Desi Masala Vada Recipe: કાળી ચૌદશના દિવસે ગુજરાતના અનેક ઘરોમાં પરંપરા મુજબ ખાસ નાસ્તો અને સ્વાદિષ્ટ વાનગીઓ બનાવવામાં આવે છે. આ દિવસે કંઈક તીખું, ચટપટું અને કરકરું ખાવાનું મન થાય તો દેશી મસાલા વડા બનાવી શકાય છે. ચણાની દાળ, લસણ, લીલાં મરચાં અને વરિયાળી જેવા મસાલાથી તૈયાર થતા આ વડા સ્વાદમાં એકદમ મજેદાર લાગે છે. સાંજના નાસ્તામાં ગરમાગરમ મસાલા વડા ચટણી સાથે પીરસશો તો પરિવારના દરેક સભ્યને ભાવશે.
મસાલા વડા બનાવવા માટેની સામગ્રી
- ચણાની દાળ – 1 કપ
- લીલા મરચાં – 3 થી 4
- આદુ – 1 નાનો ટુકડો
- લસણ – 5 થી 6 કળી
- સમારેલી ડુંગળી – 1 નંગ
- લીલા ધાણા – ½ કપ
- વરિયાળી – 1 ચમચી
- ધાણા જીરું પાઉડર – 1 ચમચી
- લાલ મરચું પાઉડર – ½ ચમચી
- હળદર – ¼ ચમચી
- ગરમ મસાલો – ½ ચમચી
- હિંગ – 1 ચપટી
- મીઠું – સ્વાદ અનુસાર
- તેલ – તળવા માટે
દેશી મસાલા વડા બનાવવાની રીત
સૌથી પહેલાં ચણાની દાળને બેથી ત્રણ વખત પાણીથી ધોઈને 3થી 4 કલાક માટે પલાળી રાખો. દાળ પલળી જાય પછી તેનું બધું પાણી નિતારી લો. હવે મિક્સરમાં દાળને અધકચરી પીસી લો. ધ્યાન રાખો કે દાળની પેસ્ટ એકદમ ઝીણી ન થવી જોઈએ, કારણ કે દાળના નાના દાણા વડાને કરકરા બનાવવામાં મદદ કરે છે.
હવે પીસેલી દાળને એક મોટા વાસણમાં કાઢો. તેમાં સમારેલી ડુંગળી, લીલા મરચાં, આદુ-લસણની પેસ્ટ અને લીલા ધાણા ઉમેરો. ત્યારબાદ વરિયાળી, ધાણા જીરું પાઉડર, લાલ મરચું, હળદર, ગરમ મસાલો, હિંગ અને સ્વાદ અનુસાર મીઠું નાખીને બધી સામગ્રીને બરાબર મિક્સ કરી લો.
હવે હાથમાં થોડું તેલ લગાવીને મિશ્રણમાંથી નાના-નાના ગોળા બનાવો અને તેને હથેળીથી દબાવીને વડાનો આકાર આપો. વડા બહુ જાડા ન રાખવા, જેથી તે અંદર સુધી બરાબર ચડી જાય અને બહારથી પણ સરસ કરકરા બને.
એક કડાઈમાં તેલ ગરમ કરવા મૂકો. તેલ મધ્યમ ગરમ થાય એટલે તેમાં ધીમે ધીમે વડા નાખો. વડાને મધ્યમ તાપે બંને બાજુથી ગોલ્ડન બ્રાઉન અને કરકરા થાય ત્યાં સુધી તળી લો. ત્યારબાદ તેને ટિશ્યુ પેપર પર કાઢી લો. તો તૈયાર છે કાળી ચૌદશ સ્પેશિયલ ગરમાગરમ દેશી મસાલા વડા. તેને લીલી ચટણી, લસણની ચટણી અથવા ગરમાગરમ ચા સાથે સર્વ કરો.