US PERM Green Card Suspension: અમેરિકાના રાષ્ટ્રપતિ ડોનાલ્ડ ટ્રમ્પ વહીવટીતંત્રે ભારતીય IT વ્યાવસાયિકો અને દિગ્ગજ ટેક કંપનીઓ સામે વધુ એક કડક પગલું ભરતા 'પરમનન્ટ લેબર સર્ટિફિકેશન' (PERM) પ્રોગ્રામમાંથી દેશ-વિદેશની અગ્રણી IT કંપનીઓને સ્થગિત કરી દીધી છે. બુધવાર, 8 ઓક્ટોબર, 2026ના રોજ લેવાયેલા આ નિર્ણયથી TCS, ઇન્ફોસીસ, વિપ્રો, HCL, કોગ્નિઝન્ટ અને કેપજેમિની જેવી ભારતીય IT ક્ષેત્રની અગ્રણી કંપનીઓ ઉપરાંત માઈક્રોસોફ્ટ અને એડોબ જેવી યુએસ ટેક જાહેરાતો પર પણ મોટી અસર પડી છે. ફેડરલ તપાસનો હવાલો આપીને અમેરિકી ડિપાર્ટમેન્ટ ઓફ લેબરે આ કડક નિર્ણય લીધો છે.
શું છે PERM પ્રોગ્રામ અને કેમ લેવાયો નિર્ણય?
'PERM' એ રોજગાર-આધારિત ગ્રીન કાર્ડ મેળવવાની પ્રક્રિયાનું પ્રથમ અને અત્યંત મહત્વપૂર્ણ પગલું છે. આ નિયમ હેઠળ અમેરિકી નોકરીદાતાએ સાબિત કરવું પડે છે કે સંબંધિત પોસ્ટ માટે કોઈ સ્થાનિક અમેરિકી ઉમેદવાર ઉપલબ્ધ નથી અને વિદેશી કર્મચારીની ભરતીથી અમેરિકન વેતન કે રોજગાર પર નકારાત્મક અસર પડશે નહીં.
વ્હાઇટ હાઉસમાં યોજાયેલી સંયુક્ત પ્રેસ કોન્ફરન્સમાં ઉપપ્રમુખ જે.ડી. વેન્સ અને લેબર સેક્રેટરી કીથ સોન્ડરલિંગે ગંભીર આક્ષેપો કર્યા હતા કે આ કંપનીઓ H-1B વિઝા અને ગ્રીન કાર્ડ પ્રક્રિયાનો દુરુપયોગ કરીને અમેરિકન નાગરિકોની નોકરીઓ છીનવી રહી છે. સત્તાવાર આંકડાઓ અનુસાર, 2009થી આ કંપનીઓએ આશરે 30 લાખ વિદેશી કામદારો માટે અરજી કરી હતી, જેમાં 2,30,000થી વધુ H-1B વિઝા અને 1,00,000થી વધુ કાયમી શ્રમ પ્રમાણપત્રો મેળવ્યા હતા.
માઈક્રોસોફ્ટ પર જે.ડી. વેન્સના આકરા પ્રહારો
ઉપપ્રમુખ જે.ડી. વેન્સે ખાસ કરીને માઈક્રોસોફ્ટનું ઉદાહરણ આપતા જણાવ્યું હતું કે કંપનીએ ગયા વર્ષે 6,000થી વધુ અમેરિકી કર્મચારીઓની છટણી કરી હતી, જ્યારે તેની સામે 6,300 H-1B વિઝા અને ગ્રીન કાર્ડ અરજદારો માટે આશરે 3,000 PERM મંજૂરીઓનો લાભ લીધો હતો. તેમણે દલીલ કરી હતી કે કાઢી મુકાયેલા દરેક અમેરિકન કર્મચારીના બદલે દોઢ જેટલા વિદેશી "બંધાયેલા" શ્રમિકોને ગોઠવવામાં આવ્યા હતા.
હાલના H-1B વિઝા ધારકો પર શું અસર થશે?
રાહતની વાત એ છે કે આ પ્રતિબંધ માત્ર નવી PERM અરજીઓ સ્વીકારવા અને હાલમાં પેન્ડિંગ રહેલી અરજીઓની પ્રક્રિયા અટકાવવા પૂરતો જ મર્યાદિત છે. આનો સીધો અર્થ એ થાય છે કે હાલમાં આ કંપનીઓમાં H-1B વિઝા પર પહેલેથી કામ કરી રહેલા કર્મચારીઓના વિઝા સ્ટેટસ પર કોઈ તાત્કાલિક ખતરો નથી. જોકે, જે કર્મચારીઓ ગ્રીન કાર્ડની રાહ જોઈ રહ્યા હતા તેમની કાનૂની પ્રક્રિયા અટકી જતાં ભવિષ્યની અનિશ્ચિતતા વધી ગઈ છે.
અમેરિકાની 9 પ્રખ્યાત યુનિવર્સિટીઓ પણ રડારમાં
આ કાર્યવાહી દરમિયાન વેન્સે હાર્વર્ડ, યેલ, સ્ટેનફોર્ડ, MIT, બ્રાઉન યુનિવર્સિટી, કેલિફોર્નિયા ઇન્સ્ટિટ્યૂટ ઓફ ટેક્નોલોજી, યુનિવર્સિટી ઓફ પિટ્સબર્ગ, UC-ડેવિસ અને એરિઝોના સ્ટેટ યુનિવર્સિટી જેવી 9 પ્રખ્યાત શિક્ષણ સંસ્થાઓ સામે પણ તપાસની માંગ કરી છે. આક્ષેપ છે કે આ સંસ્થાઓ સ્થાનિક વેતન ઘટાડવાના હેતુથી આંતરરાષ્ટ્રીય વિદ્યાર્થીઓને પ્રોત્સાહન આપી રહી છે.
ભારત-અમેરિકા વેપાર સંબંધો પર ઘેરી અસર
આ નિર્ણય પહેલાં જ ટ્રમ્પ વહીવટીતંત્રે $100,000ની નવી H-1B વિઝા ફી અને 'પ્રોજેક્ટ ફાયરવોલ' જેવી નીતિઓ અમલમાં મૂકી છે. હાલમાં બંને દેશો વચ્ચેની વેપાર વાટાઘાટો પણ અટકેલી છે. આવી સ્થિતિમાં ગ્રીન કાર્ડ પ્રક્રિયા સ્થગિત થવાથી ભારતીય IT ક્ષેત્રની નિકાસ અને અમેરિકા સ્થિત લાંબા ગાળાના પ્રોજેક્ટ્સ પર વિપરીત અસર પડી શકે છે.