Vadodara News: વડોદરા શહેરના છાણી કેનાલ વિસ્તારમાંથી એક હૃદયદ્રાવક ઘટના સામે આવી છે. ગતરોજ કેનાલના પાણીમાંથી એક મહિલા અને 8 મહિનાની માસૂમ બાળકીના તરતા મૃતદેહ મળી આવતા સમગ્ર વિસ્તારમાં ભારે ચકચાર મચી ગઈ છે. પ્રાથમિક અનુમાન મુજબ મૃતક માતા અને પુત્રી હોવાની શંકા સેવાઈ રહી છે, જો કે હાલ ફતેગંજ પોલીસે મૃતકોની ઓળખ માટે ચક્રો ગતિમાન કર્યા છે.
કેનાલમાં મહિલા અને બાળકી મળ્યા
પ્રાપ્ત વિગતો અનુસાર, ગતરોજ છાણી કેનાલ પાસેથી પસાર થતા સ્થાનિક લોકોને પાણીમાં એક મહિલા તરતી નજરે પડી હતી. આ જોઈને તાત્કાલિક નજીકમાં જ ગેરેજ ચલાવતા એક યુવક અને અન્ય સ્થાનિક લોકો દોડી આવ્યા હતા. આ યુવકોએ પોતાની સૂઝબૂઝ અને સાહસથી જાતે જ દોરડાની મદદથી કેનાલની અંદર ઉતરીને મહિલાને બહાર કાઢી હતી. જ્યારે મહિલાને બહાર કાઢવામાં આવી ત્યારે ચોંકાવનારી બાબત સામે આવી કે, મહિલાએ કમરના ભાગે 8 મહિનાની માસૂમ બાળકીને ઓઢણી વડે બાંધેલી હતી.
એમ્બ્યુલન્સ આવે તે પહેલા દમ તોડ્યો
બહાર કાઢ્યા બાદ સ્થાનિક લોકોએ જોયું કે બંનેના શ્વાસ હજુ ચાલી રહ્યા હતા. આ ગંભીર પરિસ્થિતિને ધ્યાનમાં રાખીને સ્થાનિક નાગરિકોએ સમય ગુમાવ્યા વગર તાત્કાલિક પોતાની મેળે જ બંનેને હોસ્પિટલ લઈ જવાની તૈયારી દર્શાવી હતી. પરંતુ, સમયસર એમ્બ્યુલન્સની રાહ જોવામાં અને વ્યવસ્થા થવામાં ભારે વિલંબ થઈ ગયો હતો, જે આખી ઘટનાનો સૌથી મોટો અને ગંભીર મુદ્દો બની ગયો છે. સમયસર સારવાર કે એમ્બ્યુલન્સ ન મળતા બંને માસૂમ જીવોએ દમ તોડી દીધો હતો. જો સમયસર વાહન મળી ગયું હોત, તો કદાચ બંનેના પ્રાણ બચી શક્યા હોત તેવો સ્થાનિક લોકોએ રોષ વ્યક્ત કર્યો હતો.
પોલીસે તપાસ કાર્યવાહી શરુ કરી
ઘટનાની જાણ થતાં જ ફતેગંજ પોલીસ સ્ટેશનનો કાફલો તાત્કાલિક ઘટનાસ્થળે દોડી આવ્યો હતો અને તપાસનો ધમધમાટ શરૂ કર્યો હતો. મૃતકોના શરીર પાસેથી કોઈ ઓળખપત્ર કે દસ્તાવેજ ન મળવાના કારણે હજુ સુધી તેમની સત્તાવાર ઓળખ થઈ શકી નથી. પોલીસની પ્રાથમિક તપાસમાં મહિલાના જમણા હાથ પર 'રશ્મિકા' નામ કોતરેલું જોવા મળ્યું છે, જે ઓળખ માટેનો એકમાત્ર મહત્વનો પુરાવો બની શકે છે. પોલીસે આ નામ અને ચિહ્નના આધારે આસપાસના વિસ્તારોમાં તપાસ શરૂ કરી છે.
મૃતદેહોને પીએમ માટે ખસેડ્યા
પોલીસનું પ્રાથમિક અનુમાન છે કે, જ્યારે બંનેને કેનાલમાંથી બહાર કાઢવામાં આવ્યા ત્યારે તેમના શ્વાસ ચાલુ હતા, જે દર્શાવે છે કે તેઓ થોડા જ અંતરેથી કેનાલમાં પડ્યા હશે. હાલ આ સ્વૈચ્છિક આપઘાત છે કે પછી અકસ્માતે કેનાલમાં સરકી જવાની દુર્ઘટના છે, તે અંગેનું રહસ્ય અકબંધ છે. પોલીસે અકસ્માતે મોતનો ગુનો નોંધીને મૃતદેહોને પોસ્ટમોર્ટમ અર્થે ખસેડ્યા છે અને આ પરિવારની સાચી ઓળખ મેળવવા સઘન તપાસ આદરી છે.