Epstein Files Photos: અમેરિકી ન્યાય વિભાગ દ્વારા શુક્રવારે જેફ્રી એપસ્ટીન કેસ સાથે જોડાયેલા આશરે 3 લાખ દસ્તાવેજો સાર્વજનિક કરવામાં આવ્યા છે. આ ઘટસ્ફોટમાં એવી ઘણી તસવીરો સામે આવી છે જેને જોઈને સૌ કોઈ ચોંકી ઉઠ્યા છે. અહેવાલો મુજબ આ તપાસમાં કુલ 3500 થી વધુ ફાઇલો છે, જેમાં 2.5 GB થી વધુ તસવીરો અને દસ્તાવેજોનો સમાવેશ થાય છે.
બિલ ક્લિન્ટન અને અન્ય સેલિબ્રિટીઝની સંડોવણી
જાહેર થયેલા દસ્તાવેજોમાં સૌથી ચોંકાવનારો ખુલાસો પૂર્વ અમેરિકી રાષ્ટ્રપતિ બિલ ક્લિન્ટન વિશે થયો છે, જેઓ એક હોટ ટબમાં કેટલીક યુવતીઓ સાથે નહાતા જોવા મળે છે. આ તસવીરો શરૂઆતમાં ચાર સેટમાં અને ત્યારબાદ વધુ એક સેટમાં જારી કરવામાં આવી હતી. આ સિવાય આ ફાઇલ્સમાં હોલીવુડ અભિનેતા ક્રિસ ટકર, પોપ સિંગર માઈકલ જેક્સન, બ્રિટિશ પ્રિન્સ એન્ડ્રુ, બિલ ગેટ્સ અને નોમ ચોમ્સ્કી જેવી જાણીતી હસ્તીઓના નામ અને તસવીરો પણ સામે આવી છે.
ઉલ્લેખનીય છે કે રાષ્ટ્રપતિ ડોનાલ્ડ ટ્રમ્પે એપસ્ટીન તપાસ સાથે જોડાયેલા રેકોર્ડ્સને જાહેર થતા રોકવા માટે મહિનાઓ સુધી સંઘર્ષ કર્યો હતો. જોકે ભારે દબાણ બાદ તેમણે ગયા મહિને એક કાયદા પર હસ્તાક્ષર કર્યા હતા, જેના કારણે આ દસ્તાવેજો જાહેર કરવા અનિવાર્ય બન્યા હતા. ડેપ્યુટી એટર્ની જનરલ ટોડ બ્લેન્ચના જણાવ્યા અનુસાર હજુ પણ લાખો વધારાના દસ્તાવેજો આગામી સપ્તાહોમાં બહાર પાડવામાં આવશે.
પીડિતોની ગુપ્તતા અને વિરોધ પક્ષના આક્ષેપો
દસ્તાવેજોમાં 254 મસાજ કરનાર મહિલાઓની સાત પાનાની યાદીને સુરક્ષાના કારણોસર સંપૂર્ણપણે 'બ્લેક આઉટ' (સંપાદિત) કરવામાં આવી છે જેથી સંભવિત પીડિતોની ઓળખ છતી ન થાય. દરમિયાન ડેમોક્રેટિક સીનેટ માઈનોરિટી લીડર ચક શૂમરે આ આંશિક રિલીઝની નિંદા કરતા તેને ડોનાલ્ડ ટ્રમ્પના ભૂતકાળને બચાવવાનો એક પ્રયાસ ગણાવ્યો છે. જેફ્રી એપસ્ટીન, જેની વર્ષ 2019માં ન્યૂયોર્કની જેલમાં મૃત્યુ થઈ હતી, તેની સાથે જોડાયેલા આ રહસ્યો હજુ પણ વધુ મોટા ખુલાસાઓ કરી શકે છે.
