India US Relation: અમેરિકાના વાણિજ્ય મંત્રી હોવર્ડ લુટનિકે સ્પષ્ટ કર્યું છે કે ભારતને અગાઉ જે ટ્રેડ ડીલની ઓફર કરવામાં આવી હતી, તે હવે મળશે નહીં. તેમના જણાવ્યા અનુસાર ભારત અને અમેરિકા એક સમજૂતી પર સહમત થયા હતા, પરંતુ ભારતે તે પ્રક્રિયા પૂર્ણ કરવામાં વિલંબ કર્યો, જેના કારણે તે હવે લાઇનમાં પાછળ રહી ગયું છે. લુટનિકે ભારપૂર્વક કહ્યું કે જે શરતો પર અગાઉ સહમતી બની હતી, તે હવે અસ્તિત્વમાં નથી.
પીએમ મોદીના ફોન ન કરવાને કારણે ડીલ નિષ્ફળ હોવાનો દાવો
હોવર્ડ લુટનિકના જણાવ્યા મુજબ વડાપ્રધાન નરેન્દ્ર મોદીએ રાષ્ટ્રપતિ ડોનાલ્ડ ટ્રમ્પને ફોન ન કર્યો, જેના કારણે આ વાતચીત આગળ વધી શકી નહીં અને અંતે ડીલ નિષ્ફળ ગઈ. બ્રિટન (UK) એ આ તકનો ઝડપથી લાભ લીધો અને તે પ્રથમ ક્રમે રહીને ડીલ મેળવવામાં સફળ રહ્યું.
ભારતને અપાયેલી સમયમર્યાદા
અમેરિકી મંત્રીએ દાવો કર્યો છે કે તેમણે ભારતને નિર્ણય લેવા માટે ત્રણ શુક્રવાર સુધીનો સમય આપ્યો હતો. લુટનિકે જણાવ્યું કે તેમણે ભારતીય અધિકારીઓને વડાપ્રધાન મોદીની વાત રાષ્ટ્રપતિ ટ્રમ્પ સાથે કરાવવા કહ્યું હતું, પરંતુ ભારત વિચારણામાં વ્યસ્ત હતું, ત્યારે તે સમયમર્યાદા વીતી ગઈ અને અમેરિકાએ ઇન્ડોનેશિયા, ફિલિપાઈન્સ અને વિયેતનામ જેવા અન્ય દેશો સાથે સોદા કરવાની શરૂઆત કરી દીધી હતી.
અમેરિકાનો કટાક્ષ
જ્યારે ભારતે અંતે અમેરિકાનો સંપર્ક કર્યો અને તૈયારી દર્શાવી, ત્યારે લુટનિકે પ્રતિક્રિયા આપી હતી કે હવે ઘણું મોડું થઈ ગયું છે. તેમણે કટાક્ષ કરતા કહ્યું કે તમે તે ટ્રેન માટે તૈયાર છો જે સ્ટેશન છોડી ચૂકી છે. હાલમાં ભારત સરકાર દ્વારા આ દાવાઓ પર કોઈ સત્તાવાર પ્રતિક્રિયા આપવામાં આવી નથી, પરંતુ આ નિવેદન એવા સમયે આવ્યું છે જ્યારે ડોનાલ્ડ ટ્રમ્પે ભારત પર ટેરિફ વધારવાના સંકેતો આપ્યા છે.