CRPF Report NEET Protest: NEET પેપર લીક સામે ગત 2 જુલાઈના રોજ યોજાયેલા વિરોધ પ્રદર્શન દરમિયાન થયેલી પોલીસ કાર્યવાહી અંગે સેન્ટ્રલ રિઝર્વ પોલીસ ફોર્સ (CRPF) ના ઈન્ટરનલ એનાલિસિસ રિપોર્ટમાં મોટો ખુલાસો થયો છે. રિપોર્ટ અનુસાર, ભીડને કાબૂમાં લેવા માટે તમામ સ્ટાન્ડર્ડ ઓપરેટિંગ પ્રોસિજર (SOP) અને રમખાણ વિરોધી (Anti-Riot) કવાયતનું સંપૂર્ણ પાલન કરવામાં આવ્યું હતું. આ કાર્યવાહીમાં પેલેટ ગન જેવા બિન-ઘાતક સાધનોનો ઉપયોગ પણ નિયમો અને અધિકૃત પરવાનગી મુજબ જ કરવામાં આવ્યો હતો.
તબક્કાવાર બળ પ્રયોગ અને મંજૂરી બાદ જ કાર્યવાહી
સૂત્રોના જણાવ્યા અનુસાર, રેપિડ એક્શન ફોર્સ (RAF) દ્વારા કરવામાં આવેલી કાર્યવાહીની ઝીણવટભરી તપાસ કરવામાં આવી હતી. તપાસમાં સામે આવ્યું છે કે 'ફોર્સ ગ્રેડિયન્ટ'ના નિયમોનું કડક પાલન થયું હતું. શરૂઆતમાં જાહેર ઘોષણાઓ, ટીયર ગેસ અને લાઠીચાર્જ જેવા ઓછી તીવ્રતાના પગલાં લેવામાં આવ્યા હતા. પરંતુ ભીડ વધુ આક્રમક બનતા અને વિખેરવામાં નિષ્ફળ રહ્યા બાદ જ આખરી વિકલ્પ તરીકે પંપ-એક્શન ગન તૈનાત કરવામાં આવી હતી.
અધિકારીઓએ સ્પષ્ટ કર્યું હતું કે RAF ના જવાનો દિલ્હી પોલીસના ઇન્ચાર્જ DCP અથવા ACP ની લેખિત પરવાનગી મળ્યા બાદ જ રમખાણ વિરોધી સાધનોનો ઉપયોગ કરે છે. આ કેસમાં પણ તમામ મંજૂરીઓ કાયદાકીય ફોર્મેટ મુજબ લેખિતમાં જ આપવામાં આવી હતી, કોઈ પણ મૌખિક આદેશ અપાયો નહોતો.
47 જવાનો અને વિરોધીઓ ઘાયલ
રિપોર્ટ અનુસાર, ઉશ્કેરાયેલી ભીડમાં સામેલ કેટલાક લોકોએ પોલીસ અને RAF ના જવાનો પર પથ્થરો તેમજ લોખંડની રેલિંગ વડે હુમલો કર્યો હતો. આ હિંસક અથડામણમાં RAF ના 47 કર્મચારીઓ ઘાયલ થયા હતા, જેમાં 6 જવાનોને માથાના ભાગે ગંભીર ઈજાઓ પહોંચી હતી. સામે પક્ષે, ધાતુની ગોળીઓ વાગવાથી 3 થી 5 વિરોધ પ્રદર્શનકારીઓ પણ ઘાયલ થયા હતા.
કોર્ટના ચુકાદા અને સુપ્રીમ કોર્ટમાં રજૂઆત
CRPF ના ડિરેક્ટર જનરલ જી.પી. સિંહે જણાવ્યું હતું કે આ સમગ્ર મામલો હાલ ન્યાયાધીન છે અને RAF ની કાર્યવાહી અંગેનો વિગતવાર રિપોર્ટ સુપ્રીમ કોર્ટ સમક્ષ રજૂ કરવામાં આવશે.
ઉલ્લેખનીય છે કે, 2016 માં જમ્મુ-કાશ્મીર હાઈકોર્ટ અને ત્યારબાદ સુપ્રીમ કોર્ટે પણ અવલોકન કર્યું હતું કે જ્યારે બેકાબૂ ટોળું હિંસા પર ઉતરી આવે ત્યારે પરિસ્થિતિ મુજબ બળનો ઉપયોગ જરૂરી બની જાય છે. કોર્ટે નોંધ્યું હતું કે સક્ષમ અધિકારી દ્વારા યોગ્ય પરવાનગી સાથે ગેરકાયદેસર ભીડને કંટ્રોલ કરવા માટે પેલેટ ગનનો ઉપયોગ એક અધિકૃત અને બિન-ઘાતક પદ્ધતિ છે.