવાનો પૂરના ધસમસતા પ્રવાહમાં ગુમ થઈ ગયા છે. ઘટનાની જાણ થતાં જ વહીવટી તંત્રમાં ભારે દોડધામ મચી ગઈ છે અને મોટા પાયે રેસ્ક્યૂ ઓપરેશન હાથ ધરવામાં આવ્યું છે.
'મુરાસુ' ચક્રવાતના ભારે વરસાદ વચ્ચે સર્જાયી હોનારત
અહેવાલો અનુસાર, આંધ્રપ્રદેશની સરહદે આવેલા ખમ્મમ જિલ્લામાં હાલમાં 'મુરાસુ' ચક્રવાતની અસરના કારણે અનરાધાર વરસાદ પડી રહ્યો છે. બુધવારે સાંજે તળાવમાં કેટલાક માછીમારો ફસાયા હોવાની માહિતી મળતાં SDRF ની ટીમો બે બોટ મારફતે તેમને સલામત સ્થળે ખસેડવા માટે ઓપરેશન ચલાવી રહી હતી. આ દરમિયાન પાણીના કાળઝાળ પ્રવાહ અને ખરાબ હવામાનને કારણે બંને બોટ નિયંત્રણ ગુમાવી બેસતાં પલટી ગઈ હતી.
ઘટના અંગે માહિતી મળતાં જ ખમ્મમ જિલ્લા કલેક્ટર દિવાકર ટી.એસ. અને પોલીસના ઉચ્ચ અધિકારીઓ તાત્કાલિક ઘટનાસ્થળે દોડી ગયા હતા. ગુમ થયેલા જવાનોની શોધખોળ માટે વધારાની ટીમો તૈનાત કરવામાં આવી છે.
મુખ્યમંત્રી અને કેન્દ્રીય મંત્રીએ લીધી પરિસ્થિતિની નોંધ
આ ઘટના અંગે તેલંગાણાના મુખ્યમંત્રી એ. રેવન્ત રેડ્ડીને તુરંત માહિતગાર કરવામાં આવ્યા હતા. તેમણે જિલ્લા કલેક્ટર અને મુખ્ય સચિવ સંજય જાજુને ગુમ થયેલા જવાનોને બચાવવા માટે તમામ શક્ય સંસાધનોનો ઉપયોગ કરવા આદેશ આપ્યો છે. તેલંગાણાના મહેસૂલ મંત્રી પોંગુલેટી શ્રીનિવાસ રેડ્ડીએ સોશિયલ મીડિયા પર જણાવ્યું હતું કે બચાવ ટીમોએ ગુમ થયેલા જવાનોનું સંભવિત લોકેશન શોધી કાઢ્યું છે અને તેમને સુરક્ષિત રીતે બહાર લાવવાના પ્રયાસો ચાલુ છે.
બીજી તરફ, કેન્દ્રીય ગૃહ રાજ્ય મંત્રી બંદી સંજય કુમારે ઘટના અંગે ઊંડી ચિંતા વ્યક્ત કરી હતી. તેમણે જણાવ્યું કે નેશનલ ડિઝાસ્ટર રિસ્પોન્સ ફોર્સ (NDRF) ની ખાસ ટીમોને પણ બચાવ કામગીરી માટે મોકલવામાં આવી છે. કેન્દ્ર સરકાર અને સ્થાનિક સત્તાવાળાઓ સતત સંપર્કમાં રહીને રેસ્ક્યૂ કામગીરી પર નજર રાખી રહ્યા છે.