Vadodara News: વડોદરા જિલ્લાની 17 વર્ષની યુવા ખેલાડી આસ્મા તાહીરાળી ઝાબુવાલા સ્કૂલ ગેમ્સ ફેડરેશન ઓફ ઇન્ડિયા (SGFI)ની રાષ્ટ્રીય ચેમ્પિયનશીપમાં વેઇટલિફ્ટિંગમાં ગુજરાતનું પ્રતિનિધિત્વ કરવા જઈ રહી છે. આસ્માની પસંદગી વડોદરા સહિત સમગ્ર ગુજરાત માટે ગૌરવની બાબત બની છે. પોતાના રમતગમત જીવનની પ્રથમ મોટી રાષ્ટ્રીય સ્પર્ધામાં પ્રવેશ કરતી આસ્મા માટે આ અવસર એક મહત્વપૂર્ણ માઈલસ્ટોન સમાન છે.
આસ્મા ઝાબુવાલા માત્ર વેઇટલિફ્ટિંગમાં જ નહીં પરંતુ પાવરલિફ્ટિંગમાં પણ પોતાની આગવી ઓળખ ઉભી કરી ચૂકી છે. ઓછી વય હોવા છતાં તેણે સતત કઠોર મહેનત, શિસ્તબદ્ધ તાલીમ અને માનસિક ધૈર્યના બળે અનેક સ્પર્ધાત્મક ઇવેન્ટ્સમાં ભાગ લઈ અનુભવ હાંસલ કર્યો છે. પાવરલિફ્ટિંગ અને વેઇટલિફ્ટિંગ જેવી કઠિન રમતોમાં સફળતા મેળવવા માટે જરૂરી શારીરિક શક્તિ સાથે સાથે અડગ આત્મવિશ્વાસ અને પ્રતિબદ્ધતા આસ્મામાં સ્પષ્ટ જોવા મળે છે.
હાલ ધોરણ 12 વિજ્ઞાન શાખામાં અભ્યાસ કરતી આસ્માએ પોતાની રમતયાત્રા વિશે જણાવતાં કહ્યું હતું કે, “મારી વેઇટલિફ્ટિંગ અને પાવરલિફ્ટિંગની યાત્રા શરૂઆતમાં માત્ર જિજ્ઞાસાથી શરૂ થઈ હતી, જે આજે અડગ પ્રતિબદ્ધતામાં બદલાઈ ગઈ છે. સતત તાલીમ અને માનસિક ધીરજના કારણે હું બેસિક અભ્યાસમાંથી રાષ્ટ્રીય સ્તરની સ્પર્ધાઓ સુધી પહોંચી છું.”
પાવરલિફ્ટિંગ ક્ષેત્રે આસ્માએ રાજ્ય સ્તરે ‘ચેમ્પિયન ઓફ ચેમ્પિયન્સ’નો ખિતાબ મેળવ્યો છે. ઉપરાંત, ક્લાસિક નેશનલ સબ-જૂનિયર પાવરલિફ્ટિંગ ચેમ્પિયનશીપમાં તેણે ત્રણ સિલ્વર અને એક બ્રોન્ઝ મેડલ જીતી પોતાની પ્રતિભાનો પરિચય આપ્યો હતો. હવે એસજીએફઆઈ ચેમ્પિયનશીપમાં ભાગ લેવું તેના માટે રાષ્ટ્રીય સ્તરે પોતાની ક્ષમતાઓ સાબિત કરવાનો વધુ એક અવસર છે.
આસ્માનું સ્વપ્ન ઓલિમ્પિક ગેમ્સમાં વેઇટલિફ્ટિંગમાં ભારતનું પ્રતિનિધિત્વ કરવાનો છે. એસજીએફઆઈમાં મળેલો અવસર તે પોતાના લક્ષ્ય તરફનું મહત્વપૂર્ણ પગલું માને છે. તેની સિદ્ધિ વડોદરા અને ગુજરાતમાં યુવા ખેલાડીઓ, ખાસ કરીને યુવતીઓ માટે પ્રેરણાસ્રોત બની છે.