Donald Trump Russian Oil Tariff: અમેરિકાના રાષ્ટ્રપતિ ડોનાલ્ડ ટ્રમ્પે શુક્રવારે એક મહત્વકાંક્ષી અને કડક બિલ 'લિન્ડસે ઓ. ગ્રેહામ સેન્ક્શનિંગ રશિયા એન્ડ ઈરાન એક્ટ 2026' પર હસ્તાક્ષર કરીને તેને વિધિવત કાયદાનું સ્વરૂપ આપ્યું છે. અમેરિકાએ ભારત અને ચીન જેવા મિત્ર તેમજ ભાગીદાર દેશો સાથેના દ્વિપક્ષીય સંબંધો પર થનારી અસરોને અવગણીને રશિયા અને ઈરાન સામેના આ કડક કાયદાને મંજૂરી આપી દીધી છે, જેનાથી વૈશ્વિક ઉર્જા બજાર અને કૂટનીતિમાં ભારે ખળભળાટ મચી ગયો છે.
100 ટકા ટેરિફ અને કડક પ્રતિબંધોની જોગવાઈ
આ નવા કાયદા હેઠળ અમેરિકી રાષ્ટ્રપતિને રશિયા પાસેથી ક્રૂડ ઓઈલ અને નેચરલ ગેસની ખરીદી કરતા દેશો પર 100 ટકા સુધીના આકરા ટેરિફ લાદવાની સંપૂર્ણ સત્તા આપવામાં આવી છે. આ જોગવાઈથી રશિયન તેલના સૌથી મોટા ખરીદદાર દેશો એવા ભારત અને ચીન પર સીધી અને ગંભીર અસર પડવાની ચિંતા વ્યક્ત કરવામાં આવી રહી છે. આ કાયદાનો મુખ્ય ઉદ્દેશ્ય યુક્રેન યુદ્ધ વચ્ચે મોસ્કોના નાણાકીય સ્ત્રોતો, સંરક્ષણ નેટવર્ક અને ઉર્જા ક્ષેત્રમાંથી મળતી આવકના પ્રવાહને સંપૂર્ણપણે કાપી નાખવાનો છે.
હાઉસ ઓફ રિપ્રેઝન્ટેટિવ્સમાં બિલ પસાર, ડેમોક્રેટ્સમાં વિભાજન
રિપબ્લિકન પક્ષના નેતૃત્વવાળા યુએસ હાઉસ ઓફ રિપ્રેઝન્ટેટિવ્સે બુધવારે 262 વિરુદ્ધ 159 મતોથી આ કાયદાકીય પેકેજને લીલી ઝંડી આપી હતી. આ બિલમાં રશિયાને લશ્કરી સહાય પૂરી પાડતી વિદેશી સંસ્થાઓ અને ઈરાન સંબંધિત પ્રતિબંધોને પણ આવરી લેવામાં આવ્યા છે. જોકે, ડેમોક્રેટિક પાર્ટીમાં ટેરિફ લાદવાની રાષ્ટ્રપતિની અનિયંત્રિત સત્તાઓને લઈને વિભાજન જોવા મળ્યું હતું, કારણ કે તેઓ યુક્રેનને સહાયના પક્ષમાં હોવા છતાં ટ્રમ્પને વેપાર અંગે વધુ સત્તા આપવાનો વિરોધ કરી રહ્યા હતા.
યુક્રેનનો આભાર, ભારતનો સ્પષ્ટ જવાબ
યુક્રેનના રાષ્ટ્રપતિ વોલોડીમીર ઝેલેન્સકીએ આ કાયદો પસાર થવા બદલ અમેરિકી સંસદ અને ટ્રમ્પ પ્રશાસનનો આભાર માન્યો હતો. બીજી તરફ, ભારતે ગુરુવારે જ પોતાનું વલણ સ્પષ્ટ કરતા જણાવ્યું હતું કે દેશની ઉર્જા સુરક્ષા અને નાગરિકોના હિતોને ધ્યાનમાં રાખીને ભારત પોતાના 'વિવિધ સ્ત્રોતો' પાસેથી તેલની ખરીદી ચાલુ જ રાખશે.