Pia Dandiya: અમેરિકાની 2026ની મધ્યસત્ર ચૂંટણીઓ (US Midterm Elections 2026) માં ભારતીય-અમેરિકન સમુદાય માટે ગૌરવરૂપ ઐતિહાસિક સફળતા સામે આવી છે. દક્ષિણ ફ્લોરિડાના 22મા કોંગ્રેશનલ ડિસ્ટ્રિક્ટની ચૂંટણીમાં ભારતીય મૂળના ડેમોક્રેટ ઉમેદવાર પિયા દાંડિયાએ (Pia Dandiya) તેમના પ્રતિસ્પર્ધી રિપબ્લિકન ઉમેદવાર કેસી અસ્કરને પરાજય આપીને ભવ્ય વિજય મેળવ્યો છે. આ જીત સાથે પિયા દાંડિયા ફ્લોરિડામાંથી યુ.એસ. હાઉસ ઓફ રિપ્રેઝન્ટેટિવ્સમાં ચૂંટાયેલા પ્રથમ ભારતીય-અમેરિકન બન્યા છે.
સૌથી ચર્ચિત મુકાબલામાં 51.9% મતો સાથે મેળવી જીત
દક્ષિણ ફ્લોરિડામાં પિયા દાંડિયા અને કેસી અસ્કર વચ્ચેનો આ ચૂંટણી મુકાબલો 2026ની યુ.એસ. મિડટર્મ ચૂંટણીઓ દરમિયાન સમગ્ર દેશમાં સૌથી વધુ ચર્ચિત અને મહત્વપૂર્ણ સ્પર્ધાઓમાંનો એક રહ્યો હતો.
મંગળવાર, 3 નવેમ્બરના રોજ જાહેર થયેલા સત્તાવાર પરિણામો અનુસાર, હાઈ સ્કૂલના ભૂતપૂર્વ આચાર્ય એવા પિયા દાંડિયાએ કુલ 51.9 ટકા મત મેળવ્યા હતા, જ્યારે તેમના મુખ્ય હરીફ કેસી અસ્કરે 49.1 ટકા મત પ્રાપ્ત કર્યા હતા. આ વિજય બાદ તેઓ ફ્લોરિડાના નવા સીમાંકનવાળા 22મા કોંગ્રેશનલ ડિસ્ટ્રિક્ટનું પ્રતિનિધિત્વ કરશે.
યુ.એસ. કોંગ્રેસમાં ચૂંટાયેલા 10મા ભારતીય મૂળના નેતા
ભારતીય-અમેરિકન સમુદાય માટે આ વિજય એક અત્યંત મહત્વપૂર્ણ સીમાચિહ્ન સમાન છે. પિયા દાંડિયા યુ.એસ. કોંગ્રેસમાં ચૂંટાઈને પહોંચનારા ભારતીય મૂળના 10મા વ્યક્તિ બન્યા છે. તેમનો ચૂંટણી પ્રચાર મુખ્યત્વે ગુણવત્તાયુક્ત શિક્ષણ, દૈનિક જીવનનિર્વાહની પરવડે તેવી ક્ષમતા અને સ્થાનિક સ્તરે આર્થિક તકો ઊભી કરવા પર કેન્દ્રિત રહ્યો હતો.
જયપુર સાથે ખાસ સંબંધ અને પ્રેરણાદાયી કારકિર્દી
પિયા દાંડિયાનો જન્મ અને ઉછેર યુ.એસ.ના પામ બીચ કાઉન્ટીમાં થયો છે, પરંતુ તેઓ પ્રથમ પેઢીના ભારતીય-અમેરિકન છે. તેમના માતા-પિતા ૧૯૮૦માં રાજસ્થાનના જયપુરથી સ્થળાંતર કરીને અમેરિકામાં સ્થાયી થયા હતા.
પિયા દાંડિયા એક સફળ શિક્ષણવિદ્દ રહ્યા છે. તેમણે હાર્લેમમાં હાઈ સ્કૂલના આચાર્ય તરીકે સેવા આપી છે તથા 'વ્હાઇટ હાઉસ ફેલો' અને અગ્રણી ટેક કંપની 'એપલ' (Apple) માં પણ કામ કર્યું છે. માત્ર 28 વર્ષની યુવાન વયે તેમણે એક હાઈ સ્કૂલની સ્થાપના કરી હતી, જેનાથી તેઓ અમેરિકાના સૌથી યુવા આચાર્યોમાંના એક બન્યા હતા. આ શાળામાં અભ્યાસ કરતા 86 ટકા વિદ્યાર્થીઓ ઓછી આવક ધરાવતા પરિવારોમાંથી આવતા હોવા છતાં, તેમની સફળ કાર્યશૈલીને કારણે તમામ વિદ્યાર્થીઓએ કોલેજમાં પ્રવેશ મેળવ્યો હતો.
સમાચાર એજન્સી પીટીઆઈ - PTI ના ઇનપુટ્સ સાથે