Vadodara BAPS Temple Hindola Parv: પવિત્ર શ્રાવણ માસ નિમિત્તે અટલાદરા સ્થિત સુપ્રસિદ્ધ BAPS સ્વામિનારાયણ મંદિરમાં પરંપરાગત અને આસ્થાના પ્રતીક સમાન હિંડોળા પર્વની ભવ્ય ઉજવણી કરવામાં આવી રહી છે. ભગવાન સ્વામિનારાયણને ભક્તિભાવથી હિંડોળામાં ઝુલાવવાની આ સનાતન પરંપરામાં આ વર્ષે અટલાદરા મંદિર દ્વારા એક અનોખું અને કલાત્મક નજરાણું રજૂ કરવામાં આવ્યું છે, જેણે વડોદરાવાસીઓ અને હરિભક્તોનું મન મોહી લીધું છે.
યુરોપ મંદિરની સ્મૃતિ અને એફિલ ટાવરનું આકર્ષણ
આ વર્ષના હિંડોળા પર્વની સૌથી મોટી વિશેષતા એ છે કે યુરોપમાં નિર્માણ પામનાર ભવ્ય BAPS સ્વામિનારાયણ હિન્દુ મંદિરના આગામી ઉદ્ઘાટનની સ્મૃતિમાં મંદિર પરિસરમાં ફ્રાન્સના વિશ્વપ્રસિદ્ધ એફિલ ટાવરની આકર્ષક પ્રતિકૃતિ તૈયાર કરવામાં આવી છે. આ કલાત્મક અને ભવ્ય પ્રતિકૃતિની બરાબર નીચે ભગવાન માટે મનોહર હિંડોળા ગોઠવવામાં આવ્યા છે. પેરિસના પ્રતીક સમાન એફિલ ટાવરની છત્રછાયા નીચે સજાયેલા આ દિવ્ય હિંડોળા દેશ-વિદેશમાંથી આવતા હરિભક્તો માટે વિશેષ આકર્ષણનું કેન્દ્ર બન્યા છે.
રાહદારીઓ માટે પણ વિશેષ દર્શનની વ્યવસ્થા
આ હિંડોળા પર્વની રચનામાં લોકઉપયોગી અને દર્શનલક્ષી સુંદર આયોજન કરવામાં આવ્યું છે. મંદિર સંચાલકોએ હિંડોળાને એવી રીતે ગોઠવ્યા છે કે, માત્ર મંદિરની અંદર આવતા ભક્તો જ નહીં, પરંતુ મંદિરની બહાર મુખ્ય માર્ગ પરથી પસાર થતા રાહદારીઓ અને વાહનચાલકો પણ સહજતાથી રસ્તા પરથી જ ભગવાનના દિવ્ય દર્શનનો લાભ લઈ શકે. રોડ પરથી પસાર થતી જનતા પણ આ અદભુત નજારો જોઈને મંત્રમુગ્ધ થઈ રહી છે.
12 દરવાજાના મનોહર અને ભક્તિમય હિંડોળા
આ પ્રસંગે તૈયાર કરાયેલા 12 દરવાજાના હિંડોળા ખૂબ જ કલાત્મક અને શોભાયમાન દેખાઈ રહ્યા છે. સુંદર રંગો, અદભુત લાઈટિંગ અને ફૂલોની સુશોભિત સજાવટે હિંડોળાની ભવ્યતામાં અનેકગણો વધારો કર્યો છે. પર્વના પ્રારંભે અટલાદરા મંદિરના પૂજ્ય સંતો તથા મોટી સંખ્યામાં ઉપસ્થિત હરિભક્તોની પાવન ઉપસ્થિતિમાં ભગવાનની સુંદર શણગાર આરતી ઉતારવામાં આવી હતી.
આરતીના સમયે ગુંજતા વૈદિક મંત્રોચ્ચાર અને ભક્તિ સંગીતના સૂરોથી સમગ્ર મંદિર પરિસર ભક્તિમય અને દિવ્ય વાતાવરણથી ગુંજી ઉઠ્યું હતું. શ્રાવણ માસના આ પાવન દિવસોમાં અટલાદરા સ્વામિનારાયણ મંદિરે દર્શનાર્થે આવતા દરેક ભક્તના હૃદયમાં અલૌકિક શાંતિ અને આનંદની અનુભૂતિ થઈ રહી છે.