Iran Warning: ઈરાન-યુએસ-ઈઝરાયલ યુદ્ધ હવે વધુને વધુ ગંભીર બની રહ્યું છે. ઈરાને અમેરિકાને કડક ચેતવણી આપી છે કે જો તે ઈરાની ભૂમિ પર આક્રમણ કરશે તો તેને ઐતિહાસિક વિનાશનો સામનો કરવો પડશે.
ઈરાની લશ્કરી સૂત્રએ તસ્નીમ ન્યૂઝ એજન્સીને જણાવ્યું હતું કે દક્ષિણ મોરચા પર સંભવિત યુએસ હુમલાની અટકળોએ ઈરાની લડવૈયાઓમાં નોંધપાત્ર ઉત્તેજના પેદા કરી છે.
સૂત્ર અનુસાર, દસ લાખથી વધુ લડવૈયાઓ તૈયાર છે, જેમાં મોટી સંખ્યામાં યુવાન બાસીજ, IRGC (ઇસ્લામિક રિવોલ્યુશનરી ગાર્ડ કોર્પ્સ) અને નિયમિત સૈન્ય સભ્યોનો સમાવેશ થાય છે.
તેહરાનમાં જોરદાર વિસ્ફોટો સંભળાયા
ગુરુવારે રાત્રે તેહરાનમાં જોરદાર વિસ્ફોટો સંભળાયા. AFP સંવાદદાતાના જણાવ્યા અનુસાર, યુદ્ધ વિમાનોએ ઉડાન ભર્યાના થોડા સમય પછી ત્રણ જોરદાર વિસ્ફોટો થયા. આ વિસ્ફોટો વરસાદ વચ્ચે થયા હતા, તેથી તાત્કાલિક સ્પષ્ટ થયું નથી કે કયા ઠેકાણાંઓને નિશાન બનાવવામાં આવ્યા હતા.
ઇઝરાયલે તાજેતરમાં એક વરિષ્ઠ ઇરાની નૌકાદળના કમાન્ડરને મારી નાખવાનો દાવો કર્યો છે અને હવે તેણે ઇરાનમાં વધુ વ્યાપક હુમલાઓની યોજના જાહેર કરી છે. ઇઝરાયલી સૈન્યનું કહેવું છે કે તેણે ઇરાનની બેલિસ્ટિક મિસાઇલ ક્ષમતાને સંપૂર્ણપણે નષ્ટ કરવાના હેતુથી સેંકડો હુમલાઓ કર્યા છે.
અમેરિકા આત્મઘાતી રણનીતિથી હોર્મુઝ સ્ટ્રેટ ખોલવા માંગે છે
સૂત્રએ જણાવ્યું હતું કે- અમેરિકા આત્મઘાતી રણનીતિ સાથે હોર્મુઝ સ્ટ્રેટ ખોલવા માંગે છે. અમે તેમની વ્યૂહરચનાનો જવાબ આપવા અને સ્ટ્રેટ બંધ રાખવા માટે સંપૂર્ણપણે તૈયાર છીએ.
28 ફેબ્રુઆરીના રોજ ઇસ્લામિક ક્રાંતિના નેતા આયતુલ્લાહ સૈયદ અલી ખામેની અને અન્ય વરિષ્ઠ કમાન્ડરોની હત્યા બાદ અમેરિકા અને ઇઝરાયલે ઇરાન સામે મોટા પાયે હુમલો શરૂ કર્યો. લશ્કરી અને નાગરિક લક્ષ્યોને નિશાન બનાવીને વ્યાપક હવાઈ હુમલા કરવામાં આવ્યા, જેના કારણે જાનહાનિ થઈ અને માળખાગત સુવિધાઓને નુકસાન થયું. બદલામાં, ઇરાને મિસાઇલો અને ડ્રોનથી યુએસ અને ઇઝરાયલી ઠેકાણાઓ પર હુમલો કર્યો છે.