Summer Vacation Places in India: ઉનાળાની ઋતુ આવતાની સાથે જ બાળકોની લાંબી રજાઓની આતુરતા પણ વધી રહી છે. કાળઝાળ ગરમી અને શહેરના ઘોંઘાટથી દૂર, કોઈ ઠંડા અને શાંત સ્થળે પરિવાર સાથે સમય વિતાવવો એ માત્ર આનંદદાયક જ નહીં, પણ માનસિક શાંતિ માટે પણ જરૂરી છે. જો તમે આ વેકેશનમાં ક્યાં જવું તેની મૂંઝવણમાં હોવ, તો ભારતનાં આ 5 સ્થળો તમારા વેકેશનને યાદગાર બનાવી દેશે.
મનાલી, હિમાચલ પ્રદેશ
ઉત્તર ભારતનું આ સૌથી લોકપ્રિય હિલ સ્ટેશન છે. મનાલી તેની ઠંડી આબોહવા, દેવદારના ઊંચા વૃક્ષો અને બિયાસ નદીના ખળખળ વહેતા પાણી માટે જાણીતું છે. તેમજ રોહતાંગ પાસ અને સોલાંગ ખીણમાં મે મહિનામાં પણ જોવા મળતો બરફ બાળકોને ખૂબ જ રોમાંચિત કરે છે. અહીં તેઓ સ્નો-બોલથી રમી શકે છે. ત્યા મુખ્ય પ્રવૃત્તિઓમાં રિવર રાફ્ટિંગ, પેરાગ્લાઇડિંગ, હિડિમ્બા દેવી મંદિરના દર્શન અને મોલ રોડ પરની ખરીદી છે.
ઉટી, તમિલનાડુ
દક્ષિણ ભારતમાં નીલગિરીની ટેકરીઓ વચ્ચે વસેલું ઉટી તેના ચાના બગીચાઓ અને સુંદર હવામાન માટે પ્રખ્યાત છે. અહીંની 'નીલગિરી માઉન્ટેન રેલ્વે'ટોય ટ્રેન ની સફર બાળકો માટે જાદુઈ અનુભવ જેવી હોય છે. પહાડો અને સુરંગોમાંથી પસાર થતી આ ટ્રેન તેમને ખૂબ ગમશે.ત્યા મુખ્ય પ્રવૃત્તિઓમાં ઉટી તળાવમાં બોટિંગ, બોટનિકલ ગાર્ડનની મુલાકાત અને ડોડાબેટ્ટા પીક પરથી કુદરતી સૌંદર્યનો નજારો છે.
મુન્નાર, કેરળ
જો તમે તમારા બાળકોને પ્રકૃતિની એકદમ નજીક લઈ જવા માંગતા હોય, તો મુન્નાર શ્રેષ્ઠ વિકલ્પ છે. ધુમ્મસથી ઢંકાયેલી ટેકરીઓ અને હરિયાળી આંખોને ઠંડક આપે છે. ઈરાવિકુલમ નેશનલ પાર્કમાં નીલગિરી તાહર જોવું એ બાળકો માટે નવો અનુભવ હશે. ચાના મ્યુઝિયમમાં ચા કેવી રીતે બને છે તે જોવું પણ રસપ્રદ રહેશે.ત્યા મુખ્ય પ્રવૃત્તિઓમાં ચાના બગીચાઓની લટાર, માટ્ટુપેટ્ટી ડેમ અને ઈકો પોઈન્ટની મુલાકાત છે.
લેહ-લદ્દાખ
જો તમારા પરિવારને સાહસ પસંદ હોય, તો લદ્દાખની સફર જીવનભરનું સંભારણું બની રહેશે. અહીંના પહાડો અને વાદળી તળાવો કોઈ બીજા જ ગ્રહ જેવો અહેસાસ કરાવે છે. નુબ્રા વેલીમાં બે ખૂંધવાળા ઊંટની સવારી અને મેગ્નેટિક હિલનો અનુભવ બાળકોને વિજ્ઞાન અને કુદરતના કરિશ્મા જેવો લાગશે.ત્યા મુખ્ય પ્રવૃત્તિઓમાં પેંગોંગ તળાવની મુલાકાત, શાંતિ સ્તૂપ અને બૌદ્ધ મઠોનું દર્શન છે.
નૈનીતાલ, ઉત્તરાખંડ
ઉત્તરાખંડનું નૈનીતાલ તેના સુંદર તળાવો અને આહલાદક વાતાવરણ માટે જાણીતું છે. દિલ્હીની નજીક હોવાથી અહીં પહોંચવું ખૂબ જ સરળ છે. 'કેવ ગાર્ડન' (ગુફા બગીચો) માં વિવિધ ગુફાઓમાંથી પસાર થવું એ બાળકો માટે એક એડવેન્ચર ગેમ જેવું હોય છે.ત્યા મુખ્ય પ્રવૃત્તિઓમાં નૈની તળાવમાં નૌકાવિહાર, રોપ-વે ની સફર અને નૈની પીક પર ટ્રેકિંગ છે.
મુસાફરી માટે કેટલીક ખાસ ટિપ્સ
- ઉનાળામાં આ સ્થળોએ ભારે ભીડ હોય છે, તેથી હોટલ અને ટિકિટ વહેલી તકે બુક કરાવો.
- પહાડી વિસ્તારોમાં રાત્રે તાપમાન ઘટી શકે છે, તેથી બાળકો માટે હળવા જેકેટ કે સ્વેટર સાથે રાખવા.
- ઊંચાઈવાળા વિસ્તારોમાં ખાસ કરીને લેહમાં પુષ્કળ પાણી પીવું અને શરીરને વાતાવરણ સાથે અનુકૂળ થવા માટે પૂરતો આરામ આપવો.
આ પાંચેય સ્થળો કુદરતી સુંદરતા અને મનોરંજનનો અદભૂત સંગમ છે, જે તમારા પરિવારના વેકેશનને ખરેખર યાદગાર બનાવશે.