CEC Gyanesh Kumar Security: મતદાતા યાદીમાં કથિત ગડબડીને લઈને ચાલી રહેલા વિપક્ષ અને અન્ય સંગઠનોના વિરોધ પ્રદર્શનો વચ્ચે કેન્દ્ર સરકારે મુખ્ય ચૂંટણી કમિશનર (CEC) જ્ઞાનેશ કુમારની Z+ સુરક્ષા વધુ મજબૂત કરી દીધી છે. દિલ્હી અને આગ્રા સ્થિત નિવાસસ્થાનો તથા ચૂંટણી પંચના મુખ્યાલય ખાતે સુરક્ષા બળો તૈનાત કરવામાં આવ્યા છે.
મુખ્ય ચૂંટણી કમિશનરની સુરક્ષામાં વધારો
SIR માં કથિત ગડબડીને લઈને થઈ રહેલા વિરોધ પ્રદર્શનો વચ્ચે કેન્દ્ર સરકારે મોટો નિર્ણય લીધો છે. કેન્દ્ર સરકારે મુખ્ય ચૂંટણી કમિશનર (CEC) જ્ઞાનેશ કુમારની Z+ સુરક્ષાને વધુ મજબૂત કરી દીધી છે. આ નિર્ણય હેઠળ તેમના નિવાસસ્થાન, ચૂંટણી પંચની ઓફિસ અને તેમની વ્યક્તિગત સુરક્ષામાં તૈનાત જવાનોની સંખ્યા વધારી દેવામાં આવી છે.
વિપક્ષના વિરોધ પ્રદર્શન બાદ લેવાયો નિર્ણય
મળતી માહિતી અનુસાર, દિલ્હી અને આગ્રા સ્થિત મુખ્ય ચૂંટણી કમિશનર જ્ઞાનેશ કુમારના નિવાસસ્થાનો બહાર થયેલા વિરોધ પ્રદર્શન બાદ સુરક્ષા એજન્સીઓએ સુરક્ષા વધારવાનું આ કડક પગલું ભર્યું છે. આ પહેલા ભારતીય યુવા કોંગ્રેસે 27 સપ્ટેમ્બરના રોજ જ્ઞાનેશ કુમારના રાજીનામાની માંગ સાથે તેમના નિવાસસ્થાન બહાર પ્રદર્શન કર્યું હતું. જોકે, સુરક્ષા દળોએ વિરોધ પ્રદર્શન તાત્કાલિક ધોરણે રોકી દીધું હતું.
નિવાસસ્થાન બહાર અર્ધસૈનિક બળ તૈનાત
અધિકારીઓના જણાવ્યા મુજબ, દિલ્હીની નવી મોતી બાગ કોલોની સ્થિત CEC જ્ઞાનેશ કુમારના ઘરની બહાર તેમજ અંદર સુરક્ષાના ચુસ્ત બંદોબસ્ત કરવામાં આવ્યા છે. કોલોનીની બહાર અર્ધસૈનિક બળોથી ભરેલી એક આખી બસ તૈનાત કરી દેવામાં આવી અને આવતા-જતા દરેક વ્યક્તિ પર ચાંપતી નજર રાખવામાં આવી રહી છે.
ચૂંટણી પંચના મુખ્યાલય ખાતે સુરક્ષા બંદોબસ્ત
આ સિવાય દિલ્હીના અશોક રોડ પર આવેલા ચૂંટણી પંચના મુખ્યાલય (નિર્વાચન સદન) ની અંદર અને બહાર પણ સુરક્ષા વ્યવસ્થા અત્યંત કડક કરી દેવામાં આવી છે. નિર્વાચન સદન ખાતે કેન્દ્રીય ઔદ્યોગિક સુરક્ષા બળ (CISF) ઉપરાંત રેપિડ એક્શન ફોર્સ (RAF), CRPF અને દિલ્હી પોલીસના જવાનોને પણ મોટા પાયે તૈનાત કરવામાં આવ્યા છે.