Diwali Activities for Kids: દિવાળીની રજાઓ એટલે બાળકો માટે મોજમસ્તી અને નવી વસ્તુઓ શીખવાનો સમય. આ દિવસોમાં બાળકોને મોબાઇલ કે ટીવીમાં વ્યસ્ત રાખવાને બદલે તેમની સાથે કેટલીક મજેદાર એક્ટિવિટી કરી શકાય છે. આવી પ્રવૃત્તિઓથી બાળકોની કલ્પનાશક્તિ, સર્જનાત્મકતા અને નવી વસ્તુઓ બનાવવાની આવડતનો વિકાસ થાય છે. તો ચાલો જાણીએ દિવાળીમાં બાળકો સાથે ઘરે જ કરી શકાય તેવી 5 સરળ અને ક્રિએટિવ એક્ટિવિટી વિશે.
દિવાળીમાં બાળકો સાથે કરી શકાય તેવી 5 ક્રિએટિવ એક્ટિવિટી
1. માટીના દીવાઓને આપો રંગબેરંગી લુક
દિવાળી માટે બજારમાંથી સાદા માટીના દીવા લાવી બાળકોને પોતાની પસંદના રંગોથી સજાવવા આપો. તેઓ દીવા પર ફૂલો, પાન, ટપકાં અને સુંદર ડિઝાઇન બનાવી શકે છે. દીવા તૈયાર થયા પછી તેનો ઉપયોગ ઘરની સજાવટ માટે કરી શકાય છે.
2. રંગબેરંગી ફૂલોથી બનાવો રંગોળી
બાળકો સાથે મળીને ફૂલોના પાંદડાં અને રંગબેરંગી ચોખાનો ઉપયોગ કરીને નાની રંગોળી બનાવો. શરૂઆતમાં ગોળ, ચોરસ કે ફૂલની ડિઝાઇન પસંદ કરો. બાળકોને પોતાની પસંદના રંગો પસંદ કરવા દો. આ પ્રવૃત્તિથી તેમની કલ્પનાશક્તિ અને રંગોની સમજ વધશે.
3. રંગીન કાગળમાંથી બનાવો સુંદર દિવાળી ફાનસ
દિવાળીમાં ઘરને સજાવવા માટે બાળકો સાથે મળીને રંગીન કાગળમાંથી સુંદર ફાનસ બનાવી શકાય છે. તેના માટે કલરફુલ પેપર, ગુંદર, દોરી અને બાળકો માટે સુરક્ષિત કાતરની જરૂર પડશે. બાળકો પોતાની પસંદગીના રંગો અને ડિઝાઇનથી ફાનસને સજાવી શકે છે. ફાનસ તૈયાર થયા પછી તેને ઘરના દરવાજા કે બાલ્કનીમાં લટકાવી શકાય છે.
4. પરિવાર માટે બનાવો હેન્ડમેડ દિવાળી કાર્ડ
બાળકોને કલરફુલ પેપર આપીને દિવાળીના શુભેચ્છા કાર્ડ બનાવવાનું કહો. કાર્ડ પર દીવો, ફટાકડા, રંગોળી અને ફૂલોનાં ચિત્રો દોરી શકાય છે. સાથે જ તેઓ પોતાના દાદા-દાદી, મિત્રો અને પરિવારના સભ્યો માટે શુભેચ્છા સંદેશ પણ લખી શકે છે.
5. દિવાળી પર રમો મજેદાર ક્વિઝ ગેમ
દિવાળી માત્ર સજાવટ અને મીઠાઈઓનો તહેવાર નથી, પરંતુ બાળકોને તેની સાથે જોડાયેલી પરંપરાઓ વિશે શીખવવાની પણ સારી તક છે. બાળકો સાથે દિવાળી સંબંધિત ક્વિઝ રાખો. જેમ કે ભગવાન રામ કેટલા વર્ષના વનવાસ પછી અયોધ્યા પાછા ફર્યા હતા? દિવાળીના દિવસે કયા દેવી-દેવતાની પૂજા કરવામાં આવે છે? આ રીતે રમત-રમતમાં બાળકોને તહેવાર વિશે નવી માહિતી મળશે.
બાળકો સાથે એક્ટિવિટી કરતી વખતે આટલી સાવચેતી રાખો
- બાળકોને દીવા કે મીણબત્તી જાતે પ્રગટાવવા ન આપો.
- કાતર અને અન્ય ધારદાર વસ્તુઓનો ઉપયોગ વડીલોની દેખરેખમાં કરાવો.
- પેપર ક્રાફ્ટ અને આકાશકંદીલમાં અસલી આગને બદલે LED લાઇટનો ઉપયોગ કરો.
- બાળકોની ઉંમર પ્રમાણે જ એક્ટિવિટી પસંદ કરો.