US Air Strike Syria: અમેરિકી સેનાએ સીરિયામાં આતંકવાદી સંગઠન ISIS વિરુદ્ધ ‘ઓપરેશન હૉકઆઈ સ્ટ્રાઈક’ શરૂ કર્યું છે. આ ઓપરેશન હેઠળ સેનાએ ઈસ્લામિક સ્ટેટ ઓફ સીરિયા એન્ડ ઈરાક (ISIS) ના 70 થી વધુ ઠેકાણાઓ પર ભીષણ બોમ્બમારો કર્યો છે. આ હવાઈ હુમલામાં અનેક આતંકવાદીઓ માર્યા ગયા છે અને તેમના આતંકી ઠેકાણાઓ સંપૂર્ણપણે તબાહ થઈ ગયા છે.
અમેરિકાનો બદલો
અમેરિકાએ આ આક્રમક કાર્યવાહી ગત 13 ડિસેમ્બરે સીરિયાના પલ્માયરા શહેરમાં થયેલા આતંકી હુમલાનો બદલો લેવા માટે કરી છે. તે હુમલામાં અમેરિકાના બે સૈનિકો અને એક નાગરિકનું મોત થયું હતું. અમેરિકી રક્ષા મંત્રી પીટ હેગસેથ અને રાષ્ટ્રપતિ ડોનાલ્ડ ટ્રમ્પે પોતે આ હુમલાની પુષ્ટિ કરી છે. રક્ષા મંત્રીએ જણાવ્યું હતું કે અમેરિકાએ તેના ભાઈઓના મોતનો બદલો લઈને દુશ્મનોને પાઠ ભણાવ્યો છે.
આતંકીઓને કડક ચેતવણી
રક્ષા મંત્રી પીટ હેગસેથે સ્પષ્ટપણે જણાવ્યું છે કે આ હુમલો ISIS ના લડવૈયાઓ, તેમના ઈન્ફ્રાસ્ટ્રક્ચર અને હથિયારોના ડેપોને ખતમ કરવા માટે કરવામાં આવ્યો છે. તેમણે સોશિયલ મીડિયા પર પોસ્ટ કરીને ચેતવણી આપી કે, હુમલાખોર દુનિયાના કોઈપણ ખૂણે છુપાયેલો હશે, અમેરિકા ત્યાં ઘૂસીને તેને મોતની સજા આપશે. તેમણે વધુમાં ઉમેર્યું કે આ કોઈ યુદ્ધની શરૂઆત નથી, પરંતુ અમેરિકી દળો પર થયેલા હુમલાનો સીધો જવાબ છે.
રાષ્ટ્રપતિ ડોનાલ્ડ ટ્રમ્પનું નિવેદન
રાષ્ટ્રપતિ ડોનાલ્ડ ટ્રમ્પે તેમના 'ટ્રુથ સોશિયલ' એકાઉન્ટ પર જણાવ્યું કે અમેરિકા પોતાના દેશભક્તોના હત્યારાઓને છોડશે નહીં. તેમણે કહ્યું કે જો ISIS નો સફાયો થઈ જશે તો સીરિયાનું ભવિષ્ય ઉજ્જવળ છે. ટ્રમ્પે એમ પણ જણાવ્યું કે સીરિયાની સરકાર પણ ISIS ના સફાયા માટે અમેરિકાના આ અભિયાનમાં સાથ આપી રહી છે. તેમણે આતંકીઓને ચેતવતા કહ્યું કે જેઓ અમેરિકનો પર હુમલો કરવાનું કાવતરું ઘડે છે તેઓ ધ્યાન રાખે કે જ્યારે અમેરિકા વળતો હુમલો કરશે ત્યારે તેમને બચવાની તક પણ નહીં મળે.