India-Israel Defense: 'ઓપરેશન સિંદૂર' પછી લાગુ કરાયેલા કટોકટીના નિયમો હેઠળ ભારતે વધુ ઇઝરાયેલી હેરોન એમકે-2 ડ્રોન ખરીદવાની શરૂઆત કરી છે. ભારતે 2021માં ચીન સાથેની LAC પરના તણાવ બાદ કટોકટીની સત્તાઓ હેઠળ હેરોન એમકે-2 ડ્રોન ખરીદવાનું શરૂ કર્યું હતું. શરૂઆતમાં થલસેના અને વાયુસેના માટે બે-બે ડ્રોનના ઓર્ડર આપવામાં આવ્યા હતા. તાજેતરના વર્ષોમાં ભારતે તેની ખરીદી વધારી છે. આ હેરોન ડ્રોન મુખ્યત્વે ચીન અને પાકિસ્તાન સાથેની સરહદો પર લાંબા અંતરની દેખરેખ માટે તૈનાત કરવામાં આવે છે અને તે અત્યંત અસરકારક સાબિત થયા છે.
ઇઝરાયેલી ડ્રોન હેરોન MK-2 ની ખાસિયતો
ઇઝરાયેલ એરોસ્પેસ ઇન્ડસ્ટ્રીઝ દ્વારા વિકસિત હેરોન MK-2 એક મધ્યમ ઊંચાઈ અને લાંબા અંતર સુધી ઉડાન ભરવા સક્ષમ (MALE) યુએવી છે. આ ડ્રોન મહત્તમ 1,430 કિલોગ્રામ વજન સાથે 35,000 ફૂટની ઊંચાઈ પર ઉડાન ભરી શકે છે. તેની સૌથી નોંધપાત્ર ક્ષમતાઓમાંની એક એ છે કે તે સતત 45 કલાક સુધી હવામાં રહી શકે છે, જે લાંબા સમય સુધી દેખરેખ માટે નિર્ણાયક છે. હેરોન એમકે-2 ની મહત્તમ ઝડપ 150 નોટ છે. આ ઉપરાંત ભારતીય વાયુસેના અને સંરક્ષણ મંત્રાલય હાલના હેરોન ફ્લીટની દેખરેખ અને લડાયક ક્ષમતાઓને અપગ્રેડ કરવા માટે 'પ્રોજેક્ટ ચિત્તા' પર પણ કામ કરી રહ્યા છે.
'મેક ઇન ઇન્ડિયા' હેઠળ ભારતમાં ઉત્પાદન પર ભાર
સંરક્ષણ ક્ષેત્રમાં 'મેક ઇન ઇન્ડિયા'ની છાપને વધુ ઊંડી બનાવવાના પ્રયાસરૂપે ઇઝરાયેલી સંરક્ષણ ઉદ્યોગના સૂત્રોના જણાવ્યા અનુસાર આ અત્યાધુનિક ડ્રોનને ભારતમાં બનાવવાની વાતચીત પણ ચાલી રહી છે. આ પગલું ટેક્નોલોજીના સંપૂર્ણ હસ્તાંતરણનો માર્ગ ખોલી શકે છે. હવે ધ્યાન HAL (હિન્દુસ્તાન એરોનોટિક્સ લિમિટેડ) અને LCAM વચ્ચેની ભાગીદારી દ્વારા ભારતમાં MK-2 બનાવવા પર કેન્દ્રિત છે. IAIના એક અધિકારીએ જણાવ્યું હતું કે તેઓ સ્થાનિક ભાગીદારો સાથે મળીને કામ કરી રહ્યા છે, અને તેમનો હેતુ માત્ર MK-2 જ નહીં, પરંતુ અન્ય ડ્રોનનું પણ ભારતીય સંસ્કરણ ભારતમાં બનાવવાનો છે.