આજની વ્યસ્ત જીવનશૈલીમાં બાળકો અને માતા-પિતા ભાગ્યે જ સાથે સમય વિતાવે છે. ખાસ કરીને નોકરી કરતા માતા-પિતા તેમના બાળકો માટે ભાગ્યે જ સમય કાઢે છે. જેના કારણે માતા-પિતા અને બાળકોના સંબંધોમાં ધીમે ધીમે અંતર આવવા લાગે છે. આવી સ્થિતિમાં માતા-પિતા માટે બાળકો સાથેના સંબંધને સુધારવો સરળ નથી. જોકે, કેટલીક બાબતોને ધ્યાનમાં રાખીને તમે તમારા અને તમારા બાળકો વચ્ચેના બોન્ડિંગને મજબૂત બનાવી શકો છો.
બાળકોની સાથે જમો અથવા ફરવા જાવ
માતા-પિતાએ રજાના દિવસે ઘરે જ રહેવું જોઈએ અને લંચ, ડિનર અથવા નાસ્તો બાળકોની સાથે જ કરવો જોઈએ. બાળકોને ખુશ કરવા માટે તમે રજાના દિવસે ડિનર અથવા બહાર ફરવાનો પ્લાન બનાવો. આમ કરવાથી બાળક તમારી સાથે ઇમોશનલી અટેચ થશે.
મજાક-મસ્તી કરો
વ્યસ્ત જીવનશૈલીની વચ્ચે બાળકો માટે થોડો સમય ચોક્કસ કાઢો. તમે તેમની સાથે ઘરે રહીને થોડી મસ્તી, મજાક અથવા કેટલીક ગેમ રમી શકો છો. તમે બાળકોની પસંદગીનું કામ કરીને તેમની સાથે જોડાઈ શકો છો.
બાળકોની સાથે ગેમ રમો
દરેક માતા-પિતાએ તેમના બાળકોની સાથે વધુ નહીં તો થોડો સમય પસાર કરવો જોઈએ. જેમ કે તમે બાળકોની સાથે ગેમ રમો, હોમવર્ક કરતી વખતે બાજુમાં બેસો વગેરે. આમ કરવાથી તમારું બાળક ઈલેક્ટ્રોનિક ડિવાઇસ અને ફોનથી દૂર રહેશે અને બાળકનો તમારી સાથે સંબંધ વધુ મજબૂત બનશે.
બાળકોને પ્રેમ કરો
તમારા વ્યસ્ત શેડ્યૂલમાં પણ બાળકોને પ્રેમ કરવાનું ભૂલશો નહીં. તેનાથી તમારો સંબંધ ખૂબ જ મજબૂત થશે. જણાવી દઈએ કે જે બાળકોને પ્રેમ અને સ્નેહ મળે છે તેઓ ઘણા ખુશ રહે છે અને ઝડપથી બીમાર પણ નથી થતા.
લાગણીઓને સમજો
માતાપિતાએ એ વાતનું ખાસ ધ્યાન રાખવું જોઈએ કે તેઓ બાળકોની દરેક વાત ધ્યાનથી સાંભળે. આમ કરવાથી તમે તેમના મનમાં શું ચાલી રહ્યું છે તે જાણી શકો છો.