NIRF Ranking 2024 List: કેન્દ્રીય શિક્ષણ મંત્રાલયે આજે સોમવારે નેશનલ ઇન્સ્ટિટ્યુશનલ રેન્કિંગ ફ્રેમવર્ક (NIRF રેન્કિંગ 2024)ની યાદી બહાર પાડી છે. NIRF રેન્કિંગ 2024ની યાદી અનુસાર, IIT મદ્રાસને એકંદર કેટેગરીમાં દેશભરની ટોચની સંસ્થા જાહેર કરવામાં આવી હતી, જ્યારે AIIMS, IIM અમદાવાદ, હિન્દુ કોલેજ પોતપોતાની શ્રેણીઓમાં ટોપ પર રહી છે.
શિક્ષણ મંત્રાલયના જણાવ્યા અનુસાર, ઇન્ડિયન ઇન્સ્ટિટ્યૂટ ઑફ ટેક્નોલોજી IIT મદ્રાસ સતત છઠ્ઠા વર્ષે નેશનલ ઇન્સ્ટિટ્યૂટ રેન્કિંગ ફ્રેમવર્ક (NIRF 2024 રેન્કિંગ)માં ટોચ પર રહી છે, જ્યારે ઇન્ડિયન ઇન્સ્ટિટ્યૂટ ઑફ સાયન્સ IISc બેંગલુરુને સતત નવમી વખત શ્રેષ્ઠ યુનિવર્સિટી તરીકે પસંદ કરવામાં આવી છે. આ રેન્કિંગને નેશનલ ઇન્સ્ટિટ્યુશનલ રેન્કિંગ ફ્રેમવર્ક (NIRF)ની સત્તાવાર વેબસાઇટ nirfindia.org પર જોઈ શકો છો.
NIRF રેન્કિંગ ફ્રેમવર્કિંગમાં ઓવરઓલ ગ્રેડમાં ગુજરાતની માત્ર એક સરકારી યુનિવર્સિટીનો સમાવેશ થાય છે અને તે છે ગુજરાત યુનિવર્સિટી. ઓવરઓલ ટોપ 100માં ગુજરાત યુનિવર્સિટી 94મા ક્રમે છે, જ્યારે યુનિવર્સિટી રેન્કિંગમાં ગુજરાત યુનિવર્સિટી 76મા ક્રમે છે. આ સિવાય ગુજરાતની એક પણ સરકારી સંસ્થાનો સમાવેશ થતો નથી.
વાંચોઃ IIM Ahmedabad: IIMA સતત પાંચમા વર્ષે NIRF દ્વારા શ્રેષ્ઠ મેનેજમેન્ટ સંસ્થાનો ક્રમાંક મેળવ્યો
શિક્ષણ અને સંસાધનો (30%), સંશોધન અને વ્યવસાયિક વ્યવહાર (30%),સ્નાતક પરિણામો (20%), આઉટરીચ અને સમાવેશીતા (10%), અને પર્સેપ્શન (10%)ના આધારે NIRF રેન્કિંગ આપવામાં આવે છે, જેમાં ગુજરાતની માત્ર એક સરકારી યુનિવર્સિટીનો NIRFમાં સમાવેશ થયો છે.
NIRF Ranking 2024 Overall : ભારતની ટોચની 10 સંસ્થાઓ, ગુજરાત કયાં
| સંસ્થા | શહેર | રેન્ક |
| IIT મદ્રાસ | ચેન્નાઈ | 1 |
| IISc | બેંગલુરુ | 2 |
| IIT બોમ્બે | મુંબઈ | 3 |
| IIT દિલ્હી | દિલ્હી | 4 |
| IIT કાનપુર | કાનપુર | 5 |
| IIT ખડગપુર | ખડગપુર | 6 |
| AIIMS નવી દિલ્હી | દિલ્હી | 7 |
| IIT રુડકી | રુડકી | 8 |
| IIT ગુવાહાટી | ગુવાહાટી | 9 |
| જવાહરલાલ નહેરુ યુનિવર્સિટી (JNU) | દિલ્હી | 10 |
| ઈન્ડિયન ઈન્સ્ટીટ્યૂટ ઓફ ટેક્નોલોજી | ગાંધીનગર | 29 |
| ગુજરાત યુનિવર્સિટી | અમદાવાદ | 94 |
NIRF Ranking
NIRF રેન્કિંગ 2024 અનુસાર ટોચની 5 યુનિવર્સિટીઓની યાદીમાં IISc બેંગ્લોર પ્રથમ સ્થાને છે. જ્યારે બીજા સ્થાને JNU, ત્રીજા સ્થાને જામિયા મિલિયા ઇસ્લામિયા, ચોથા સ્થાને મણીપાલ યુનિવર્સિટી અને પાંચમા સ્થાને બીએચયુ રહી છે.
| સંસ્થા | શહેર | રેન્ક |
| IISc | બેંગલુરુ | 1 |
| જવાહરલાલ નહેરુ યુનિવર્સિટી (JNU) | દિલ્હી | 2 |
| જામિયા મિલિયા ઈસ્લામિયા | દિલ્હી | 3 |
| મણીપાલ યુનિવર્સિટી | મણીપાલ | 4 |
| બનારસ હિન્દુ યુનિવર્સિટી | વારાણસી | 5 |
| યુનિવર્સિટી ઓફ દિલ્હી | દિલ્હી | 6 |
| ગુજરાત યુનિવર્સિટી | અમદાવાદ | 76 |
એન્જિનિયરિંગ કોલેજોની યાદી
એન્જિનિયરિંગ કોલેજોની યાદીમાં ટોચની દસ સંસ્થાઓમાં નવ IITનો સમાવેશ થાય છે, જેમાં IIT મદ્રાસ સતત નવમા વર્ષે શ્રેણીમાં ટોચ પર છે. IIT દિલ્હીએ તેનું બીજું સ્થાન જાળવી રાખ્યું છે અને IIT મુંબઈએ તેનું ત્રીજું સ્થાન જાળવી રાખ્યું છે. નેશનલ ઇન્સ્ટિટ્યૂટ ઓફ ટેક્નોલોજી NIT તિરુચિરાપલ્લી પણ ટોપ 10 લિસ્ટમાં સામેલ છે. એન્જિનિયરિંગમાં આઇઆઇટી ગાંધીનગર 18મા જ્યારે સુરતની એસવીએનઆઇટી 59મા નંબર પર આવી છે.
IIM અમદાવાદ મેનેજમેન્ટમાં ચમક્યું
મેનેજમેન્ટ ઇન્સ્ટિટ્યૂટ વિશે વાત કરીએ તો, ઇન્ડિયન ઇન્સ્ટિટ્યૂટ ઑફ મેનેજમેન્ટ IIM અમદાવાદે તેનું ટોચનું સ્થાન જાળવી રાખ્યું છે, ત્યારબાદ IIM બેંગ્લોર અને IIM કોઝિકોડ છે. આ યાદીમાં IIT મુંબઈ અને IIT દિલ્હી પણ ટોપ 10માં સામેલ છે.
મેનેજમેન્ટ કેટેગરીમાં રાજ્યની 5 સંસ્થાઓ ટોપ 100માં સામેલ છે, જેમાં આઇઆઇએમ અમદાવાદ પ્રથમ ક્રમાંકે છે. માઇકા 32માં ક્રમાંકે જ્યારે નિરમા યુનિવર્સિટી 55મા ક્રમાંકે, પીડીઇયુ 89માં ક્રમાંકે આવી છે.
અન્ય શૈક્ષેણિક સંસ્થાની યાદી
સ્ટેટ પબ્લિક યુનિવર્સિટીમાં પણ ગુજરાત યુનિવર્સિટીએ 29મો ક્રમાંક મેળવ્યો છે. ટોપ 100 કોલેજમાં ગુજરાતની એક પણ કોલેજનો સમાવેશ થયો નથી. મેડિકલ સંસ્થાઓમાં ગુજરાતની કેન્સર ઇન્સ્ટિટ્યૂટનો થયો સમાવેશ છે. ગુજરાત કેન્સર ઇન્સ્ટિટ્યૂટ 45મા ક્રમાકે આવી છે. ટોપ 50માંથી બી જે મેડિકલ કોલેજ બહાર નીકળી છે,ગત વર્ષે બી.જે મેડિકલ ટોપ કોલેજમાં હતી. ડેન્ટલમાં ગુજરાત ગવર્મેન્ટ ડેન્ટલ કોલેજ 34મા ક્રમાંકે છે. ફાર્મસીમાં ગુજરાતની પાંચ સંસ્થાઓનો સમાવેશ કરવામાં આવ્યો છે. ફાર્મસીમાં નાઇપર 15મા ક્રમાકે, નિરમા યુનિવર્સિટી 37મા ,એમ એસ યુનિવર્સિટી 44, પારૂલ યુનિવર્સિટી 47, એલ.એમ ફાર્મસી કોલેજ 52મા, જીટીયુ 70મા, રમણભાઇ પટેલ ફાર્મસી કોલેજ 90મા, ઉકા તરસાડીયા યુનિવર્સિટીસ 91મા ક્રમાંકે છે.
ઓપન યુનિવર્સિટીમાં આંબેડકર ઓપન યુનિવર્સિટીનો સમાવેશ થયો. બાબાસાહેબ આંબેડકર યુનિવર્સિટી 3જા ક્રમાંકે આવી છે. લોમાં ગુજરાતની એક માત્ર જીએનએલયુનો સમાવેશ થયો છે. જીએનએલયુ 8મા ક્રમાંકે આવી છે. સ્કીલ યુનિવર્સિટીઓમાં ગુજરાતની એક પણ યુનિવર્સિટીનો સમાવેશ નથી.