Strait of Hormuz Attack: મધ્ય પૂર્વમાં વધતા ભૌગોલિક તણાવ વચ્ચે હોરમૂઝની સામુદ્રધુની (Strait of Hormuz) માં 29 અને 30 ઓક્ટોબરના રોજ બે ઓઈલ ટેન્કરોને નિશાન બનાવીને હુમલા કરવામાં આવ્યા છે. આ બંને ટેન્કરો પર કુલ 29 ભારતીય નાવિકો સવાર હતા. ઘટના અંગે માહિતી આપતા બંદર, જહાજ અને જળમાર્ગ મંત્રી સર્બાનંદ સોનોવાલે શુક્રવારે જણાવ્યું હતું કે તમામ 29 ભારતીય નાવિકો સંપૂર્ણપણે સુરક્ષિત છે અને તેમને કોઈ ઈજા પહોંચી નથી. ભારત સરકાર પરિસ્થિતિ પર સતત નજર રાખી રહી છે અને ક્રૂની સુરક્ષા સુનિશ્ચિત કરવા જહાજ વ્યવસ્થાપન કંપનીઓના સંપર્કમાં છે.
લિમ્પેટ માઈન્સ વડે કરાયો ભીષણ હુમલો
બંદર અને જહાજ મંત્રી સોનોવાલે સોશિયલ મીડિયા પ્લેટફોર્મ 'X' પર વિગતો આપતાં જણાવ્યું હતું કે, 29 ઓક્ટોબરના રોજ લાઈબેરિયાના ધ્વજ હેઠળના સુપરટેન્કર 'MT અર્ઝાના' (MT Arzana) પર હુમલો થયો હતો, જેમાં બે ભારતીય ક્રૂ સભ્યો સવાર હતા. ત્યારબાદ 30 ઓક્ટોબરે પનામાના ધ્વજ હેઠળના ક્રૂડ ઓઈલ ટેન્કર 'MT લુઈસ 1' (MT Lewis 1) ને નિશાન બનાવવામાં આવ્યું હતું, જેના પર ૨૭ ભારતીય નાવિકો સવાર હતા.
સમુદ્રી સુરક્ષા સૂત્રોના જણાવ્યા અનુસાર, 'MT લુઈસ 1' ના બાહ્ય માળખા સાથે બે 'લિમ્પેટ માઈન્સ' જોડીને ધમાકો કરવામાં આવ્યો હતો. આ વિસ્ફોટને કારણે જહાજના એન્જિન રૂમમાં આગ લાગી હતી અને પ્રોપલ્શન કામચલાઉ ધોરણે ઠપ થઈ ગયું હતું. જોકે, ક્રૂ સભ્યોની ત્વરિત કામગીરીથી આગ પર કાબૂ મેળવી લેવાયો હતો અને જહાજ તેના ગંતવ્ય તરફ આગળ વધી ગયું હતું. ફેબ્રુઆરીમાં અમેરિકા-ઈરાન તણાવ શરૂ થયા પછી આ વિસ્તારમાં વિસ્ફોટકોથી થયેલો આ પ્રથમ સફળ હુમલો છે.
ક્રૂડ ઓઈલમાં 2.5% નો ઉછાળો અને અમેરિકી લશ્કરી વિકલ્પો
આ હુમલાઓ અને તણાવની સીધી અસર વૈશ્વિક તેલ બજાર પર જોવા મળી છે. 'અલ જઝીરા'ના અહેવાલ મુજબ, આંતરરાષ્ટ્રીય માર્કેટમાં ક્રૂડ ઓઈલના ભાવ 2.5 ટકા વધીને પ્રતિ બેરલ 118 ડૉલર સુધી પહોંચી ગયા છે. જ્યારે અમેરિકામાં 'વેસ્ટ ટેક્સાસ ઈન્ટરમીડિયેટ' (WTI) ક્રૂડનો ભાવ 2 ટકા વધીને પ્રતિ બેરલ 104 ડૉલર થયો છે.
બીજી તરફ, ઈરાને દાવો કર્યો છે કે તેણે એક 'સબમરીન ડ્રોન' ડૂબાડી દીધું છે અને હોરમૂઝની સામુદ્રધુનીમાં અન્ય બે જહાજોને જપ્ત કર્યા છે. 'ધ વોલ સ્ટ્રીટ જર્નલ'ના અહેવાલો મુજબ, યુએસ સેન્ટ્રલ કમાન્ડના વડા એડમિરલ બ્રેડ કૂપરે સંરક્ષણ સચિવ પીટ હેગસેથ અને અન્ય ઉચ્ચ અધિકારીઓની હાજરીમાં વ્હાઇટ હાઉસ ખાતે રાષ્ટ્રપતિ ડોનાલ્ડ ટ્રમ્પને ઈરાન સામેના લશ્કરી વિકલ્પો અંગે માહિતી આપી છે. યુએસ મીડિયાના રિપોર્ટ્સ સૂચવે છે કે મધ્યવર્તી ચૂંટણીઓ બાદ ટ્રમ્પ ઈરાન સામે મોટી કાર્યવાહીની જાહેરાત કરી શકે છે.