Amla recipes for winter: શિયાળાની ઋતુમાં બજારમાં તાજાં આંબળા ભરપૂર પ્રમાણમાં જોવા મળે છે. ખટમીઠા સ્વાદવાળાં આંબળાનો ઉપયોગ માત્ર મુખવાસ કે સીધા ખાવા પૂરતો મર્યાદિત નથી. તેમાંથી અનેક સ્વાદિષ્ટ વાનગીઓ તૈયાર કરી શકાય છે. ખાસ વાત એ છે કે આંબળાને અલગ-અલગ રીતે તૈયાર કરીને લાંબા સમય સુધી પણ સાચવી શકાય છે. જો તમે પણ આ સિઝનમાં આંબળાનો સ્વાદ માણવા માંગતા હોવ તો ચટણીથી લઈને જામ અને કેન્ડી સુધીની આ 7 વાનગીઓ ઘરે ચોક્કસ બનાવી શકો છો.
આંબળામાંથી શું-શું બનાવી શકાય? જાણો 7 સ્વાદિષ્ટ રેસિપી
ખટમીઠી આંબળાની ચટણી
રોજના ભોજનમાં કંઈક ચટાકેદાર ખાવાની ઇચ્છા હોય તો આંબળાની ચટણી સારો વિકલ્પ છે. તેના માટે પહેલાં આંબળાને ધોઈને થોડા પાણીમાં બાફી લો. ઠંડાં થયા પછી તેના ઠળિયા કાઢી નાના ટુકડા કરી લો. હવે મિક્સરમાં આંબળા, લીલાં મરચાં, કોથમીર, આદુ, જીરું અને સ્વાદ પ્રમાણે મીઠું ઉમેરી પીસી લો. જરૂર જણાય તો થોડું પાણી ઉમેરો. તૈયાર ચટણીને રોટલી, પરાઠા કે દાળ-ભાત સાથે પીરસી શકાય છે.
મસાલેદાર આંબળાનું અથાણું
અથાણાંના શોખીનો માટે આંબળાનું અથાણું એક સરસ પસંદગી બની શકે છે. આંબળાને ધોઈને સારી રીતે સૂકવી લો. ત્યારબાદ તેને વરાળમાં બાફીને થોડાં નરમ કરો અને ઠંડાં થયા પછી તેના ટુકડા કરી લો. હવે તેમાં રાઈનું તેલ, હળદર, લાલ મરચું, વરિયાળી, મેથીના દાણા અને મીઠું મિક્સ કરો. તૈયાર મિશ્રણને સ્વચ્છ અને સૂકા કાચના બરણીમાં ભરી રાખો. અથાણું લાંબો સમય સારું રહે તે માટે તેમાં પાણી કે ભેજ ન જવા દેવો.
ગળ્યું આંબળાનું મુરબ્બો
જેમને ગળ્યું ખાવું ગમે છે તેમના માટે આંબળાનો મુરબ્બો બનાવી શકાય છે. સૌથી પહેલાં આંબળાને ધોઈને કાંટાની મદદથી તેમાં થોડાં કાણાં પાડી લો. હવે તેને થોડું બાફી લો. બીજી તરફ એક વાસણમાં ખાંડ અને પાણી નાખીને ચાસણી તૈયાર કરો. તેમાં બાફેલાં આંબળા ઉમેરી ધીમી આંચ પર પકાવો. આંબળા ચાસણીનો સ્વાદ બરાબર શોષી લે ત્યારબાદ ગેસ બંધ કરી દો. ઠંડું થયા પછી તેને કાચની બરણીમાં ભરી શકાય છે.
બાળકો માટે આંબળાની કેન્ડી
બાળકોને આંબળા ખવડાવવા માટે તેની કેન્ડી એક મજેદાર રીત છે. આંબળાને બાફીને તેની ચીરીઓ અલગ કરી લો અને ઠળિયા કાઢી નાખો. હવે તેમાં ખાંડ ઉમેરી થોડા કલાક માટે રહેવા દો, જેથી આંબળામાંથી રસ છૂટે. ત્યારબાદ આ મિશ્રણને ધીમી આંચ પર થોડી વાર પકાવો. ચીરીઓને બહાર કાઢીને એક થાળીમાં અલગ-અલગ પાથરી દો અને સારી રીતે સૂકવવા દો. કેન્ડી સંપૂર્ણપણે સૂકાઈ જાય પછી તેને એરટાઇટ ડબ્બામાં ભરી રાખો.
તાજું આંબળાનું જ્યૂસ
સવારે પીવા માટે તાજું અને ખટમીઠું પીણું બનાવવું હોય તો આંબળાનો જ્યૂસ અજમાવી શકો છો. આંબળાને ધોઈને તેના નાના ટુકડા કરો અને ઠળિયા કાઢી લો. હવે મિક્સરમાં થોડું પાણી ઉમેરીને બરાબર પીસી લો. તૈયાર મિશ્રણને ગાળીને તેમાં સ્વાદ પ્રમાણે સંચળ મિક્સ કરો. આ જ્યૂસને તાજું જ પીવું વધુ સારું રહે છે. સ્વાદ માટે તેમાં થોડું લીંબુ કે ફુદીનાનાં પાન પણ ઉમેરી શકાય છે.
બ્રેડ અને પરાઠા સાથે ખાવા માટે આંબળાનો જામ
નાસ્તામાં બ્રેડ સાથે જામ ખાવાનું પસંદ હોય તો ઘરે આંબળાનો જામ પણ તૈયાર કરી શકાય છે. સૌપ્રથમ આંબળાને બાફીને તેનો ગર કાઢી લો. હવે એક કડાઈમાં આંબળાનો ગર અને ખાંડ મિક્સ કરીને ધીમી આંચ પર ગરમ કરો. મિશ્રણને સતત હલાવતા રહો, જેથી તે કડાઈના તળિયે ચોંટે નહીં. ધીમે-ધીમે મિશ્રણ ઘટ્ટ થવા લાગે ત્યારે ગેસ બંધ કરી દો. ઠંડું થયા પછી જામને સ્વચ્છ બરણીમાં ભરીને ફ્રિજમાં રાખો.
લાંબા સમય સુધી ઉપયોગી આંબળાનો પાવડર
આંબળાની સિઝન પૂરી થયા પછી પણ તેનો ઉપયોગ ચાલુ રાખવો હોય તો ઘરે તેનો પાવડર બનાવી શકાય છે. તેના માટે આંબળાને ધોઈને પાતળા ટુકડા કરી લો અને ઠળિયા દૂર કરો. હવે આ ટુકડાઓને સ્વચ્છ થાળીમાં પાથરી તડકામાં સંપૂર્ણપણે સૂકવી દો. ટુકડાઓમાં જરાય ભેજ ન રહે તેની કાળજી રાખવી. ત્યારબાદ મિક્સરમાં પીસીને બારીક પાવડર તૈયાર કરો. આ પાવડરને હવાચુસ્ત ડબ્બામાં ભરીને સૂકી જગ્યાએ રાખો. જરૂરિયાત મુજબ તેનો ઉપયોગ કરી શકાય છે.