Gujarat Hostel Raid: સુરતના અબ્રામા વિસ્તારમાં તાજેતરમાં બનેલી ફૂડ પોઈઝનિંગની ગંભીર ઘટના બાદ રાજ્ય સરકાર સફાળી જાગી છે. વિદ્યાર્થીઓના સ્વાસ્થ્ય સાથે ચેડાં કરતી હોસ્ટેલ અને કેન્ટીનો સામે લાલ આંખ કરતા આરોગ્ય મંત્રી પ્રફુલ પાનશેરીયાએ સમગ્ર રાજ્યમાં સઘન તપાસ માટે સ્પેશિયલ ડ્રાઈવ યોજવાના કડક આદેશો આપ્યા છે. આ ડ્રાઈવ અંતર્ગત અત્યાર સુધીમાં સેંકડો જગ્યાઓ પર તપાસનો ધમધમાટ શરૂ કરવામાં આવ્યો છે.
સુરતની ઘટનાથી સરકાર એલર્ટ: 100 વિદ્યાર્થીઓને થઈ હતી અસર
ગત 13 સપ્ટેમ્બર, 2026ના રોજ સુરતના અબ્રામા વિસ્તારમાં આવેલી પી. પી. સવાણી શાળાની હોસ્ટેલમાં ફુડ પોઇઝનિંગની ગંભીર દુર્ઘટના સર્જાઈ હતી. આ બનાવમાં અંદાજે 100 જેટલા વિદ્યાર્થી અને વિદ્યાર્થીનીઓને ફૂડ પોઈઝનિંગની અસર થતાં તંત્ર દોડતું થઈ ગયું હતું. આ ઘટનાને રાજ્ય સરકારે અત્યંત ગંભીરતાથી લીધી છે અને ભવિષ્યમાં આવા બનાવો ન બને તે માટે આરોગ્ય મંત્રી પ્રફુલ પાનશેરીયાએ ખોરાક અને ઔષધ નિયમન તંત્રને રાજ્યભરની હોસ્ટેલ અને શૈક્ષણિક સંસ્થાઓની કેન્ટીનોમાં ફૂડ સેફ્ટીની ચકાસણી કરવા તાકીદ કરી હતી.
રાજ્યભરમાં 200 હોસ્ટેલ અને કેન્ટીનો પર સઘન તપાસ
મંત્રીના આદેશ બાદ ખોરાક અને ઔષધ નિયમન તંત્ર દ્વારા તાત્કાલિક ધોરણે એક્શન પ્લાન અમલમાં મૂકવામાં આવ્યો છે. તા. 14 સપ્ટેમ્બર, 2026ના રોજ સાંજે 6:00 વાગ્યા સુધીમાં રાજ્યભરમાં કુલ 200 જેટલી હોસ્ટેલ અને કેન્ટીનોનું સઘન નિરીક્ષણ કરવામાં આવ્યું છે. જેમાં 47 સરકારી, 21 અર્ધ સરકારી અને 132 ખાનગી હોસ્ટેલ તેમજ કેન્ટીનોનો સમાવેશ થાય છે. આ વ્યાપક તપાસ દરમિયાન નિયમોનું ઉલ્લંઘન કરનારા સંચાલકો સામે તંત્ર દ્વારા કડક પગલાં લેવાની શરૂઆત કરી દેવામાં આવી છે.
નિયમભંગ બદલ નોટિસો અને નમૂના સંગ્રહની કાર્યવાહી
તંત્રની આ સ્પેશિયલ ડ્રાઈવ દરમિયાન સ્થળ પર ગંભીર પ્રકારની અનહાઇજેનિક પરિસ્થિતિ અને અસ્વચ્છતા જોવા મળી હતી. આ તપાસના અંતર્ગત કુલ 61 સંચાલકોને સુધારા માટેની ઇમ્પ્રુવમેન્ટ નોટિસો ફટકારવામાં આવી છે. આ ઉપરાંત, ખાદ્ય પદાર્થોની ગુણવત્તા ચકાસવા માટે 114 જેટલા શંકાસ્પદ નમૂનાઓ એકત્રિત કરીને લેબોરેટરીમાં મોકલવામાં આવ્યા છે. અસ્વચ્છતાનું પ્રમાણ વધારે હોય તેવી 10 હોસ્ટેલ અને કેન્ટીનોને સંચાલકો દ્વારા સ્વયંભૂ બંધ કરી દેવામાં આવી છે, જ્યારે 1 સંસ્થાનનું લાયસન્સ પણ સસ્પેન્ડ કરવામાં આવ્યું છે.
આરોગ્ય સાથે ચેડાં કરનારાઓ સામે કડક કાર્યવાહી અવિરત રહેશે
રાજ્યનું ખોરાક અને ઔષધ નિયમન તંત્ર નાગરિકો અને ખાસ કરીને વિદ્યાર્થીઓના સ્વાસ્થ્ય અને સુરક્ષા માટે સંપૂર્ણપણે કટિબદ્ધ છે. પ્રશાસન દ્વારા સ્પષ્ટ ચેતવણી આપવામાં આવી છે કે આગામી દિવસોમાં પણ ખોરાકમાં ભેળસેળ કરતા કે કાયદા વિરુદ્ધ પ્રવૃત્તિઓમાં સંકળાયેલા અસામાજિક તત્વો સામે આ પ્રકારે કડક કાયદેસરની કાર્યવાહી અવિરતપણે ચાલુ રહેશે.