Ladakh March 2026: તાજેતરમાં કેન્દ્રીય ગૃહ મંત્રાલય (MHA)ની ઉચ્ચ સ્તરીય કમિટી, લેહ એપેક્સ બોડી (LAB) અને કારગિલ ડેમોક્રેટિક એલાયન્સ (KDA) વચ્ચે લદ્દાખના હકો અને ભવિષ્યને લઈને એક મહત્વપૂર્ણ બેઠક યોજાઈ હતી. પરંતુ લાંબી ચર્ચા-વિચારણા છતાં આ બેઠકમાંથી કોઈ સંતોષકારક કે નક્કર પરિણામ ન નીકળતા જાણીતા પર્યાવરણવિદ અને સામાજિક કાર્યકર્તા સોનમ વાંગચુક ભારે નિરાશ થયા હતા. તેમણે દિલ્હીના જંતર-મંતર પર અગાઉ વિતાવેલા સંઘર્ષના દિવસોને યાદ કરતા સોશિયલ મીડિયા પર એક વિડિયો શેર કર્યો હતો. આ વિડિયોમાં તેમણે ખુલાસો કર્યો હતો કે કેન્દ્ર સરકાર સાથેની આ ઉચ્ચ સ્તરીય ચર્ચા પણ વર વગરના વાદળ જેવી સાબિત થઈ છે, જેના કારણે લદ્દાખના સ્થાનિકોમાં રોષ વ્યાપેલો છે.
'કોકરોચ જનતા પાર્ટી' અને અભિજીત દીપકે સમક્ષ વિશેષ અપીલ
સરકારના વલણ સામે લડતને વધુ તેજ કરવા માટે સોનમ વાંગચુકએ 'કોકરોચ જનતા પાર્ટી' (CJP) ના સંસ્થાપક અભિજીત દીપકે અને તેમના સમર્થકો પાસે ખુલ્લેઆમ મદદ માંગી છે. અગાઉ દિલ્હીના જંતર-મંતર પર લાંબા સમય સુધી ચાલેલા ઉપવાસ અને આંદોલન દરમિયાન આ બંને જૂથો એકબીજાના સંપર્કમાં આવ્યા હતા. આ જ ગાઢ સંબંધોના આધારે વાંગચુકે પોતાના વિડિયો સંદેશમાં 'કોકરોચો' (CJP ના કાર્યકર્તાઓ) ને સંબોધિત કરતા આહ્વાન કર્યું હતું કે, હવે લદ્દાખના અસ્તિત્વને બચાવવા માટે ફરી એકવાર સામૂહિક અવાજ ઉઠાવવાની જરૂર છે, જેથી કેન્દ્ર સરકાર પર યોગ્ય નીતિઓ ઘડવા માટે દબાણ બનાવી શકાય.
19 થી 24 સપ્ટેમ્બર: ભવ્ય પદયાત્રાનું એલાન અને શરતો
અભિજીત દીપકેના સહયોગથી લદ્દાખમાં આગામી 19 થી 24 સપ્ટેમ્બર દરમિયાન પાંચ દિવસીય વિશાળ પદયાત્રા કાઢવાની જાહેરાત કરવામાં આવી છે. આ પદયાત્રા અંગે સ્પષ્ટતા કરતા સોનમ વાંગચુકએ જણાવ્યું છે કે આ આંદોલન સંપૂર્ણપણે શાંતિપૂર્ણ રહેશે, પરંતુ તેનો વ્યાપ વ્યાપક હશે. તેમણે સરકાર સમક્ષ સ્પષ્ટ શરત મૂકી છે કે જો આ પાંચ દિવસો દરમિયાન કેન્દ્ર સરકાર લદ્દાખના હિતમાં કોઈ સકારાત્મક પ્રતિક્રિયા કે આશ્વાસન આપે છે, તો આ પદયાત્રાને લદ્દાખના શહીદોનીમાં સમર્પિત કરવામાં આવશે. જો સરકાર તરફથી કોઈ જ પ્રતિસાદ નહીં મળે, તો આ પદયાત્રા એક ઉગ્ર અને મોટા જન-આંદોલનમાં ફેરવાઈ જશે.
Stand with Ladakh! https://t.co/6buspllZtf
— Abhijeet Dipke (@abhijeet_dipke) September 12, 2026
અભિજીત દીપકેનો પ્રતિસાદ અને જમીની સહભાગિતા પર સસ્પેન્સ
સોનમ વાંગચુકની આ અપીલના બરાબર એક દિવસ બાદ, કોકરોચ જનતા પાર્ટીના સંસ્થાપક અભિજીત દીપકેએ સોશિયલ મીડિયા પ્લેટફોર્મ 'એક્સ' (X) પર વાંગચુકની પોસ્ટને સમર્થન આપતા "Stand with Ladakh!" નો સંદેશ લખ્યો હતો. તેમણે લદ્દાખના ન્યાયિક સંઘર્ષને નૈતિક સમર્થન તો પૂરું પાડી દીધું છે, પરંતુ તેઓ કે તેમની મુખ્ય ટીમ આ પાંચ દિવસીય પદયાત્રામાં રૂબરૂ હાજર રહેશે કે નહીં તે અંગે હજુ સુધી કોઈ સ્પષ્ટ જાહેરાત કરી નથી. રાજકીય વિશ્લેષકો આ પ્રતિક્રિયાને હાલ પુરતી મર્યાદિત માની રહ્યા છે, કારણ કે જમીની સ્તરે પ્રત્યક્ષ સહભાગિતા અંગે હજુ પણ રહસ્ય બનેલું છે.
લદ્દાખની મુખ્ય માંગણીઓ અને લોકશાહી માળખાનું ભવિષ્ય
આ સમગ્ર વિવાદનું મૂળ લદ્દાખ માટે બંધારણીય સુરક્ષા અને લોકશાહી હકોની માંગણીઓ સાથે જોડાયેલું છે. લદ્દાખના લોકો લાંબા સમયથી માંગ કરી રહ્યા છે કે ત્યાં પૂર્ણ કક્ષાની વિધાનસભા (Legislative Assembly) અને એક મજબૂત લોકશાહી માળખાની સ્થાપના કરવામાં આવે, જેથી સ્થાનિક જનતા પોતાના નિર્ણયો પોતે લઈ શકે. આ ઉપરાંત, તેમની મુખ્ય માંગ છે કે ક્ષેત્રની નાજુક ભૂમિ અને પર્યાવરણને નુકસાન પહોંચાડે તેવા કોઈપણ નીતિગત કે મોટા ફેરફારો કરતા પહેલા સ્થાનિકોને વિશ્વાસમાં લેવામાં આવે. જ્યાં સુધી આ માંગણીઓ નહીં સંતોષાય ત્યાં સુધી લદ્દાખના નેતાઓ અને કાર્યકર્તાઓ સરકાર સામે શાંતિપૂર્ણ અને ઉગ્ર બંને પ્રકારે સંઘર્ષ ચાલુ રાખવા માટે મક્કમ છે.