Rajkot News: રાજકોટ શહેરને વ્યાજખોરોના ત્રાસથી મુક્ત બનાવવાના હેતુથી પોલીસ દ્વારા લોકદરબાર યોજવામાં આવી રહ્યા છે, ત્યારે બીજી તરફ વ્યાજખોરીના ત્રાસને લઈને ગંભીર બનાવ સામે આવ્યો છે. રાજકોટના ભક્તિનગર પોલીસ સ્ટેશન વિસ્તારમાં અટીકા ઇન્ડસ્ટ્રીયલ ફાટક નજીક આવેલા લસણના કારખાનામાં 26 ઓક્ટોબર, 2026ના રોજ રમેશ ચાવડા (ઉં.વ. 40) અને તેમનાં પત્ની ભારતી ચાવડાએ ગળાફાંસો ખાઈ આપઘાત કર્યો હોવાની ઘટના સામે આવી હતી. આ મામલે મૃતક રમેશના પિતા માવજી ચાવડા (ઉં.વ. 68)ની ફરિયાદના આધારે પાંચ વ્યક્તિઓ સામે ગુનો નોંધવામાં આવ્યો છે. પોલીસે વ્યાજખોરી અને કથિત ત્રાસના આક્ષેપોને લઈને વધુ તપાસ હાથ ધરી છે.
મૃતક રમેશ ચાવડાના પિતા માવજી ચાવડા દ્વારા ભક્તિનગર પોલીસ સ્ટેશનમાં ભારતીય ન્યાય સંહિતાની કલમ 108, 308(2), 352(2) તેમજ ગુજરાત મની લેન્ડર્સ એક્ટ હેઠળ ફરિયાદ નોંધાવવામાં આવી હોવાનું જણાવાયું છે. ફરિયાદમાં વ્યાજે નાણાં આપનારા વ્યક્તિઓ દ્વારા વધુ વ્યાજની ઉઘરાણી અને કથિત ત્રાસ આપવામાં આવતો હોવાના આક્ષેપો કરવામાં આવ્યા છે.
પોલીસની પ્રાથમિક તપાસ મુજબ, રમેશ ચાવડાએ જુદા જુદા સમયે ચાર જેટલા વ્યક્તિઓ પાસેથી અલગ-અલગ વ્યાજદર પર નાણાં લીધાં હતાં. ફરિયાદમાં જણાવાયેલા આક્ષેપો અનુસાર, ગોગન બંધીયા પાસેથી રૂ. 4.50 લાખ વ્યાજે લેવામાં આવ્યા હતા. તેની સામે રમેશે અત્યાર સુધીમાં રૂ. 21 લાખ ચૂકવી દીધા હોવા છતાં દરરોજ રૂ. 20 હજાર લેખે વ્યાજની ઉઘરાણી કરવામાં આવતી હોવાનો આક્ષેપ છે.
આ ઉપરાંત, નિશા બુખારી પાસેથી રૂ. 4.50 લાખ લેવામાં આવ્યા હતા, જેની સામે રૂ. 9 લાખનું લખાણ કરાવવામાં આવ્યું હોવાનો ઉલ્લેખ ફરિયાદમાં કરવામાં આવ્યો છે. નિઝામ ધુસા પાસેથી રૂ. 1 લાખ લીધા હતા અને તેની સામે દરરોજ રૂ. 4 હજાર વ્યાજ ચૂકવવામાં આવતું હોવાનો આક્ષેપ છે. જ્યારે અજયસિંહ નામના વ્યક્તિ પાસેથી રૂ. 2 લાખ લીધા હોવાનું અને તેની સામે રમેશની કાર કબજે લેવામાં આવી હોવાની વિગતો પણ સામે આવી છે. આ તમામ આક્ષેપોની સત્યતા પોલીસ તપાસ બાદ સ્પષ્ટ થશે. હાલ ભક્તિનગર પોલીસ દ્વારા ફરિયાદમાં નામજોગ દર્શાવાયેલા આરોપીઓની શોધખોળ અને સમગ્ર મામલે તપાસ કરવામાં આવી રહી છે.
મૂળ માણાવદરના વતની રમેશ ચાવડા પત્ની ભારતી અને 15 વર્ષના પુત્ર સાથે રાજકોટના મવડી વિસ્તારમાં સ્વામિનારાયણ ચોક નજીક કૃષ્ણનગર શેરી નંબર 12માં રહેતા હતા. રમેશ અટીકા ઇન્ડસ્ટ્રીયલ ઝોનમાં લસણનું કારખાનું ચલાવતા હતા.પ્રાથમિક વિગતો મુજબ, 26 ઓક્ટોબરની મોડી રાત્રે આશરે દોઢ વાગ્યે રમેશ અને ભારતી ઘરેથી નીકળીને કારખાને પહોંચ્યાં હતાં. ત્યારબાદ બંનેએ ગળાફાંસો ખાઈ આપઘાત કર્યો હોવાનું સામે આવ્યું છે.બીજી તરફ, પતિ-પત્ની મોડી રાત્રે ઘરેથી નીકળી જતાં રમેશના પિતા માવજી ચાવડાને શંકા ગઈ હતી. તેમણે પરિવારના લક્ષ્મીદાસને આ અંગે જાણ કરી હતી. ત્યારબાદ પરિવારજનોએ બંનેની શોધખોળ હાથ ધરી હતી. શોધખોળ દરમિયાન અટીકા ઇન્ડસ્ટ્રીયલ ઝોનમાં આવેલા કારખાનામાંથી દંપતીના મૃતદેહ મળી આવ્યા હતા.
દંપતીના અકાળે મોતથી પરિવાર પર આભ તૂટી પડ્યું છે. માત્ર 15 વર્ષના પુત્રે એકસાથે માતા અને પિતાની છત્રછાયા ગુમાવતાં પરિવારજનોમાં શોકની લાગણી ફેલાઈ છે. સમગ્ર વિસ્તારમાં પણ આ ઘટનાને પગલે દુઃખનો માહોલ જોવા મળી રહ્યો છે. એક તરફ રાજકોટ પોલીસ દ્વારા વ્યાજખોરીના દૂષણને ડામવા લોકદરબાર યોજી નાગરિકોને ફરિયાદ કરવા પ્રોત્સાહિત કરવામાં આવી રહ્યા છે, ત્યારે આ બનાવે વ્યાજખોરી અને ગેરકાયદે ઉઘરાણીના આક્ષેપો સામે અસરકારક કાર્યવાહી કરવાની જરૂરિયાત ફરી એકવાર ચર્ચામાં લાવી છે. હાલ પોલીસની તપાસમાં વ્યાજની લેવડદેવડ, ઉઘરાણી અને દંપતીનાં મોત વચ્ચેના સંબંધ અંગે વધુ વિગતો બહાર આવે તેવી શક્યતા છે.