Delhi Harsh Vihar Building Collapse: આજે 25 ઓક્ટોબર, રવિવારે સાંજે પૂર્વ દિલ્હીના હર્ષ વિહાર વિસ્તારમાં મિલન ગાર્ડનમાં ગેરકાયદેસર રીતે બાંધવામાં આવેલા એક મકાનનો લિન્ટલ ધરાશાયી થયો હતો. ફાયર વિભાગ કાટમાળ નીચે ફસાયેલા કામદારોને શોધી રહ્યું છે. પહેલા માળનું લિન્ટલ નાખવાનું કામ ચાલી રહ્યું હતું. દરમિયાન, સાંજે અચાનક લિન્ટલ તૂટી પડ્યું.
આ બનાવ અંગે મળતી વિગત અનુસાર, દિલ્હીના હર્ષ વિહાર વિસ્તારમાં મિલન ગાર્ડનમાં ગેરકાયદેસર બાંધકામ ચાલી રહ્યું હતું. આજે પહેલા માળનું લિન્ટલ નાખવાનું કામ ચાલી રહ્યું હતું. દરમિયાન, સાંજે અચાનક લિન્ટલ તૂટી પડ્યું. ફાયર બ્રિગેડની ટીમો ફસાયેલા કામદારોને શોધી રહી છે.
એડિશનલ DCP સંદીપ લાંબાએ જણાવ્યું કે, "અમને બપોરના સમયે એક ફોન આવ્યો કે એક ઈમારત ધરાશાયી થઈ ગઈ છે. મૂળ ઈમારત એક માળની હતી; તેની ઉપર વધુ એક માળનું બાંધકામ ચાલી રહ્યું હતું. આ વિસ્તાર ચારે બાજુથી બંધાયેલો હોવાથી, કઈ ઈમારત ધરાશાયી થઈ છે તે ચોક્કસપણે ઓળખવું પણ મુશ્કેલ બની રહ્યું છે. હાલમાં બચાવ કામગીરી ચાલી રહી છે. NDRF ટીમો આવી પહોંચી છે, અને સાથે સ્થાનિક પોલીસ, ફાયર બ્રિગેડ અને સિવિલ ડિફેન્સના જવાનો પણ હાજર છે."
એડિશનલ DCP સંદીપ લાંબાએ વધુમાં જણાવ્યું કે,"સ્થાનિક રહેવાસીઓ સહિત સૌ કોઈ મળીને કામ કરી રહ્યા છે. તેઓ આસપાસના ભાગેથી કાટમાળનો મોટો જથ્થો હટાવી રહ્યા છે. NDRF ટીમ તેમના ડોગ સ્ક્વોડ અને અન્ય સાધનો સાથે આવી પહોંચી છે. અત્યાર સુધી કોઈને પણ સુરક્ષિત બહાર કાઢી શકાયા નથી. એવી શક્યતા છે કે લોકો કાટમાળ નીચે ફસાયેલા હોઈ શકે છે, પરંતુ હાલના તબક્કે કંઈ પણ સ્પષ્ટ નથી."