Pakistan Petrol diesel prices: આર્થિક ખાડામાં ગરકાવ થયેલા પાકિસ્તાનની જનતા પર સરકારે ફરી એકવાર મોંઘવારીનો કોરડો વીંઝ્યો છે. મધ્ય પૂર્વ (Middle East) માં ચાલી રહેલા યુદ્ધ અને આંતરરાષ્ટ્રીય બજારમાં ક્રૂડ ઓઈલની વધતી કિંમતોને ટાંકીને પાકિસ્તાન સરકારે પેટ્રોલ અને ડીઝલના ભાવમાં રેકોર્ડબ્રેક વધારો કરવાની જાહેરાત કરી છે. નવા દરો આજ સવારથી જ અમલમાં આવી ગયા છે.
પેટ્રોલ અને ડીઝલના નવા આસમાની ભાવ
પાકિસ્તાનના પેટ્રોલિયમ મંત્રી અલી પરવેઝ મલિકે ગુરુવારે મોડી રાત્રે ભાવ વધારાની જાહેરાત કરી હતી. આ વધારો એક મહિના કરતા પણ ઓછા સમયમાં બીજી વખત કરવામાં આવ્યો છે:
- પેટ્રોલ: પેટ્રોલના ભાવમાં 42.7% નો વધારો થતા હવે નવી કિંમત 458.40 પાકિસ્તાની રૂપિયા ($1.64) પ્રતિ લિટર પર પહોંચી ગઈ છે.
- ડીઝલ: ડીઝલના ભાવમાં સૌથી વધુ 54.9% નો વધારો થયો છે, જેના કારણે હવે એક લિટર ડીઝલ માટે જનતાએ 520.35 પાકિસ્તાની રૂપિયા ($1.88) ચૂકવવા પડશે.
સંઘર્ષ અને આયાત પર નિર્ભરતા
પેટ્રોલિયમ મંત્રીએ જણાવ્યું હતું કે મધ્ય પૂર્વમાં ચાલી રહેલા સંઘર્ષને કારણે તેલ સંકટ ઊભું થયું છે, જેણે સમગ્ર વિશ્વને લપેટમાં લીધું છે. પાકિસ્તાન પોતાની તેલની જરૂરિયાતો માટે મુખ્યત્વે સાઉદી અરેબિયા અને યુએઈ (UAE) પર નિર્ભર છે. આ તેલ હોર્મુઝ સ્ટ્રેટ દ્વારા પરિવહન થાય છે, જ્યાં અત્યારે યુદ્ધ જેવી સ્થિતિને કારણે સપ્લાય ચેઈન ખોરવાઈ છે. નોંધનીય છે કે ગયા મહિને પણ સરકારે કિંમતોમાં 20% નો વધારો કર્યો હતો.
ટુ-વ્હીલર અને ખેડૂતો માટે સબસિડીની જાહેરાત
આટલા મોટા ભાવ વધારાથી સામાન્ય જનતામાં ફેલાયેલા રોષને શાંત કરવા સરકારે કેટલીક રાહતો જાહેર કરી છે:
- 1) ટુ-વ્હીલર સવારો: બાઇક સવારોને આગામી ત્રણ મહિના માટે પ્રતિ લિટર 100 રૂપિયાની સબસિડી આપવામાં આવશે. જોકે, આ મર્યાદા દર મહિને વધુમાં વધુ 20 લિટર સુધી જ રહેશે.
- 2) ખેડૂતો: કૃષિ ક્ષેત્રને બચાવવા માટે ખેડૂતો માટે પણ ખાસ સબસિડી પેકેજ તૈયાર કરવામાં આવ્યું છે જેથી ખાદ્ય સુરક્ષા પર અસર ન પડે.